မတ်မလီု၊ အဝ်ဂတ် ၂၉
အပ္ဍဲတွဵုရးမန် လက်ထက်အလဵုအသဳပၞာန်သီအဝဵုပြံၚ်လဝ်ဗီုပြၚ် အပ္ဍဲပွိုၚ်ကာလ ၄ ဂိတုပြၚ်ဏံမ္ဂး ပရေၚ်အုပ်လဒမ်သၞောဝ်ဓဝ်ဥပဒေ ယအ်စှ်ေကၠုၚ်တုဲ ပရေၚ်ဂီုကၠီုတံလေဝ် ပဵုတုဲကၠေံဗ္ဒန်သုံဂြာံစှ်ေအာမံၚ်ရောၚ်ဂှ် ညးဒေသတံ ဟီုလဴကဵု ဌာန်ပရိုၚ် သြၚ်လောန်တိုၚ်မ်ရ။
ဟိုတ်နူ ပရေၚ်အုပ်လဒမ်သၞောဝ်ဓဝ်ဥပဒေဟၟဲဂှ်ရ ဒှ်ကၠုၚ်ပရေၚ်ဗီုတံဏံတုဲ ဂိတုအဝ်ဂတ် ၂၈ ဂှ် အပ္ဍဲဆေင်သွံကပေါတ်ဓါတ်လလဳ ကိုကိုညဳညဳ နွံမံၚ်လ္တူ မဟာဍုၚ်ဇၞော်မတ်မလီုဂှ် ရဲရပ်လွဟ် ၃ တၠတံ လုပ်ပၠံၚ်ဗတိုက်ဏာတုဲ ကေတ်ဏာသီုကဵုကဠာ ဒုၚ်ပၟတ်ကီုရောၚ်။
တုဲပၠန် ပ္ဍဲဂိတုအဝ်ဂတ် ၂၅ လောန်ကၠုၚ်တေံလေဝ် ပ္ဍဲဍုၚ်လၟိုၚ် မၞိဟ်တြုံမွဲတၠ ထ္ၜးသေနာတ်ပေတ်သတဝ် ပၠံၚ်ဒဳဟရိပ်ဏာ ကွဳစက်မွဲမ ကေၚ်ဒှ်ကၠုၚ်လဝ်နွံတုဲ ပရူပရာဂစိုတ်မၞိဟ် ပရေၚ်ပၠံၚ်ၜး ကွဳလိုန်ဓါတ်တၞဟ်ဟ်တံလေဝ် က္တဵုဒှ်မံၚ်မွဲဏှမွဲဏှကီုရ။
ဒၞာဲလ္တူဍုၚ်ဇၞော် အလဵုအသဳပၞာန်ပြံၚ်လဝ်ဗီုပြၚ် ထိၚ်ချုက်ဂွံလဝ်ပေၚ်ၚ်တံဂှ် စနူကဵု ပရေၚ်အုပ်လဒမ်သၞောဝ်ဓဝ်ဥပဒေ ဟၟဲကၠုၚ်မံၚ်တုဲ လတူပရေၚ်ဂီုကၠီု ကၠေံဗ္ဒန်သုံဂြာံစှ်ေအာမံၚ်တံဂှ် အကြာညးဒေသတံ ပရေၚ်ဒှ်ဒဝိၚ်ဂွိၚ်ဖေက်တံ သၠုၚ်တိုန်မံၚ် မဒှ်ရ။
အခိၚ်ကၠာတေံ ဟိုတ်နူဒပ်ဗၠာဲသၟိၚ် ဒပ်ပၞာန်တံနွံတုဲ ဗၠးကၠုၚ်လဝ်နူဘဲ ဒမၠရဲပၠံၚ်ၜးတံကီုလေဝ် လၟုဟ်ဏံ သွက်ဂွံပတေဟ်စဍေံတံဟွံမွဲတုဲ ပရေၚ်ဒးဒှ်မံၚ်ဒဝိၚ်ဖေက်လကိုတ်တံ ပဵုတုဲဂၠိုၚ်တိုန်ကၠုၚ်မံၚ်ရောၚ်ဂှ် ညးဒေသမွဲတၠ ဟီုလဴကဵု ဌာန်ပရိုၚ်-သြၚ်လောန်တိုၚ်မ်ရ။
