မုဟ်ဍုၚ်၊ ဂျူလာၚ် ၇
အပ္ဍဲတွဵုရးမန် ဍုၚ်မုဟ်ဍုၚ် ဒၞာဲဥယျာန်ကၟာသာယာ စွံပတန်လဝ်ရုပ်ဓရိုတ်သ္ကိုပ်ပၞာန်အံၚ်သာန်ဂှ် ဒပ်ပၞာန်ပြံၚ်လဝ်ဗီုပြၚ်အလဵုအသဳတွဵုရးမန် ပါဲပတိတ်ထောံယျရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ်ဂိတုဂျောန် ၂၉ ၜိုတ်အခိၚ်သဝ်တ္ၚဲဂှ် ကောန်ရဲတဝ်သွာ ဒပ်ပၞာန်ပြံၚ်လဝ်ဗီုပြၚ်အလဵုအသဳတံ စကာဇြဟတ်ပရေၚ်ဂီုကၠီု ဗွဲမဂၠိုၚ်တုဲ ပါဲပတိတ်ထောံ ရုပ်ဓရိုတ်သ္ကိုပ်ပၞာန်အံၚ်သာန်ရဂှ် ဂွံတီကေတ်ရ။
ကောန်ရဲတဝ်သွာ ဒပ်ပၞာန်ပြံၚ်လဝ်ဗီုပြၚ်အလဵုအသဳတံ ကၠုၚ်ပါဲပလှ်ပတိတ်ထောံ ရုပ်ဓရိုတ်သ္ကိုပ်ပၞာန် အခိၚ်ဗ္တံတုဲ တြးလဝ်ပရိုၚ်ဂှ်တှ်ေ ရုပ်ဓရိုတ်သ္ကိုပ်ပၞာန်ဒးဒုၚ်ကၠတ်ဏာလဝ်ရောၚ် သ္ဂးလဝ်ရ။ ဟိုတ်နူပါဲပတိတ်ထောံ ရုပ်ဓရိုတ်သ္ကိုပ်ပၞာန်ဏံတုဲ ကောန်ဗွဲကြဴ စဴဗွဲဂတတံ ဝိုတ်အာသ္ကိုပ်ပၞာန်မာန်ရောၚ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ပ္ဍဲအခိၚ်ဗ္တံ ဍေံတံကၠုၚ်ပလှ်ပတိတ်ဏာလဝ် ဟီုမံၚ်အိုတ်ရ၊ ဆဂး ဍေံတံတြးလဝ်ပရိုၚ်ဂှ် ရုပ်ဓရိုတ် ဒးဒုၚ်ကၠတ်ဏာယျ၊ ဍေံတံတြးလဝ်ပရိုၚ် ဗီုတံဏံ၊ ပရေၚ်ထံဏံဂှ် ပိုဲတံဒးဟီုမ္ဂး အခိၚ်စွံလဝ် ရုပ်ဓရိုတ်သ္ကိုပ်ပၞာန်ဂှ်တှ်ေ သွက်သၟတ်တံ ဂွံသ္ပအစာံ စိုတ်ဓါတ်ညးတုဲ စွံလဝ်ရောၚ်၊ လၟုဟ်ဏံဟၟဲမ္ဂး ကောန်ဗွဲကြဴ စဴဗွဲဂတတံ ဝိုတ်အာသ္ကိုပ်ပၞာန်အံၚ်သာန် စဵုကဵုအဆံၚ်ဂှ် ဒှ်အာမာန်ရောၚ်”သာ်ဝွံ သ္ဂးရ။
တုဲပၠန် အလဵုအသဳပၞာန်သီအဝဵုတံနကဵုတင်ရန်တၟအ်နွံနွံ ဗက်ပါဲပတိတ်မံၚ်ရုပ်ဓရိုတ်သ္ကိုပ်ပၞာန်အံၚ်သာန် မအံက်သၠးပွးဂှ်တှ်ေ ပ္ဍဲကဵုပွိုၚ်ဍုၚ်မုဟ်ဍုၚ်ကီုဒေသတၞဟ်တံကီုဂှ် ဒှ်ပရေၚ်ဖအိုတ်ကၠေံဝၚ်ရောၚ် ညးဆက်ဟီုရ။
ပ္ဍဲလက်ထက်အလဵုအသဳ NLD တုဲကၠုၚ်တေံ သၞာံ ၂၀၁၇ ဂိတုဖေဖဝ်ဝါရဳ ၁၃ တ္ၚဲဒှ်မၞိဟ် သ္ကိုပ်ပၞာန်အံၚ်သာန် ပေၚ် ၁၀၂ သၞာံဂှ် စွံလဝ်နဒဒှ်စၟတ်သမ္တီ ရုပ်ဓရိုတ်သ္ကိုပ်ပၞာန်အံၚ်သာန် လ္တူဍုၚ်မုဟ်ဍုၚ်ဂှ်ရောၚ် ဂွံတီကေတ်ရ။
ရုပ်ဓရိုတ်သ္ကိုပ်ပၞာန်အံၚ်သာန် စွံလဝ်လ္တူဍုၚ်မုဟ်ဍုၚ်ဗီုဏံဝွံ နွံသၠုၚ် ၉ ပေ၊ လျိုၚ်ဓရိုတ် ၃၃၀ ပသာတုဲ၊ ပ္ဍဲအခိၚ်ကာလတေံမ္ဂး ဒုၚ်ဖအိုတ်လဝ်ၚုဟ်မးသြန်ဒကေဝ် ပွဳပွူ ၁၅၀ ကိုတ်တုဲ ကၠောန်ဗဒှ်လဝ်ရောၚ်။
မွဲလပါ်ပၠန် အပ္ဍဲပွိုၚ်ဍုၚ်ဗွဲမဂၠိုၚ် ဒက်စွံလဝ်ရုပ်ပတောအ်သ္ကိုပ်ပၞာန်အံၚ်သာန် လက်ထက်အလဵုအသဳ NLD တံဂှ် ဒပ်ပၞာန်ပြံၚ်ဗီုပြၚ်အလဵုအသဳတံ ဗက်ပါဲပလှ်ပတိတ်ၚးတးအာမံၚ်အဆက်က်ရောၚ်။
ပရိုၚ် – သြၚ်လောန်တိုၚ်မ်
Photo – CJ