တနၚ်သဳ၊ အေဗရာ ၂၅
အပ္ဍဲရးတနၚ်သဳ ပွိုၚ်ဍုၚ်တနၚ်သဳ အကြာဂၠံၚ်ကွာန်ဗောဓိကာန် ကဵု ကွာန်ညံၚ်ပေၚ်ကွေၚ်တံဂှ် နူကဵုဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်ဂှ်ရ ညးဒေသနူကွာန် ၁၀ ကွာန်တံ ဒးဂြိပ်ပါဲမံၚ်ဘဲပၞာန်ဂှ် ဂွံတီကေတ် နူဂကောံဇြဟတ်ပၠန်ဂတးတံရ။
စနူဂိတုအေဗရာ ၂၁ တေံတုဲ ဒပ်ကဝ်မယှေန်ပၞာန် မၞုံဇြဟတ် ၜိုတ်ကရပ် ၂၀၀ တံ ဍိုက်လုပ်ကၠုၚ်ကဵုဇြဟတ် ထပက်ကၠုၚ်ကရောၚ်ပၞာန် အကြာဂၠံၚ်ကွာန်ဗောဓိကာန်- ကွာန်ညံၚ်ပေၚ်ကွေၚ် တံတုဲ ညးဒေသနူကွာန်တံ ဒစးဒုၚ် ဒးဂြိပ်ပါဲမံၚ်ဘဲပၞာန်ရောၚ်။
အတိုၚ်ဂကောံဇြဟတ်ပၠန်ဂတးတံဟီုမ္ဂး ကရောၚ်ပၞာန်ဒပ်ကဝ်မယှေန်ပၞာန်ဏံဂှ်တှ်ေ နူတမ်ဒပ်ခမရ ၅၆၁ လ္တူဍုၚ်တနၚ်သဳမွဲကဆံၚ် ကရောၚ်ပၞာန်ထပက်ကၠုၚ် ဇရေၚ်ကွာန်ညံၚ်ပေၚ်ကွေၚ်ဂှ်တုဲ ဆက်ကၠုၚ် လ္ပာ်ကွာန် ၅ တိုင်၊ ၆ တိုၚ်တံ မဒှ်ရ။
အပ္ဍဲဂိတုအေဗရာ ၂၂-၂၃ ဂှ်ပၠန် အကြာဒပ်ကဝ်မယှေန်ပၞာန် ကဵု ဒပ်ပံၚ်ကောံဂကောံဇြဟတ်ပၠန်ဂတးတံ ပေါဲဗတိုက်အကြာၜါလ္ပာ် ကတဵုဒှ်လဝ် ကရပ်ကွာန် ၅ တိုင်ကဵု ကွာန် ၆ တိုၚ်တံတုဲ လပါ်ဒပ်ကဝ်မယှေန်ပၞာန်တံ ပရေၚ်ဒးဝပ်နွံမံၚ် ညးတာလျိုၚ် လလောၚ်ပရိုၚ် တမ်ဒပ် ၂ ခရိုၚ်ဗိက် ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ဟိုတ်နူဒပ်ကဝ်မယှေန်ပၞာန် ထပက်ကရောၚ်ပၞာန်ဂှ်ရ ညးဒေသ နူကွာန် ၁၀ ကွာန် မပ္တံကဵု ကွာန် ၅ တိုၚ်၊ ၆ တိုင်၊ သေန်ဂံၚ်၊ ဗာန်လဝ်၊ ဗန်လေၚ်၊ ထုၚ်ထဝ်၊ ကွာန်ကုန်မင်ပြေၚ်တံ ဒးဂြိပ်ပါဲမံၚ် ဘဲပၞာန်အိုတ်တုဲ ညးဒေသ ဒးဒုၚ်ကၟာတ်မံၚ် အပ္ဍဲကွာန်တံဂှ်လေဝ် နွံမံၚ်ဏီရောၚ် သ္ဂးရ။
အခိၚ်ကၠာတေံ ယဝ်ရ ကောန်အရာပ်တံ ဆဵုဂ္ဗဒးကဵုကရောၚ်ပၞာန်မ္ဂး နူကဵုဒပ်ကဝ်မယှေန်ပၞာန်တံ ရပ်မံၚ်ကီုလေဝ် အခိၚ်လၟုဟ်ဏံ ပရေၚ်ရပ်စပ်တံဟၟဲသၟးဟွံက ယဝ်ကောန်ကွာန်တံ ကၟာတ်ဆိုအ်မံၚ်မ္ဂး ဟွံကဵုတိတ်မ္ၚး ကဵုအောပ်မံၚ်အပ္ဍဲသ္ၚိဇကုရောၚ် သ္ဂးရ။
ဟိုတ်ဂှ်ရ အပ္ဍဲပွိုၚ်ဍုၚ်တနၚ်သဳ အကြာဂၠံၚ်ကွာန်ဗောဓိကာန်ကဵု ကွာန်ညံၚ်ပေၚ်ကွေၚ်တံမ္ဂး ပြဟ်ဟ်ဏံ ဟိုတ်နူအကာဲအရာ ပေါဲဗတိုက်ဒှ်မံၚ်တုဲ ဂၠံၚ်လပါ်တံဏံဂှ် လ္ပသုၚ်စောဲညိ ညံၚ်ဂွံဒစးဒုၚ်ပြံၚ်တိတ်အာ ဒၞာဲဗၠးဘဲတံဂှ် နူကဵုတမ်ဒပ် လၟိဟ် (၂) ခရိုၚ်ဗိက် အပ္ဍဲဂိတုအေဗရာ ၂၂ ဂှ် ပတိတ်လဝ်လိက်ရ။
ပရိုၚ် – သြၚ်လောန်တိုၚ်မ်
Photo – CJ