ဗေကျေန်၊ ဂျူလာၚ် ၇
ကြဴနူမဳဒဳယာဍုၚ်တံ ချူထမံက်လဝ် ဒဒှ်ရနူကဵုၜၚ်ဗၠိုပ်ဍာ်နျူကလဳယျာ ဒပ်ပၞာန်ကြုက်မွဲမ စမ်ၜတ်ပန်လဝ် ကမ်သၠောဝ်မွဲမ ပ္ဍဲဗလးၜဳပသိဖိတ် ပ္ဍဲဂျူလာၚ် ၆ ဂှ်တုဲ ပရေၚ်ပါ်ပါဲတံကီု ပရေၚ်ဒှ်ဒွိၚ်ကီု အပ္ဍဲဍုၚ်ဇြဟတ်ဇၞော်အပ္ဍဲဒေသ ဂျပါန်၊ အဝ်သတေလျ ကေုာံ နယူဇြဳလာန် တံ မံက်ကၠုၚ်ရ။
နူၜၚ်ဗၠိုပ်ဍာ်နျူကလဳယျာ ဒပ်ဍာ်ဒပ်ပၞာန်ဗၠးၜးညးဍုၚ်ကွာန်မွဲမ ပန်ဗလးဏာ ကမ်သၠောဝ်စုတ်လဝ်က္ဍိုပ်ပတောအ်မွဲမ ပတဝ်ဏာလပါ်ဗလးၜဳဂၠးကဝ် ပ္ဍဲပသိဖိတ် ပ္ဍဲအခိၚ်ဒေသ ၁၂ နာဍဳ ၁ မိနေတ်ဂှ်ရောၚ် ဌာနပရိုၚ်သေၚ်ဟွာ ချူထမံက်လဝ်ရ။
ကမ်သၠောဝ်ဏံ လှောဝ်စှ်ေအာ ပ္ဍဲဗလးၜဳ အတိုၚ်စၟတ်ပိုၚ်ခြာလဝ်ရောၚ် ပ္ဍဲပရိုၚ်သေၚ်ဟွာ ချူထမံက်လဝ်ကီုလေဝ်၊ စပ်ကဵုဒၞာဲဝါဲ ချိုတ်တ်ပၠိုတ်တ်တုဲ တၚ်နၚ်တၞဟ်ဟ်တံဂှ် ချူထမံက်လဝ် ဟၟဲပုဟ်။
ပရေၚ်စမ်ၜတ်စၟဳစၟတ်ပန်လဝ်ဏံဂှ် ဒှ်ကိုန်အစဳဇန်လၟေၚ်ဍာံ ပရေၚ်ခန်ဗ္တောန်ပၞာန်ဗီုပြၚ်ဇၟာပ်သၞာံ နူကဵုဍုၚ်ကြုက်ရောၚ် ချူထမံက်လဝ်တုဲ၊ ရန်တၟအ် သွက်ဂွံဗတိုက် ဟွံသေၚ်မ္ဂး သ္ပပွန်ဒၞာဲ ကုဍုၚ်လဵုမွဲလေဝ် ဟွံသေၚ်ရောၚ် ဟီုလဴကဵုလဝ်ရ။
စပ်ကဵုပရေၚ်ကိုန်အစဳဇန် ရန်လဝ်သွက်ဂွံစမ်ၜတ်ပန်ဏာဗီုဏံဂှ် နူကဵုဍုၚ်ကြုက် ကဵုသမ္တီလဴလဝ် ကုအလဵုအသဳပိုဲတံရောၚ် ဝန်ဇၞော်ပရေၚ်ဍုၚ်သအာၚ်အဝ်သတေလျ ပါန်နံဝေါင် ဟီုရ။
ဆဂး ပရေၚ်ပန်စမ်ၜတ်လွဟ် ဍုၚ်ကြုက်ပြဟ်ဟ်ဏံဂှ် ပရေၚ်ဟွံညိၚ်ဝပ် သွက်ဒေသဒှ်အာမာန်ရောၚ် ညးဟီုရ။
ပရေၚ်ပန်လွဟ်ဗီုဏံဂှ် ပရေၚ်ဒက်ပ္တန်ဇြဟတ်ပၞာန်ကြုက် ဗွဲမပြဟ်ပြေဟ် ဒှ်မွဲသ္ကုတ်မွဲသ္ကူတုဲ ပရေၚ်ကၠးကၠးမးမးဟၟဲပုဟ် ဝန်ဇၞော်ပရေၚ်ဍုၚ်သအာၚ် ဝေါင် ဟီုလဴကဵု ပ္ဍဲပေါဲသှ်ပရိုၚ် ကၠောန်ဗဒှ်လဝ် ပ္ဍဲဍုၚ်သူဗာ ဍုၚ်ဇၞော်မဟာဖဳဂျဳ ရ။
အလဵုအသဳဂျပါန်လေဝ် ဂွံဒုၚ်တဲတၚ်ကဵုသမ္တီ စပ်ကဵုပရေၚ်ပန်စမ်ၜတ်ကမ်သၠောဝ်ဏံဂှ်တုဲ သွက်ဂွံကလေၚ်ချပ်ဗ္စာညိဂှ် ဗတိုက်ဖအောဝ်လဝ် ဍုၚ်ကြုက်ရောၚ် သ္ဂးရ။
စပ်ကဵု ပရေၚ်ချဳဒရာၚ်ပၞာန်ကြုက် ပဵုဂၠိုၚ်တိုန်ကၠုၚ်မံၚ်ဂှ် ပရေၚ်ဒှ်ဒွိၚ် ဇၞော်ကဵုဇြဟတ်နွံမံၚ်ဂှ် ဇကုတံပတိုန်ထ္ၜးလဝ်ရောၚ် အလဵုအသဳတိုကျို ဟီုရ။
ကမ်သၠောဝ်ဍုၚ်ကြုက် ပန်ဗလးဏာလဝ်ဂှ် ဒတုံစှ်ေဒးအာ လပါ်မ္ၚးဇြုမ်ပရေၚ်ပိုန်ဒြပ်တၟေၚ်ဂျပါန်ဂှ် ဌာနပရိုၚ်ကျိုဒို ချူထမံက်လဝ် ပ္ဍဲဂျူလာၚ် ၆ ရ။
ဟိုတ်နူပရေၚ်စမ်ၜတ်သာ်ဏံဂှ် ပရေၚ်ဒှ်ဒွိၚ် သွက်ဍုၚ်ပိုဲတံ ဇၞော်ကဵုဇြဟတ်နွံမံၚ်တုဲ ကၠာဟွံဂွံပန် အခိၚ်ဗၞတ်နာဍဳညိညကြပ်ဂှ်မှ ကဵုကၠုၚ်ပရိုၚ် ကုပိုဲတံရောၚ် ဝန်ဇၞော်ပရေၚ်ဍုၚ်သအာၚ်နယူဇြဳလာန် ဝင်စတန် ပဳတာ ဟီုရ။
ပရေၚ်စမ်ၜတ်ကမ်သၠောဝ်ဗဇဵု ထိၚ်သၞေဝ်ဍုၚ်ကြုက်ဂှ် ပ္ဍဲသၞာံ ၂၀၂၄ တေံလေဝ် ကေၚ်စမ်ၜတ်လဝ်တုဲ သီုသၠုၚ်ပတိုန်မံၚ်ဇြဟတ်ပၞာန် ဗွဲမပြဟ်ပြေဟ်ရောၚ်။
Ref:Reuters