မဝ်သကိုဝ်၊ အံက်တဝ်ဗာ (၂၂)
သွက်ကောန်ဍုၚ်ရုယှာ (၁၁၀) တၠ ဍုၚ်ယူကရုၚ် မရပ်ဒက်လဝ်ဂှ် ဒဒှ်ရရုယှာ သၠာဲကဵု ညးဗြဴကောန်ဍုၚ်ယူကရုၚ် (၁၀၈) တၠ မထိၚ်ဒက်လဝ် နဒဒှ်ဂၠုဲပၞာန်တံဂှ် သၞာဲဒဴၜါလ္ပာ်တံ ဟီုလဴလဝ်ရ။
ပၞောဝ်ကဵုမၞိဟ်ဗြဴတံဏံ (၃၇) တၠဂှ်ဝွံ ဒှ်ရဲဖျေံလဝ်လွဟ် ပ္ဍဲကဵုရုၚ်ကလောန်ပသဲက္ဍိုၚ် အဇြိုဝ်သတေဝ်(လ်) အပ္ဍဲပေါဲဗ္တိုက် ဍုၚ်မာရဳယဝ်ပူ မတုဲဒှ်လဝ် ပ္ဍဲဂိတုမေတေံရ။
မၞိဟ်မဗၠးကၠုၚ်လဝ် ဗွဲမဂၠိုၚ်ဂှ်ဝွံ ဒှ်ကောန်က္ၜၚ် နူက္ၜၚ်ဖ္ဍိုက်ဗၞိက် လ္ပာ်ယူကရုၚ်တံ မထိၚ်ဒက်လဝ်ဂှ်တုဲ ကောန်ဂကောံဒပ်ပၞာန် မပါ်တိတ်တံ မၞုံပၟိက်ကဵုရုယှာ နူဒေသဒေါန်ဗာသ် သ္ကုတ်ဗၟံက်ယူကရုၚ်တံလေဝ် ပါလုပ်ဒၟံၚ်ကီုရ။
ကုမၞိဟ်ဗြဴကောန်ဍုၚ်ယူကရုၚ် မကလေၚ်ဗၠးကၠုၚ်လဝ်တံဂှ် ကော်ဏာလဝ် လ္ပာ်ဒေသသ္ကုတ်သၠုၚ်ကျာ မဒှ်တိဍာ်အလဵုအသဳထိၚ်ဒက် ဇြာပဝ်ရဳသဳသဳယျာဂှ် သၞာဲဒဴယူကရုၚ်တံ ဟီုရ။
ညးဗြဴ (၁၀၈) တၠဂှ် ကလေၚ်ဗလးကၠုၚ်လဝ် နကဵုအစဳဇန်သၠာဲမၞိဟ်ဗြဴ ကိုပ်ကၠာအိုတ်ရောၚ် ဇၞော်သ္ကိုပ်ရုၚ်သမ္မတ ယူကရုၚ် အာန်ဒရဳယျာမက်(ခ်) ဟီုရ။
ပ္ဍဲကဵုညးမဗၠးၜးကၠုၚ်တံဂှ် မိယာဲ ကဵု ကောန်ဝုတ် မဒးဒုၚ်ရပ်လဝ် မွဲစွံတံလေဝ် ပါလုပ်ကီုဂှ် ညးဟီုဂးလဝ်တုဲ ပ္ဍဲကဵုဂှ် (၁၂) တၠဂှ်ဝွံ ဒှ်ညးယိုက်ဂၠေၚ်တာလျိုၚ်ပၞာန်ရောၚ် ညးသ္ဂးရ။
သၞာဲဒဴနူဒေသ ဒေါန်နက်(သ်) မဒှ်ဒေသပါ်တိတ် နူယူကရုၚ်တံဂှ် သ္ပဒတန်လဝ် ပရေၚ်သၠာဲကောန်ထံၚ်ဏံဂှ်တုဲ ပ္ဍဲကဵုပွမသၠာဲဂတးဏံ ကောန်ထံၚ် (၂) တၠ ဒဒှ်ရသ္ဂုတ်သွာတ်လဝ် သွက်ဂွံဆက်မံၚ်အာ ပ္ဍဲဍုၚ်ရုယှာဂှ် လ္ပာ်ရုယှာ လလောၚ်ပ္တိတ်လဝ်ရ။
ပ္ဍဲကဵုကောန်ထံၚ် မဗလးကၠုၚ် နူယူကရုၚ်တံဂှ် ကောန်က္ၜၚ် (၈၀) တၠ ကေုာံ ကောန်ပၞာန် (၃၀) တၠ ပါလုပ်ဂှ် လ္ပာ်ရုယှာ ဟီုဂးလဝ်ရ။
Ref: BBC