တယိတ်ချံၚ်၊ အံက်တဝ်ဗာ (၃၀)
ပ္ဍဲကွာန်ဂမၠိုၚ် နူပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳတံဂှ် ပ္ဍဲဂိတုအံက်တဝ်ဗာ (၂၉) စနူအခိၚ်ပယျာံဂယး ပြဟ်ဟ်ဂှ်တုဲ ဒပ်ကံၚ်ဇြဳပၞာန်တံ ဗက်ဂၠိုက်ဂၠါဲစၟဳစၟတ်ကၠုၚ်ဒၟံၚ်စေအ်အ်ရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ဇြဟတ်ဗၞတ် (၇၀) မၞုံဂှ်ဝွံ လုပ်စိုပ်ကၠုၚ် အပ္ဍဲကၠအ်ထၜိုတ် ကေုာံ ပ္ဍဲဒဵုဂြိုပ် နူကွာန်(ကြာအၚ်း) ကေုာံ ကွာန်(ကျောက်လှေကား) တံတုဲ ဆက်ကၠောန်သ္ပဂၠိုက်ဂၠါဲဒၟံၚ်ရ။
ဒပ်ကံၚ်ဇြဳပၞာန် မလုပ်စိုပ်ဂၠိုက်ဂၠါဲဒၟံၚ်တံဝွံ ကော်သၟာန်သၟုက်ဒၟံၚ် ကောန်ကမၠောန်ကၠအ်တံတုဲ ပွမရပ်ဒက်တံ ဟွံမွဲပုဟ်ဂှ် ညးဒေသမွဲတၠ ဟီုရ။
ဟိုတ်နူဒပ်ကံၚ်ဇြဳပၞာန် လုပ်စိုပ်ကၠုၚ်ဂှ်ရ ညးဒေသ မကၠောန်ဒၟံၚ်ကမၠောန် ပ္ဍဲကၠအ်ထၜိုတ်တံကဵု ပ္ဍဲကၠအ်တဵုလွဳတံဂှ်ဝွံ လကိုတ်တ္ၚဵုဂွိၚ်ဂွါဲကၠုၚ်ဂှ်ရ ဒေါအ်ဇူထောံ ကမၠောန်တံအိုတ်တုဲ ဒးမၚ်ကျောဝ်ဒၟံၚ် အကာဲအရာ နူကဵုသ္ၚိဌာန်တံရဂှ် သ္ဂးရ။
ဒပ်ကံၚ်ဇြဳပၞာန်ဂှ် ပွမလုပ်စိုပ်ကၠုၚ်သာ်ဏံဂှ်ဝွံ ဒဒှ်ရသွက်ဂွံကၠုၚ်ဂၠါဲ ရဲဂြိပ်ပၞာန်တံရောၚ် ထ္ၜးလဝ်ဟိုတ်ကီုလေဝ် ညးဒေသတံ ဂွိၚ်ဒၟံၚ် ဖေက်ဒှ်ပေါဲဗ္တိုက်ဆေၚ်မုက်ကဵု ဂကောံဒပ်စဵုဒၞါညးဍုၚ်ကွာန်တံရ။
တုဲကၠုၚ် ဂိတုအံက်တဝ်ဗာ (၂၂) တေံဂှ်လေဝ် ဒပ်ကံၚ်ဇြဳပၞာန် ဇြဟတ်ဗၞတ် (၁၀၀) မလုပ်စိုပ်ကၠုၚ် လ္ပာ်ကွာန် (အောက်သရက်ချောၚ်း) တံဂှ်ဝွံ လုပ်စိုပ်ဖျေံလဝ်ဒပ် ပ္ဍဲကွာန်ပွဳပွူ ဗ္ဒါဲဗ္ဒါဲတံဂှ်ကီုရ။
ပ္ဍဲရးတၞၚ်သဳဂှ် ကြဴနူဒပ်ပၞာန်သီအဝဵုတုဲ အကြာဒပ်ကံၚ်ဇြဳပၞာန်ကဵု ဒပ်စဵုဒၞါညးဒေသတံဂှ် လၟိဟ်ပေါဲဗ္တိုက်ၜါလ္ပာ် ဟွံအောန်နူကဵု (၄၀၀) ဝါ က္တဵုဒှ်လဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)