မတ်မလီု၊ နဝ်ဝေမ်ဗာ (၃)
ပ္ဍဲတွဵုရးဍုၚ်မန် ကြဴနူဒပ်ပၞာန်သီအဝဵုတုဲဂှ် သီုလ္တူဍုၚ်၊ သီုကွာန်ရးတံဂှ် ပွမသုၚ်စောဲဂဥုဲၜူမာဲတံ သာသၠုၚ်တိုန်ကၠုၚ်ရဂှ် ညးမရေၚ်တၠုၚ်ဒၟံၚ်ကေၚ်ကာ သၟတ် ကေုာံ ဂဥူၜူမာဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပွမသုၚ်စောဲဂဥုဲၜူမာဲတံဝွံ ပ္ဍဲပွိုၚ်ဍုၚ်ရေဝ်၊ ဇြပ်ဗု ကေုာံ ပွိုၚ်ဍုၚ်မုဟ်ဍုၚ်တံဂှ် သၠုၚ်တိုန်ကၠုၚ် တီတီဒှ်ဒှ်တုဲ ပ္ဍဲကဵုပွိုၚ်ဍုၚ် မသှ်ေဒၟံၚ်ဂမၠိုၚ် ပွိုၚ်ဍုၚ်ပံၚ်၊ ၜါသွာၚ်၊ မတ်မလီု၊ ကျာ်မြဟ်၊ ၜဳကလေၚ်၊ သဓီု ကေုာံ ကျာ်မြဟ်တံဂှ်လေဝ် သၠုၚ်တိုန်ကၠုၚ်ကီုရ။
အတိုၚ်လိက်ကပှ်တၚ်နၚ် မကံက်လဝ် အကာဲအရာ ပွမသုၚ်စောဲဂဥုဲၜူမာဲတံဂှ်မ္ဂး ကြဴနူဒပ်ပၞာန်သီအဝဵုတုဲ ပ္ဍဲကဵုပွိုၚ်ဍုၚ်ရေဝ် ကေုာံ ပွိုၚ်ဍုၚ်ဇြပ်ဗုတံဂှ် ညးသၟတ် အာယုက် (၁၆) သၞာံ စဵုကဵု (၃၀) ဂှ် (၉၀) တၟံကၠံ သုၚ်စောဲကၠုၚ် ဂဥုဲၜူမာဲအိုတ်ဂှ် သ္ဂးလဝ်ရ။
ပွမသုၚ်စောဲဂဥုဲၜူမာဲ အပ္ဍဲတွဵုရးဂှ်ဝွံ ဗွဲကြဴဒပ်ပၞာန်သီအဝဵုတုဲ ဟိုတ်နူအခေါၚ်အရာကလောန်ကၟိတ် အောန်စှ်ေကၠုၚ်တံတုဲ ရာန်ကၠုၚ် ဂဥုဲၜူမာဲတံ ဗွဲမလောဲသွာ ဂွံဒၟံၚ်ဂှ်ရ ဒမြိပ်သုၚ်စောဲဒၟံၚ် ဂဥုဲၜူမာဲတံ သၠုၚ်တိုန်ကၠုၚ်ရ။
သ္အာၚ်နူဂှ်ပၠန် ဒဒှ်မသွံတြးဒၟံၚ် ဂဥုဲၜူမာဲတံဂှ်လေဝ် အလဵုကောန်ဒပ် သၟဝ်တဲကံၚ်ဇြဳပၞာန်တံရ ပါလုပ်ဆက်စပ်ဒၟံၚ်ဂှ် ညးမရေၚ်တၠုၚ်ဒၟံၚ် ကေၚ်ကာသၟတ်မန်မွဲတၠ ဟီုရ။
“ဗွဲမဂၠိုၚ်ဂှ်တှ်ေ ဂွံဆဵုကၠုၚ်ဒၟံၚ် တၞးဘိၚ် ဇၟာပ်ပ်ကွာန်ရ၊ လက္ကရဴဏံ ပ္ဍဲကွာန်လ္ၚဵုတံဂှ်တှ်ေ စဵုကဵုဒှ်ကၠုၚ် သီုကဵုမိမတံ ကဵုကၠုၚ်ဇြဟတ် စပ်ကဵုသုၚ်စောဲတၞးဘိၚ်တံဂှ်ရ၊ လၟုဟ် ဇၟာပ်ပ်ကွာန် မၞိဟ်ဟွံသုၚ်စောဲ ဂဥုဲၜူမာဲဂှ် အောန်အာယျ၊ ကံၚ်ဇြဳပၞာန်ဂှ် ဍေံဗလးလဝ် ကောန်ပၞာန်ဍေံ ဖအိုတ်ရဂှ် ဂွံဆဵုကေတ်ရ၊ ဍေံတံ ကၠုၚ်စာတ်ကဵု ပိုယ်တံရ၊ ကေတ်တၞးဘၚ်ဟာ ကၠုၚ်စာတ်သာ်ဏံတုဲ ဍေံလဴထ္ၜးကဵု ဖအိုတ်ရ၊ ဍေံဂှ် ဗိုလ်ဇၞော် နူလ္တူတေံဏောၚ်၊ ဂဥုဲၜူမာဲတံဂှ် ဟွံဗၠးကဵုဍေံတံပုဟ်၊ တုဲတှ်ေ ဟိုတ်နူကံၚ်ဇြဳပၞာန်လေဝ် ပါဒၟံၚ်တၟာဂလိုၚ်ကီုဏောၚ်” ဂှ် သ္ဂးရ။
