ကျာ်ထဝ်၊ အဝ်ဂတ် ၂၉
အပ္ဍဲတွဵုရးမန် ပွိုၚ်ဍုၚ်ကျာ်ထဝ် ကွာန်ခလောန်ဂှ် အကြာမွဲၜါတ္ၚဲတုဲကၠုၚ်ဏံ ဒပ်ပၞာန်ဗမာလုပ်ပန်သလိပ်လဝ် ဒၞာဲရုၚ်ခြိုၚ်စွံကပေါတ်တိတ်နူသေံတံတုဲ သီကေတ်ဏာကပေါတ်ဗၞိက်ဗွဲမဂၠိုၚ်နွံရဂှ် ညးဒေသတံ ဟီုလဴကဵု ဌာန်ပရိုၚ် သြၚ်လောန်တိုၚ်မ်ရ။
အပ္ဍဲဂိတုအဝ်ဂတ် ၂၆ လောန်ကၠုၚ်တေံ ဒပ်ပၞာန်သီအဝဵုတံ နကဵုဇြဟတ်ဗွဲမဂၠိုၚ်လုပ်ပန်သလိပ် ဒၞာဲရုၚ်ခြိုၚ်စွံလဝ်ကပေါတ်သေံမွဲဒၞာဲ နွံမံၚ်ပ္ဍဲကွာန်ခလောန်ဂှ်တုဲ သီကေတ်ဏာကပေါတ်ကၠုၚ်နူသေံ နွံၚုဟ်မး ကိုတ်ၜါလက် (၂၀၀၀၀) ပြၚ်မံၚ်ရောၚ်။
အပ္ဍဲဂိတုအဝ်ဂတ် ၂၇ တေံဂှ်လေဝ် ပ္ဍဲကွာန်ခလောန် ဒပ်ပၞာန်ဗမာ ထပ်လုပ်ပန်သလိပ်လဝ် ဒၞာဲရုၚ်ခြိုၚ်စွံကပေါတ်သေံ ဥူညဳမေန် ပိုၚ်ပြဳလဝ်ဂှ်တုဲ သီဂွံဏာကပေါတ်တိတ်နူသေံ နွံၚုဟ်မး ကိုတ်မွဲလက် (၁၀၀၀၀) ပြၚ် မဒှ်ရောၚ်။
ကပေါတ်ကၠုၚ်နူသေံ ဒးဒုၚ်ရပ်သီကေတ်ဏာတံဂှ်တှ်ေ မဒှ်ကပေါတ်အပဵုကွဳစက်၊ ကပေါတ်ဆက်စပ်ကဵုဖုၚ်၊ ပါဲနူဂှ်ပၠန် ကပေါတ် ဓာတ်လလဳ၊ ကပေါတ်မၞိဟ်ရပ်စကာသုာ်စောဲကေုာံ စၞစသုၚ်သ္ဇိုၚ်တံပါလုပ်မံၚ်ရောၚ် သ္ဂးရ။
အတိုၚ်ရဲကြပ်ကဵုဒပ်ပၞာန်တံ ဟီုလဴမ္ဂး ကပေါတ်တိတ်နူသေံလ္ၚဵုသီကေတ်ဂွံလဝ်တံဂှ် ကၠေံအာအကြာဂၠံၚ်လေဝ်နွံတုဲ ကပေါတ်ဗွဲမဂၠိုၚ်ဂှ်တှ်ေ ပလံၚ်စွံလဝ်ပ္ဍဲကဵုတမ်ဒပ် ဖျေံသ္ဇိုၚ်ဍုၚ်ကျာ်ထဝ်ရောၚ် ဂွံတီရ။
ပရေၚ်ဒပ်ပၞာန်ဗမာ လုပ်ပန်သလိပ် ဒၞာဲရုၚ်ခြိုၚ်စွံလဝ်ကပေါတ်သေံတံဏံဂှ် အတိုၚ်သ္ဂုတ်သွာတ်ဂကောံတၟေၚ် ဗတိုက်ပလီု ပရေၚ်ကူသာန်ဗၞိက်ဟွံလုပ်သၞောဝ် အလဵုအသဳပၞာန်ပြံၚ်လဝ်ဗီုပြၚ်တွဵုရးမန် ကၠောန်လဝ်ကောံဓရီု ပ္ဍဲဂိတုအဝ်ဂတ် ၂၆ ဂှ်ရောၚ် သ္ဂးရ။
ထ္ၜးဟိုတ် ကပေါတ်ဟွံလုပ်သၞောဝ်ဂးတုဲ အလဵုအသဳပၞာန်ပြံၚ်လဝ် ဗီုပြၚ် ဟိုတ်နူရပ်ဒၟံၚ်ကပေါတ်တိတ်နူသေံ တံဂှ်ရ ညးဍုၚ်ကွာန်တံ ဒးရာန်စကာဒၟံၚ်ကပေါတ်နူသေံ နကဵုၚုဟ်သၠုၚ်ၚ် ဟွံတန်ကဵုဆ ဒှ်မံၚ်ရောၚ်။
မွဲလပါ်တေံပၠန်မ္ဂး ဒပ်ပၞာန်ကဵုညးဇၞော်သ္ကိုပ်ဌာနတံဂှ် နအလဵုဇကုညးတံပါလုပ်ဒၟံၚ် ပ္ဍဲကဵုပရေၚ်ကူသာန်ဗၞိက် ဟွံလုပ်သၞောဝ်တံကီု နူကဵုပရေၚ်ကူသာန်ဗၞိက်ဟွံလုပ်သၞောဝ်တံဂှ် ကလိဂွံမံၚ်သြန်လၟေၚ်ၚ်ဂိတု နကဵုကိုတ်လ္ၚီပြၚ်နွံရောၚ်။
ပရိုၚ် – သြၚ်လောန်တိုၚ်မ်
Photo – MOI