တၞၚ်သဳ၊ အဝ်ဂတ် ၂၉
အပ္ဍဲကဵုရးတၞၚ်သဳ ဍုၚ်မဝ်တံၚ် ဒၞာဲအရာပ်ၝောံဍုၚ်ဂှ် ဟိုတ်နူလိုန်ဒးမါၚ်တုဲ မၞိဟ်တြုံ ၁ တၠ ဇိုၚ်ပိုတ်အာဂှ် ဂွံတီ နူကဵုကောန်ဒပ် PDF ဖျေံလဝ်သ္ဇိုၚ်ဒေသတံ ရ။
ညးလိုန်ဒးမါၚ်ဏံဂှ် မဒှ်မောၚ်ချေတ်လေန်ကိုဝ် အာယုက် ၂၈ သၞာံ မံၚ်အရာပ်ၝောံဍုၚ်ဂှ်တုဲ ဂိတုအဝ်ဂတ် ၂၆ အခိၚ်သဝ်တ္ၚဲ အဃောကၠောန်မံၚ်ကမၠောန် ဒၞာဲကၠဟ်ထၜိုတ်ဗဒါဲအရာပ်ဂှ် လိုန်ဒးအာမါၚ်ရောၚ် သ္ဂးရ။
အခိၚ်အဃောသ္အးဇ္ၚးမံၚ်ချောဲအပ္ဍဲကၠအ် လိုန်ဒးမါၚ်တုဲ မါၚ်ဏံဝွံ ဒှ်မံၚ်မါၚ်သှ်ေၜေတ်နူပေါဲဗတိုက်ဟာ ဟွံသေၚ်မ္ဂး ဒှ်မါၚ်ထပ်ဖျေံလဝ်တၟိဟာဂှ် ဟွံတီဏီပုဟ်ဂှ် ညးတာလျိုၚ် ဂကောံပၠန်ဂတးဒေသမွဲတၠ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူလိုန်ဒးမါၚ်တုဲ ဇိုၚ်လပါ်ပါဲ မောၚ်ချေတ်လေန်ကိုဝ် ပိုတ်အာနူကဵုခဒဟ်ဗြာတ်တုဲ ဒးကုတ်ထောံဇိုၚ် လွဳလွတ်မံၚ်ယဲ ပ္ဍဲဗဒမ်ဂဥုဲကရပ်ဗဒါဲဂှ်ရ။
ကြဴနူလပါ်ဒပ်ပၞာန်သီအဝဵု ကလေၚ်ထိၚ်ချုက်ဂွံအာလဝ်ဍုၚ်မဝ်တံၚ်တုဲဂှ် ညးဒေသတံကလေၚ်စဴကၠုၚ်မံၚ်စံၚ် ပ္ဍဲအရာပ်လတူ ဍုၚ်တံနွံကီုလေဝ် ဗွဲမဂၠိုၚ်ဂှ်တှ်ေ ဟိုတ်နူဂွိၚ်ဖေက်ဒးဘဲလွဟ် သှ်ေဇးမံၚ်နူပေါဲဗတိုက်တံတုဲ ဟွံဂံၚ်ကလေၚ်စဴကၠုၚ်ဏီပုဟ်။
အပ္ဍဲဂိတုနဝ်ဗေမ်ဗာ သၞာံတုဲကၠုၚ်တေံ ဂကောံပံၚ်တောဲ KNLA တံ ဗတိုက်သီကေတ်လဝ် ဍုၚ်မဝ်တံၚ်တုဲ ကြဴနူပွိုၚ် ၆ ဂိတုဂှ်၊ ပ္ဍဲဂိတုမေ သၞာံဏံ ဒပ်ပၞာန်သီအဝဵုတံ ကလေၚ်သီကေတ်လဝ်ပၠန် မဒှ်ရ။
အပ္ဍဲကာလပေါဲဗတိုက်ဝွံ ပွမ ကြဳဗုမ်နူဗလးကျာ၊ ပန်လွဟ်ဇၞော် ကေုာံ ပွမတပ်မါၚ်၊ မါၚ်ဗဇီုတံဂှ် သီုရဲပၞာန်ၜါလပါ်တံ ဖျေံစွံ လဝ်ရောၚ်ဂှ် ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media