ပွမသုၚ်စောဲဂဥုဲၜူမာဲတံဂှ်ဝွံ ပ္ဍဲအကြာသၟတ် နူဒေသကွာန်ရးတံဂှ် သၠုၚ်တိုန်ကၠုၚ် သၠဲသၠဲလးလးတုဲ မၞိဟ်သွံတြး ဂဥုဲၜူမာဲတံဂှ် လ္ပာ်ကံၚ်ဇြဳပၞာန် ကေတ်အရေဝ် ရေၚ်တၠုၚ် ကွေံကွေံကြာန်န် ဟွံမွဲရပုဟ်ဂှ် သ္ဂးရ။
အခိၚ်လၟုဟ် ရာန်ကေတ် ဂဥုဲၜူမာဲတံ ဗွဲမလောဲသွာ ဂွံဒၟံၚ်ဂှ်ရ ဒမြိပ်သုၚ်စောဲတံ သၠုၚ်တိုန်ကၠုၚ် နူလ္တူကၠာတေံ တီတီဒှ်ဒှ်တုဲ ကြအ်ဂဥုဲတုဲ ဇကုဇကု စဳရေၚ်ကၠုၚ်တံကဵု သ္ပသၞကုညးတၞဟ်တံ နွံကၠုၚ်ရဂှ် ညးဒေသမွဲတၠ ဟီုရ။
“စပ်ကဵု ဂဥုဲၜူမာဲတံတုဲ လ္ပာ်ပိုယ်တံဏံဂှ်တှ်ေ ဂၠိုၚ်နူလ္တူတေံဂှ် ဟီုဂွံရ၊ ဒၟါနူဂဥုဲၜူမာဲတုဲ ဇကုဇကု ဒက်ဂစိုတ်ကအ်တုဲ ချိုတ်အာတံလေဝ် နွံ၊ ပ္ဍဲကဵုဏံဂှ် စဳရေၚ်ထောံ ဇကုဇကု ကေတ်တ်တံရ နွံ၊ ဗက်ဗာ်ညးတၞဟ်တံ ဗီုတေံဗီုဏံ ပရူပရာဇၞော်ဇၞော်တံဂှ်တှ်ေ ပ္ဍဲကဵုပွဳပွူ (၂) သၞာံဏံ ကေၚ်ဂဗလဝ် မဏံမွဲဓဝ်ရ” ဂှ် သ္ဂးရ။
ပ္ဍဲကဵုကွာန်ရးတံဂှ် သုၚ်စောဲဒၟံၚ် တၞးဘၚ်တံကဵု WY တံဂှ် အဓိကတုဲ သုၚ်စောဲဂဥုဲၜူမာဲတုဲ ပြသၞာအဆက်လက္ကရဴတံလေဝ် က္တဵုဒှ်ဒၟံၚ် အဆက်က်ရ။
တုဲကၠုၚ် ဂိတုအံက်တဝ်ဗာ (၃၁) တေံလေဝ် ပ္ဍဲပွိုၚ်ဍုၚ်မုဟ်ဍုၚ်ဂှ် ဒၟါနူညးမဒှ်အမူ မကြအ်ဒၟံၚ်ဂဥုဲၜူမာဲဂှ် ဗက်ဗာ်ကဵုမြဂှ်ရ ကောန်ၚာ်သၟတ် အာယုက် (၄) သၞာံမွဲတၠ ချိုတ်အာလဝ်ရ။
ပြသၞာသုၚ်စောဲဂဥုဲၜူမာဲ မသၠုၚ်တိုန်ကၠုၚ်ဒၟံၚ် အပ္ဍဲတွဵုရးဍုၚ်မန်ဏံဂှ် ယဝ်ရထိၚ်ကၠေံ ဗွဲမပြဟ်ဟွံမာန်မ္ဂး စိုပ်ကၠုၚ် စဵုကဵုအကာဲအရာ သာပရေံကၠုၚ်မာန်ရောၚ် ညးမရေၚ်တၠုၚ်ဒၟံၚ် ပရေၚ်ဂဥုဲၜူမာဲတံ ထံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)