မုဟ်ဍုၚ်၊ အေဗရာ ၂၀
အပ္ဍဲတွဵုရးမန် ဇၟာပ်ဆေၚ်ကၠေၚ်စက်တံ နကဵုသၞောတ်ဗာကုက် ညံၚ်ဂွံသွံအာကၠေၚ်ဗွဲမပြဟ်မာန် ညံၚ်ဂွံဖန်ဇန်အိုတ်ညိဂှ် နကဵုသမ္မတသီအဝဵု ခါန်ကၞက် သ္ကိုပ်ဝန်ဇၞော်တွဵုရးမန် ဥူအံၚ်ဝေန်တာန် ဟီုရ။
အပ္ဍဲဂိတုအေဗရာ ၁၈ တုဲကၠုၚ်ဏံ ပ္ဍဲပွိုၚ်ဍုၚ်မုဟ်ဍုၚ် ကွာန်ကတုၚ်ပဝ် အာစိုပ်လဝ် သၞေဟ် Puma Power Internation Port Terminal တုဲ ဆဵုဂဗလဝ်ကဵု ညးတာလျိုၚ်ဌာနနာနာ သၟဝ်ပရေၚ်အုပ်ဓုပ်ညးတံဂှ် ကဵုလဝ် စၞောန်ပ္ညုၚ် မဒှ်ရ။
တုဲပၠန် ညးဍုၚ်ကွာန်တံ ဒးပြေၚ်ရေၚ်မၚ်ရာန်မံၚ်ကၠေၚ်စက် အပ္ဍဲဆေၚ်ကၠေၚ်တံဂှ် ဂွံဆဵုညာတ်အာတုဲ ဒးမၚ်ပြေၚ်ရေၚ်ရာန်မံၚ်တံ ညံၚ်ဂွံအောန်စှ်ေအာဂှ်လေဝ် ကဵုလဝ်စၞောန်ပ္ညုၚ်ကီုရ။
အပ္ဍဲဒေသတၞဟ်ဟ်တံ သွံမံၚ်ကၠေၚ်စက် နကဵုသၞောတ်ဗာကုက်တုဲ ဟွံဒးမၚ်ပြေၚ်ရေၚ် ရာန်ဂွံမံၚ်ကီုလေဝ်၊ ပ္ဍဲတွဵုရးမန်ဏံတှ်ေ သၞောတ်ဗာကုက်ဟၟဲဏီတုဲ ဒးဆဵုဂဗမံၚ်ကဵု အခက်အခုဲဖိုဟ်ရောၚ် ညးဒေသမန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လောန်ကၠုၚ် ၄/၅ တ္ၚဲတေံ အဲအာဍုၚ်တံၚ်ဂျဳ၊ လပါ်တေံတှ်ေ ဟွံဒးမၚ်ပြေၚ်ရေၚ်ပုဟ်၊ ပြေပြံၚ်မံၚ်ကွေံကွေံရ။ ပ္ဍဲရးမာန္တလေဝ်တံတှ်ေ နကဵုလၟိဟ်လေတ်စၟတ်လဝ်ဂှ် ဍေံတံဗှ်လဝ် QR ကုက် ရ။ ယဝ်ရမွဲတ္ၚဲ ၂၅ လေတ်မ္ဂး ဂွံ ၂၅ လေတ်ရ။ ဟွံဒးမၚ်ပြေၚ်ရေၚ်ပုဟ်၊ ပြေပြံၚ်မံၚ်။ ၜိုန်ဂှ်လေဝ် လုပ်ကၠုၚ်ပ္ဍဲတွဵုရးမန်ပိုဲတှ်ေ ဆေၚ်ကၠေၚ်တံ ကၟာတ်မံၚ်ဖအိုတ်၊ မွဲဆေၚ်လေဝ် ဟွံပံက်ပုဟ်။ ကၠေၚ်ဍေၚ်တှ်ေ ခက်ခုဲမံၚ်ဖိုဟ်ဏောၚ်” သာ်ဝွံ သ္ဂးရ။
တုဲပၠန် ဟိုတ်နူသၞောတ်ဗာကုက်ဟၟဲတုဲ ပ္ဍဲတွဵုရးမန်ဂှ် စဵုကဵုလၟုဟ် ဒးမၚ်ပြေၚ်ရေၚ်မံၚ်အခိၚ်လံလ သီုကဵုဒးတိက်မံၚ်ကီု ဟိုတ်နူဟၟဲကဵုသၞောတ်ထ္ၜတ် လၟိဟ်လေတ်စၟတ်ကဵုလဝ်တုဲ ဆၜိုတ်စၟတ်လဝ် င္ၚုဟ်မွဲဟေၚ်သွံမံၚ်ဂှ်တုဲ ဟွံပြေပြံၚ်မံၚ်ရောၚ် ညးဆက်ဟီုရ။
