မတ်မလီု၊ ဂျူလာၚ် ၇
အပ္ဍဲတွဵုရးမန် ပွိုၚ်ဍုၚ်ပံၚ်ကဵု ပွိုၚ်ဍုၚ်မတ်မလီုတံဂှ် ဟိုတ်နူလဗိုတ်ကျာပိုက်ထတ်အာတုဲ သ္ၚိဌာန်ကဵုစမြိုၚ်ဒၞာဲ ပွဳပွူ ၁၀၀ မ လီုလာ်အာလဝ်နွံရောၚ် ဂွံတီကေတ် နူညးဒေသတံကဵု ဂကောံဟံၚ်ပြာ်ရီုဗၚ်ပရေၚ်မှာဇန်တံရ။
ပ္ဍဲဂိတုဂျူလာၚ် ၅ အခိၚ်ဗ္တံၜိုတ် ၇ နာဍဳဂှ် ပ္ဍဲအရာပ်ဂတာ (သ္ကုတ်အရာပ်ဍုၚ်တၟိ) ကေုာံ အရာပ်ဂဒုၚ်သှ်ေ ပွိုၚ်ဍုၚ်ပံၚ် ဗြဲရပ်ဂူလဗိုတ်ကျာပိုက်ထတ်ဇၞော်ကဵုဇြဟတ် က္တဵုဒှ်လဝ်ရောၚ်။
ဟိုတ်နူလဗိုတ်ကျာပိုက်ထတ်တုဲ စမြိုၚ်ဒၞာဲ ဟွံအောန်နူ ၇၅ မ သီုကဵုရုၚ်ဌာနနာနာ၊ ဘာဗတောန်လိက်၊ ဘာလကျာ် ကေုာံသ္ၚိဌာန်တံ ကၟဳဟလိုက်ထောၚ်စာ်လီုလာ်အာလဝ် က္တဵုဒှ်ဗွဲမဂၠိုၚ်ရ။
တုဲပၠန် အပ္ဍဲလဗိုတ်ကျာပိုက်ထတ်အာဂှ် သၚ်နူကဵုဍုၚ်ပံၚ် ဘာသ္ကိုပ်ဍုၚ်ဂှ် ခမဳသၚ်အာယုက် ၅၀ ပြၚ် ၜါဇကုတံလေဝ်ဒးဝပ်အာတုဲ တိုၚ်ဓါတ်လလဳကဵုတိုၚ်ဖုၚ်ဗွဲမဂၠိုၚ်တံလေဝ် ဒေါမ်စှ်ေလီုလာ်အာလဝ်ကီုရောၚ်။
တုပ်သာ်ဂှ်ကီု ပ္ဍဲဂိတုဂျူလာၚ် ၆ အခိၚ်နူဂယးပြဟ်ၜိုတ် ၄ နာဍဳ ဂှ်လေဝ် ပ္ဍဲအရာပ်သၞေဟ်ညံၚ်ပေန်သိက် ဍုၚ်မတ်မလီုဂှ် လဗိုတ်ကျာပိုက်ထတ်တုဲ သ္ၚိဌာန် ၁၆ မပြၚ် လီုလာ်အာလဝ်ကီုရ။
သွက်ရဲညးဍုၚ်ကွာန် ဒးဒုၚ်ဘဲကျာတံဂှ် ဒးကဵုပြံၚ်မံၚ်ဒၟံၚ် ဒၞာဲသ္ၚိမသကလောကောဒေံညးတံ မွဲခဏတုဲ ပြဟ်ဟ်ဏံမ္ဂး အထံက်ပၚ်ပရေၚ်ဓရ်ဗ္စာရဏာမၞိဟ်တံဂှ် နွံမံၚ်ပၟိက်ကွေံကွေံရောၚ် ဂကောံဟံၚ်ပြာ်ရီုဗၚ်မှာဇန်တံ ဟီုရ။
ဟိုတ်နူအသိၚ်လဗိုတ်ကျာဍောတ်တ် လုပ်ကၠုၚ်နူအိန္ဒိယနွံတုဲ အပ္ဍဲသတ္တဟဂတဏံမ္ဂး တွဵုရးမန်ကီု သီု ၁၂ တွဵုရးတံဂှ် ဒးစွံအာသတိ ပရေၚ်ဗြဲရပ်ဂူကျာပိုက်ထတ်တ်ဒှ်မာန်ရောၚ် နူဌာနစၞောန်ပ္ညုၚ် ဗြဲကျာဇလဗေဒ ကဵုလဝ်သမ္တီနွံရ။
ပရိုၚ် – သြၚ်လောန်တိုၚ်မ်
Photo – CJ