ဝါယှေန်တာန်၊ အေဗရာ ၉
အပ္ဍဲဂိတုအေဗရာ ၈ သမ္မတ ဒဝ်နယ်ထရ ပွိုၚ်မွဲဗ္တံဓဝ်စၟတ်လဝ် သွက်ဂွံသောၚ်သ္အးအလုံမွဲဍုၚ် ကိုပ်ကၠာဟွံစိုပ်အခိၚ်သ္ဂုတ်သွာတ် ဆၜိုတ်မွဲနာဍဳဓဝ် အကြာအမေရိကာန် ကေုာံ အဳရာန် ဂွံတင်တုပ်စိုပ် ဒေါအ်ပန်ပှော်ညးသ္ကံတုဲ ဍုၚ်သီုၜါလ္ပာ် လလောၚ်တြး ကလိဂွံအာ ပေါဲအံၚ်ဇၞးအိုတ်ရ။
ပရေၚ်တင်တုပ်စိုပ်အဳရာန်ဝွံ သွက်အမေရိကာန်မ္ဂး ဒှ်အရာအံၚ်ဇၞး မဍိုက်ပေၚ်တုဲဒှ်မွဲရောၚ် ထရ ဟီုရ။
ညံၚ်အဳရာန်ညံၚ်ဂွံကၠုၚ်ပ္ညဳပ္ညပ်ဂှ် ဍုၚ်ကြုက် ဟီုဗ္တိုက်ဖ္အောဝ်လဝ် ဒှ်မာန်ရောၚ် ကေုာံ ယူရေနဳယာံအဳရာန် မတောမ်သ္အးလဝ်တံဂှ်လေဝ် ဒးထိၚ်ဒဝ်အာရောၚ် ထရ ဟီုရ။
အရာမကလိဂွံတင်တုပ်စိုပ်ကဵုအဳရာန်ဂှ် ဒှ်ပေါဲအံၚ်ဇၞး ၁၀၀ က္ဍိုပ်က္လံတုဲ ဟွံဒးသၟာန်ပုစ္ဆာပုဟ် ထရ သ္ဂးရ။
အရာအဳရာန်တုပ်လဝ်စိုပ် သွက်ဂွံပံက်ကဵုဂၠံၚ်ဍာ်ကိစ္စဇၞော် သွက်ကူသာန်ဗၞိက်ဂၠးကဝ်ဂှ် ဒှ်တင်အဓိက သွက်တင်တုပ်စိုပ်ဒေါအ်ပန်ပှော်ညးသ္ကံရောၚ်ညးလ္ၚတ်ပရေၚ်ဂၠးကဝ် ပါမောက္ခ ဟူသိၚ် ဗာနိုင် နူတက္ကသိုလ်အေန်ဒဳယျာနာ ဟီုရ။
ညံၚ်ဟွံဂွံဒးဒုၚ်ဗတိုက်ကြဳဗုမ်ဗွဲမသ္ကာတ်မြဟ်တုဲ နကဵုအဳရာန် ယှအ်ကဵုအမေရိကာန်ညိည ဒှ်မာန်ရောၚ် သာ်ဝွံ ပါမောက္ခ ဟူသိၚ် သ္ၚဳဂၠိပ်လဝ်ရ။
ယဝ်ရအဳရာန်ဟွံဒုၚ်တဲတင်တုပ်စိုပ်မ္ဂး စမြိုၚ်သ္ဇိုၚ်နာနာတံ၊ ဒဒန်တံ ကေုာံ ရုၚ်ပတိတ်ဓာတ်လလဳတံဂှ် ဒးပန်ပလီုထောံရောၚ် ထရ ဘပဠလဝ် မဒှ်ရ။
ရန်တၟအ်ကဵု ညံၚ်အဳရာန်ဟွံဂွံပတိတ်လွဟ်နျူကလဳယျာ ပေါဲပၞာန်ပွိုၚ်မွဲဂိတုပြၚ်လံအာတုဲ ကြဴနူဂှ် ဆေၚ်စပ်ကဵုယူရေနဳယာံအဳရာန်မတောမ်သ္အးလဝ်တံဂှ် ပရေၚ်ဒးသၟာန် နွံမံၚ်ပၠန်ရောၚ်။
ၜိုန်ဂှ်လေဝ် ယဝ်ရကေတ်အာတင်တုပ်စိုပ်ပရေၚ်ၜိုဟ်လလမ်ဂွံမ္ဂး ကိစ္စယူရေနဳယာံအဳရာန်မတောမ်သ္အး လဝ်တံလေဝ် ပါလုပ်အာကီုရောၚ် ထရ ဟီုလဝ်ရ။
ပ္ဍဲလဒေါဝ်ဂိတုမေ သွက်ဂွံအာဍုၚ်ကြုက် ထရ ပဠေဝ်ပဠေတ်မံၚ်တုဲ ညံၚ်အဳရာန်ဂွံစိုပ်ကၠုၚ်ဝိုၚ်ပ္ညဳပ္ညပ်ဏံဂှ် ဍုၚ်ကြုက်ဟီုဗ္တိုက်ဖ္အောဝ်ဖျေံလဝ်ကတောဝ် ဒှ်မာန်ရောၚ် ညးတေံဟီုလဝ်ရ။
ပရိုၚ် – သြၚ်လောန်တိုင်မ်
Ref:AFP