သမ္မတသီအဝဵု ခါန်ကၞက် သ္ကိုပ်ဝန်ဇၞော်တွဵုရးမန်ဂှ်တှ်ေ ကၠေၚ်စက်တံဂှ် သွက်ကွဳစက်တံသၟးဟွံက သီုကဵုသွက်ပရေၚ်တဵုလွဳ ကာလဥတုဗြဲဂှ်လေဝ် ညံၚ်ဂွံဂွံကၠေၚ်စက်မာန် ဒစးဒုၚ်ဖန်ဇန်လဝ်ကၠာညိကီု ညံၚ်ကၠေၚ်ဍေၚ်ဟွံပိုတ်အိုတ်အာဂှ် ဒးထိၚ်ဒဝ်အာအတိုၚ်ဗီုပြၚ် အကာဲအရာလၟုဟ်ရောၚ် ကဵုလဝ်စၞောန်ပ္ညုၚ်ကီုရ။
သွက်ပရေၚ်တဵုလွဳ ဥတုဗြဲဂှ်လ္ပဟီုဏီ ပ္ဍဲအခိၚ်လၟုဟ်ဏံ ဟိုတ်နူ ကျာတ်မံၚ်ကဵုကၠေၚ်စက်တံတုဲ အကာဲအရာတဵုလဝ် သြောံကညၚ် လၟုဟ် လီုလာ်ဟောံဗြမ်မာန်တုဲ၊ ယဝ်ရဆက်အာမံၚ် အတိုၚ်ဗီုဏံမ္ဂး ပ္ဍဲဥတုဗြဲဂှ်လေဝ် ဆက်တဵုအာသြောံဟွံမာန် အကာဲအရာဒှ်အာရောၚ် သၟာဗ္ၚမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“သွက်သၟာဗ္ၚတံ အခက်အခုဲဒှ်မံၚ်ဗွဲမဂၠိုၚ်ရ။ အခက်အခုဲဂှ်တှ်ေ ဒးအာမၚ်တာန်သဳပြေၚ်ရေၚ်ရ။ သြောံဒးပၠုပ်ဍာ်တံ စိုပ်အခိၚ်ဍုဟ်တုဲ ယဝ်ရဟွံပၠုပ်ဍာ်မ္ဂး သြောံတံ ဆောံလေၚ်အိုတ်ဏောၚ်။ ယဝ်ရဆက်အာအတိုၚ်ဗီုဏံမ္ဂး ပ္ဍဲဥတုဗြဲ ယဝ်ကၠေၚ်ဟၟဲမ္ဂး သၟာဗ္ၚတံဏံ ဗီုလဵုဂွံတဵုလွဳစရော။ ဇေတ်တ်တှ်ေ သၟာဗ္ၚပိုဲတံ ကၠောန်ဗ္ၚတဵုလွဳဟွံမာန်၊ သြောံတံ တဵုဟွံမာန် အကာဲအရာဗီုဏံ ဒှ်ကၠုၚ်မာန်ဏောၚ်” သာ်ဝွံ သ္ဂးရ။
အခိၚ်လၟုဟ်ဏံ ပၞောဝ်အာကဵုအလုံဍုၚ်မွဲမ္ဂး တွဵုရးမန်ဂှ် ဒှ်ဒၞာဲင္ၚုဟ်ကၠေၚ် က္ဍၚ်သၠုၚ်အိုတ်တုဲ ညံၚ်ရဴသၞေဟ်တဳလဝါတေံ ဟိုတ်နူဗဟဵုဗာန် (Central Bank) ဟွံသွံကဵုဒဝ်လာ ကုညးပၠုပ်နၚ်ကၠေၚ်စက်တံရောၚ် တၠကမၠောန်ကၠေၚ်စက်တံ သ္ဂးရ။
အပ္ဍဲဒေသမန်မ္ဂး ဆေၚ်ကၠေၚ်ဗွဲမဂၠိုၚ်တံဂှ် သွံကဵုမံၚ်အခိၚ်ညိညဓဝ်ကီု မွဲဏှမွဲဏှကၠေၚ်အိုတ်အာတုဲ အတိုၚ်ရဲရာန်တံနွံပၟိက် သွံကဵုဟွံမာန် ဒးဂဗဆဵုမံၚ်ကဵု အကာဲအရာတံဏံရ။
ကၠေၚ်စက် အပ္ဍဲတွဵုရးမန်ဂှ်တှ်ေ စနူဂိတုမာတ်တုဲကၠုၚ်တေံတုဲ အတိုၚ်နွံပၟိက် ရာန်ဂၠိုၚ်ၚ်ဟွံဂွံ ရာန်ဂွံမံၚ် နကဵုသၞောတ်ဗ္ၜတ်အပိုင်အခြာ၊ ဒးရာန်မံၚ် နကဵုသၞောတ် စောံ/မ၊ ဒးမၚ်ပြေၚ်ရေၚ်တာန်မံၚ်လံလံတုဲ ပရေၚ်မၞိဟ်ပရေၚ်ပိုန်ဒြပ် ကဏ္ဍနာနာတံ ဒှ်ဒၟံၚ်တၚ်ယုက်ဒေက်ကၠုၚ် နာနာသာ်ရောၚ် မဒှ်ရ။
ပရိုၚ် – သြၚ်လောန်တိုၚ်မ်
Photo – Social Media