လံၚ်လုၚ်၊ အံက်တဝ်ဗာ (၂၄)
ပ္ဍဲပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သဳဂှ် အပ္ဍဲပွိုၚ်ၜါတ္ၚဲဂှ် သီုညးထံက်ဂလာန်ဗော် NLD တံ မပါလုပ် ညးဒေသ (၁၂) တၠဂှ် ဂကောံဒပ်ကံၚ်ဇြဳပၞာန်တံ လုပ်စိုပ်ရပ်ဒက်ဏာလဝ် ပ္ဍဲသ္ၚိဒၟံၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုအံက်တဝ်ဗာ (၂၁) အခိၚ်ဗ္တံ ၜိုတ် (၈) နာဍဳဂှ် ကောန်ဒပ်ကံၚ်ဇြဳပၞာန် ဇြဟတ် ၜိုတ် (၈၀) စိုပ်ကၠုၚ် နကဵုကွဳစက် (၅) ဖ္ဍိုက်တုဲ ထ္ၜးဟိုတ်စၟဳစၟတ်စရၚ်ကၟုဲတုဲ ရပ်ဒက်ဏာလဝ် ညးဒေသတံ ပ္ဍဲကဵုသ္ၚိဒၟံၚ် မၞုံအရာပ် လ္တူဍုၚ်လံၚ်လုၚ်တံဂှ်ရ။
ညးဒးဒုၚ်ရပ်ဒက်တံဝွံ ဒှ်ညးမထံက်ဂလာန်ဗော် NLD ဂမၠိုၚ် ဥူမျဵုတုၚ်၊ ဥူတေန်တံၚ်၊ ကိုဝ်ဖိုဝ်တုကျာ ဒၟံၚ်အရာပ် က၊ ခ၊ ဂ မဒှ်အရာပ် လ္တူဍုၚ်လံၚ်လုၚ်တံ မပါလုပ် ရပ်ဒက်ဏာလဝ် ညးဒေသ (၉) တၠရ။
လက္ကရဴဂှ်တုဲ ကောန်ဂကောံဒပ်ကံၚ်ဇြဳပၞာန်တံဝွံ ပ္ဍဲဂိတုအံက်တဝ်ဗာ (၂၂) ပယျာံဂယးဂှ်လေဝ် ထပ်ရပ်ဒက်ဏာလဝ် ဥူညာန်ဝေန်၊ ဥူအံၚ်ကျဝ်ညုၚ် ကေုာံ ဒဝ်မျေအ်ဌေ ညးဒေသ နူဂကောံကွာန် ဍာ်ဗုလ္ပာ်သၟဝ် ပွိုၚ်ဍုၚ်လံၚ်လုၚ်တံပၠန်ရ။
လ္ပာ်ကံၚ်ဇြဳပၞာန်ဂှ် ပ္ဍဲကဵုညးဒေသ မရပ်ဒက်ဏာတံဂှ် သၞာဲဒဴ CDM မွဲတၠ ပါလုပ်ဒၟံၚ်ရောၚ် ဂွံတီကေတ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
ကံၚ်ဇြဳပၞာန်ဂှ် ညးဒေသ ဍေံတံ မရပ်ဒက်ဏာဂှ်ဝွံ ရပ်ဒက်ဏာလဝ် နကဵုတၚ်စောတ်စောဲ ထံက်ပၚ်ဒၟံၚ်သြန်သၠုဲ ဇရေၚ်ဂကောံဒပ်စဵုဒၞါညးဍုၚ်ကွာန် PDF တံရ။
အခိၚ်လၟုဟ်ဂှ် ကံၚ်ဇြဳပၞာန်ဝွံ ကုညးဒေသ မရပ်ဒက်လဝ်တံဂှ် ရပ်ချုက်လဝ် ပ္ဍဲဗ္ဒိုပ်ဗၠာဲသၟိၚ် ၝောံဍုၚ်လံၚ်လုၚ်တုဲ ကၠောန်သ္ပစၟဳစၟတ်သၟာန်သၟုက်ဒၟံၚ်ဂှ် ဂွံတီကေတ်ရ။
အလုံကၟိန်ဍုၚ်မွဲ ကြဴနူဒပ်ပၞာန်သီအဝဵုတုဲ ညးဍုၚ်ကွာန် ဗ္ဒါဲ (၁၆၀၀၀) ဒးဒုၚ်ရပ်ဒက်လဝ်ရောၚ် ဂကောံရီုဗၚ်ဟံၚ်ပြာ် ကောန်ထံၚ်ပရေၚ်ဍုၚ်ကွာန် (AAPP) လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)