မ္ၚဵုရအဴ။ ဒုၚ်တၠုၚ်ဏာ နူအစဳဇန် ဒးဗၠေတ် သြန်လောန်တိုၚ်(မ်) ပိုယ်တံရအဴ။
ဗွဲကြဴဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ပ္တောံ မပြးထၞာန်ဒၟံၚ် လ္တူဇာဇၞိက်ပရေၚ်မၞိဟ်တံဂှ် နူကဵုအစဳဇန် ဒးဗၠေတ်ပိုယ်တံဏံ စၟဳစၟတ်ကဵုအာရောၚ်။
တ္ၚဲဏံ ပရိုၚ်ညးထံက်ဂလာန်ဒပ်ပၞာန်တံ မတြးဒၟံၚ် “ဂကောံ AA တံ ဟိုတ်ဟွံမွဲမွဲသာ် ပန်ပှော်လဝ် ကွာန်ပုၚ်တဝ်၊ ပွိုၚ်ဍုၚ်ယတေအ်ဒံၚ် နကဵုလွဟ်လက်နက်ဇၞော် ကြာန်န်ဂှ်ရ သၟတ်ကွးဘာအာယုက် (၁၄) သၞာံ မမံၚ်ဒၟံၚ် အပ္ဍဲကွာန်ဂှ်မွဲတၠ ချိုတ်အာ” ဂှ် စၟဳစၟတ်ကဵုအာရောၚ်။
ပရူပရာဏံဂှ် နူအကံက် ထလဳဂရာမ်တြးဝါဒဂမၠိုၚ် မပ္တံကဵု Kyaw Swars, Kalaw Voice မလေပ်တြးကၠေံ ပရူပရာထံက်ဂလာန်ဒပ်ပၞာန်တံ စတြးကၠုၚ်လဝ် ပ္ဍဲဂိတုအံက်တဝ်ဗာ (၁၉) တေံရ။
စပ်ကဵုပရူပရာဏံတုဲ နူကဵုသြၚ်လောန်တိုၚ်(မ်) စၟဳစၟတ်စမ်ရံၚ်ဂှ် ဒပ်ကံၚ်ဇြဳပၞာန် ပန်ပှော်လဝ် လွဟ်လက်နက်ဇၞော် ကြာန်န်တုဲ သၟတ်ကွးဘာ (၇) တန်မွဲတၠ ဒးပြဟ်လလုဲအာလဝ်ဂှ် စၟဳစၟတ်ဂွံဆဵုကေတ်ရ။
လၟေၚ်ဒဒှ်ဍာံဂှ် ပ္ဍဲဂိတုအံက်တဝ်ဗာ (၁၉) ပယျာံဂယး ၜိုတ် (၁၁) နာဍဳကဝက်ဂှ် ကမ်လွဟ်လက်နက်ဇၞော် နူဗျူဟာ (ရေစိုးချောၚ်း) ဒပ်ကံၚ်ဇြဳပၞာန် ဖျေံသ္ဇိုၚ်သ္ကုတ်သၟဝ်ကျာ ပွိုၚ်ဍုၚ်ယတေအ်ဒံၚ် မပန်ပှော်နၚ်ကြာန်န်ဂှ်ဝွံ ဒတုံစှ်ေ ဗ္တိုဟ်ထ္ကးအာ ပ္ဍဲသ္ၚိဒၟံၚ် ဥူအံၚ်ကျဝ်မေန် ကေုာံ သမ္ဘာညး ဒဝ်တုၚ်နု ကောန်ဝုတ်ညး ကွးဘာ (၇) တန် နူကွာန်ပုၚ်တဝ်ဂှ်တုဲ မညုၚ်ဨဇြာန် ကွးဘာထပှ်တန် ဒးချိုတ်အာလဝ်ရောၚ် သၟာန်သၟုက်ညးဒေသတံတုဲ ဌာန်ပရိုၚ်အပ္ဍဲဒေသ Narinjara ထ္မံက်ပ္တိတ်ချူတြးလဝ်ဂှ် ဂွံဆဵုကေတ်ရ။
“ကမ်လွဟ်ဇၞော်ဂှ် ဗ္တိုဟ်ထ္ကးအာ ပ္ဍဲသ္ၚိ၊ ညးလေဝ် အခိၚ်နွံဒၟံၚ်ပ္ဍဲသ္ၚိဂှ် ကမ်လွဟ်လက်နက်ဇၞော် ဒတုံဗ္တိုဟ်တုဲ နူကဵုပ္ဍဲသ္ၚိဂှ် ပရာတ်တိတ်အာ စဵုလ္တူဂၠံၚ်ရ၊ ဝပ်တံဂှ်တှ်ေ နူကဵုစး ကၠိုဟ်အာတုဲ လ္ပာ်သၟဝ်ဂၞိၚ်မွဲသ္ကုတ် ကြပ်ပိုတ်တိတ်အာဂှ် ဌာန်ပရိုၚ် Narinjara ချူပ္တိုန်လဝ်ပရိုၚ်ဂှ် ဂွံဆဵုကေတ်ရ။
ဟိုတ်နူတၚ်နၚ်တံဏံတုဲ ပရိုၚ်ညးထံက်ဂလာန်ဒပ်ပၞာန်တံ မတြးဒၟံၚ် လ္တူဇာဇၞိက်ပရေၚ်မၞိဟ်တံဂှ် ပရိုၚ် “ဂကောံ AA တံ ဟိုတ်ဟွံမွဲ ပန်ပှော်လဝ် ကွာန်ပုၚ်တဝ်၊ ပွိုၚ်ဍုၚ်ယတေအ်ဒံၚ် နကဵုလွဟ်လက်နက်ဇၞော် ကြာန်န်ဂှ်ရ ကွးဘာအာယုက် (၁၄) သၞာံ မမံၚ်ဒၟံၚ် အပ္ဍဲကွာန်မွဲတၠ ချိုတ်အာ” ဂှ်ဝွံ ဒှ်ဆပရိုၚ်ပ္တောံ ညးထံက်ဂလာန်ဒပ်ပၞာန်တံ မတြးဒၟံၚ်မွဲရောၚ်ဂှ် စၟဳစၟတ်ကဵုလဝ် သွက်ပုရိသာတ် ဌာန်ပရိုၚ်သြၚ်လောန်တိုၚ်(မ်) ပိုယ်တံရ။
သြၚ်လောန်တိုၚ်(မ်)