ဘာအၚ်၊ ဂျူလာၚ် ၇
သွက်ဂွံကေမ်ဇျှာပ်လဝ်အဝဵု နကဵုဂၠံၚ်ဍာန်ပရေၚ်အုပ်ဓုပ်နဲအဓ္ဓမတံမ္ဂး ဖန်ဗဒှ်ကဵု ပရေၚ်ၜိုဟ်လလမ်ကၟိန်ဍုၚ်ဟွံမာန်တုဲ၊ ပရေၚ်ဖောအ်ဗြဳတောတက်လေဝ်ဒှ်ကၠုၚ်ဟွံသေၚ်ပုဟ် ဥက္ကဌဗဟဵု ဗော်သွးကောန်ဂကူကရေၚ် (KNU) ပဒိုသဝ်ဂွါထူဝေန် ဟီုရ။
အပ္ဍဲကဵုတ္ၚဲဒပ်ပၞာန်ဗၠးၜးကောန်ဂကူကရေၚ် ပေၚ်စိုပ် ၇၇ သၞာံ ဂိတုဂျူလာၚ်ဏံဂှ် ဥက္ကဌ KNU ပဒို သဝ်ဂွါထူဝေန် ပလံၚ်ဗ္စိုပ်လိက်သဝဏ်တုဲ ထပ်ဗပေၚ်ဟီုလဴစုတ်လဝ် ဗီုဏံရောၚ်။
သၞောတ်တၠအဝဵုပၞာန်ကဵု ပရေၚ်အုပ်ဓုပ်တၠအဝဵုညံၚ်ဂွံအိုတ်ကၠက်အာဂှ် သုၚ်စောဲနဲကဲနာနာတုဲ ဒးဒစဵုဒစးအာရောၚ် ပဒိုသဝ်ဂွါထူဝေန် သ္ဂးလဝ်ရ။
တုဲပၠန် သွက်ဂွံကလေၚ်ဒက်ပ္တန် ပရေၚ်ဍုၚ်ကွာန်နွံကဵုဗဗွဲဓဝ်၊ ပရေၚ်ၜိုဟ်လလမ်ဍုၚ်ကေုာံ ပရေၚ်ဖောအ်ဗြဳတောတက်တံဂှ် ဂကောံပၠန်ဂတးဒုၚ်သ္ဇိုၚ်ပရေၚ်ကောန်ဂကူတံကီု၊ ဂကောံပရေၚ်ဍုၚ်ကွာန်တံကဵု ဂကောံသ္ဇိုၚ်မှာဇန် ဒုၚ်တဝ်စၞေဟ်ဒစဵုဒစးမံၚ်တၠအဝဵုပၞာန်တံသီုဖအိုတ် ဒးတံၚ်တဲညးသ္ကံတုဲ ပံၚ်တောဲဗတိုက်သၠေက်သၞောတ်တၠအဝဵုပၞာန်ရောၚ် သ္ဂးရ။
သွက်သၞောတ်တၠအဝဵုပၞာန်ဂွံအိုတ်ကၠက်အာမာန် ကောန်ဂကူကရေၚ်အလုံညးဍုၚ်ကွာန် လုပ်မံၚ်ပေါဲဗတိုက်တံဂှ် ဒှ်အရာချူခၞံမံၚ် ဝၚ်ကောန်ဂကူဇကု၊ ဝၚ်ကၟိန်ဍုၚ်ပံၚ်ကောံသၟးဟွံကတုဲ၊ သီုကဵုဇိုန်ဏှၚ် အာပ်ပြာပ်မံၚ်ကဵု အာဲတၟာဲဝၚ် တင်စၟဳစသွက်အခေါၚ်သၠးၜး၊ ပရေၚ်ၜိုဟ်လလမ်ကေုာံ ပရေၚ်ဖောအ်ဗြဳတောတက် သွက်သၟတ်အနာဂတ်တံရောၚ် ဥက္ကဌ KNU ဟီုရ။
ဂကောံပၠန်ဂတးမံၚ်သၞောတ်တၠအဝဵုပၞာန်တံကီု သီုကဵုဂကောံဒစဵုဒစးသၞောတ်တၠအဝဵုပၞာန် သီုဖအိုတ်တံလေဝ် ဒးပံၚ်တောဲရေၚ်တၠုၚ်အာပရေၚ်ပၞာန်မွဲစွံရောၚ် ပဒိုသဝ်ဂွါထူဝေန် ကဵုလဝ်သတိကီုရ။
သွက်အဝဵု ဂကောံပၞာန်ဍေံတံဂွံတန်ကြန်ကီု သွက်ဂွံဂွံပရေၚ်စၟတ်သမ္တီနူဂၠးကဝ်တံကီု ဂကောံပၞာန်တံ လွဳဂစာန်မံၚ်လၟိုန်န်တုဲ၊ သုၚ်စောဲနဲကဲဗျူဟာလွဟ် အဆံၚ်သၠုၚ်အိုတ်ခိုဟ်အိုတ်တုဲ ပလေဝ်စလဝ်ပရေၚ်ပၞာန်ကီု ပါဲနူဂှ် ပေါဲဗတိုက်ပရေၚ်အမာတ်ကလုတ်၊ ပေါဲဗတိုက်ပရေၚ်ဍုၚ်ကွာန်တံဂှ်လေဝ် ဂစာန်ကၠောန်မံၚ် ဇၞော်ကဵုဇြဟတ်ရောၚ် ပ္ဍဲလိက်သဝဏ် ပဒိုသဝ်ဂွါထူဝေန် ဟီုလဝ်ရ။
ပရိုၚ် – သြၚ်လောန်တိုၚ်မ်
Photo – KNU