“အခိၚ်ဗ္တံသဝ်တ္ၚဲတံတှ်ေ ယဝ်ရနွံမံၚ်မွဲတၠဓဝ်မ္ဂး ပရေၚ်ဂီုကၠီုဟၟဲရ၊ ကွေံကွေံဂှ်တှ်ေ အခိၚ်ကၠာတေံ ယဝ်ရနွံဒပ်ဗၠာဲသၟိၚ်တံ ဒပ်ပၞာန်တံနွံမံၚ်မ္ဂး ပိုဲညးမွဲတၠဓဝ်လေဝ် ဟွံဖေက်ပုဟ်၊ ဗၠးၜးမံၚ်နူဘဲဓမၠတံရ၊ လၟုဟ်ဂှ် ဇကုညးတံဂှ် ဒှ်ဒၟံၚ်ဗီုဏံတှ်ေ ညးဍုၚ်ကွာန်တံဂှ် သ္ဂောံပတေဟ်စ ဂွံဗ္ဒဗဒါဲအာ ညးလဵုမွဲရော၊ ညးဍုၚ်ကွာန်ဗွဲမဂၠိုၚ်တှ်ေ ဖေက်မံၚ် ဂွိၚ်မံၚ်တုဲ ပရေၚ်စံၚ်တူဒှ်ဒဝိၚ်တံ ပဵုဂၠိုၚ်တိုန်ကၠုၚ်ရ” သာ်ဝွံ သ္ဂးရ။
တုဲပၠန် အပ္ဍဲဒေသဂှ် ဟိုတ်နူ ပရေၚ်အုပ်လဒမ်သၞောဝ်ဥပဒေကၠေံဗ္ဒန်သုန်ဂြာံမံၚ် ပရေၚ်ဂီုကၠီုဟၟဲတုဲ သွက်သ္ဂောံဂၠာဲစသုၚ်ပရေၚ်ဗုၚ်ဂၞဴဇၟာပ်ပ်တ္ၚဲတံဂှ် ဒှ်ကၠုၚ်အခက်အခုဲ နကဵုစိုတ်ဒဝိၚ် သွက်ပရေၚ်ဂီုကၠီုဇကုတုဲ နကဵုဇကုဇကု ဒးကေတ်လဝ်တာလျိုၚ်ကေတ်တ်ရောၚ် ညးဆက်ဟီုရ။
အပ္ဍဲပရေၚ်ပၠံၚ်ၜးဗတိုက်ရပ်လွဟ် က္တဵုဒှ်ဒၟံၚ်လၟုဟ်တံဂှ် ယဝ်ရ ကလေၚ်ရံၚ်အာမ္ဂး ဒမၠတံရပ်လဝ်သေနာတ်တုဲ မၞိဟ်ဓမ္မတာတံဂှ် ရပ်သေနာတ်မာန်ဟွံသေၚ်ဂှ် ဒှ်အရာပရေၚ်ဒးချပ်မွဲရောၚ် ညးဒေသတံ သ္ဂးရ။
မွဲလပါ်ပၠန် ဒပ်ပၞာန်သၟဝ်အလဵုအသဳပြံၚ်လဝ်ဗီုပြၚ်၊ ဒပ်ဗၠာဲသၟိၚ်၊ ဒပ်မံၚ်ကွာန် သီုကဵုဂကောံပရေၚ်ဂီုကၠီု ညးဍုၚ်ကွာန်ကေုာံ ဂကောံဗတိုက်ပလီုပရေၚ်ပကီုပရာတ်တံဂှ် ၜိုန်ရစၟဳစၟတ်ဒၟံၚ် ဒၞာဲပါၚ်ဂၠံၚ်လုပ်တိတ်ဍုၚ် ပွမမာတ်ဆိုအ်ဂၠိုက်ဂၠာဲမံၚ် အပ္ဍဲဍုၚ်တံကီုလေဝ် ပရေၚ်အုပ်လဒမ်သၞောဝ်ဓဝ်ဥပဒေတံဂှ် ကၠေံဗ္ဒန်သုန်ဂြာံဒၟံၚ် ဖိုဟ်ရောၚ်။
အပ္ဍဲတွဵုရးမန် နူကဵုဒပ်ပၞာန်သီအဝဵု ပြံၚ်လှာဲကၠုၚ်အလဵုအသဳပၞာန်ပြံၚ်လဝ်ဗီုပြၚ်ကီုလေဝ် ပရေၚ်ဒးဒုၚ်ကၠတ်ကွဳလိုန်ဓါတ်၊ ပရေၚ်ပၠံၚ်ဗတိုက်ထ္ၜးလွဟ်၊ ပရေၚ်ဂစိုတ်မၞိဟ်ကၠတ်ပၠံၚ်၊ သီုကဵု ကမၠောန်ဒုစရိုတ်တၞဟ်ဟ်တံလေဝ် က္တဵုဒှ်ဒၟံၚ်ဗီုဏံမွဲဏှမွဲဏှကီုတုဲ လ္တူညးကလိလောန် ကၠောန်လဝ်ဒုဟ်ဗွဲမဂၠိုၚ်တံဂှ် ရပ်ဂွံလဝ်ဟၟဲပုဟ်ဂှ် ညးဒေသတံ ဟီုဂးဒၟံၚ်အိုတ်ရ။
ပရိုၚ် – သြၚ်လောန်တိုၚ်မ်
Photo – MOI