မတ်မလီု၊ သိပ်တေမ်ပါ ၂၄
အပ္ဍဲတွဵုရးမန် ဂကောံပံၚ်တောဲဌာနစုၚ် သၟဝ်တဲအလဵုအသဳပၞာန်တံ စကၠောန်ကၠုၚ် ပရေၚ်ရပ်စပ်ကေတ်အရေဝ် ကွဳစက်ကဵု ကွဳလိုန်ဓါတ် လိုၚ်သေၚ်ဟွံမွဲတံရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စနူကဵုဂိတုသိပ်တေမ်ပါ ၂၃ ဂှ်တုဲ နူကဵု ဂကောံပံၚ်တောဲဌာနစုၚ်ၚ် မဝ်တဝ်ပဳကေဝ်၊ ရုၚ်အုပ်ဓုပ်၊ ဒပ်ပၞာန်၊ ဒပ်မၚ်ကွာန်၊ ဂကောံဂီုကၠီု ညးဍုၚ်ကွာန်ကေုာံ ပရေၚ်ဗတိုက်သရိုဟ် ပကီုပရာတ်တံ စကၠောန်ကၠုၚ် ပရေၚ်ရပ်စပ်ကေတ်အရေဝ် ကွဳစက်ယာန် လိုၚ်သေၚ် ဟွံမွဲတံရ။
ဒၞာဲပၞော်လုပ်တိတ်ဍုၚ်ကီု၊ ဒၞာဲကွဳစက်ယာန် အာကၠုၚ်ဂၠိုၚ်၊ ပ္ဍဲဂၠံၚ်ပန်သွာၚ် ဒၞာဲပွေက်ပၟတ်တံဂှ် စကာသုၚ်စောဲဇြဟတ်ဂၠိုၚ်ၚ်တုဲ ဂကောံပံၚ်တောဲဌာနစုၚ်တံ ရပ်စပ်သီကေတ်မံၚ် မဒှ်ရ။
အလဵုအသဳပၞာန် ဖျေံကိုန်အစဳဇန်တုဲ ဒၞာဲအပ္ဍဲဍုၚ်ဗွဲမဂၠိုၚ်တံဂှ် ဗက်ဂၠာဲရပ်မံၚ်နွံဂှ်ကီု ညးဆက်စပ်မံၚ်ကဵုဍေံတံဂှ်တှ်ေ ကေတ်ထောံသြန် ၜိုတ်ထေက်ကြိုက်တုဲ ကလေၚ်ဗလးကဵုဏာလေဝ်နွံမံၚ်ကီု ရဲလ္တူဍုၚ်မတ်မလီုမွဲတၠ ဟီုရ။
“ရပ်ဂှ် ရပ်မံၚ်ယျ။ ဒၞာဲဂေတ်ဗွိုၚ်တံ ဇြေဝ်ဂျိုတံ ဂိက်ဖအံက်တံ ဒဒန်မုတ္တမတံ ကွဳစက်လိုၚ်သေၚ်ဟွဲမွဲတှ်ေ လ္ပချပ်ညိ ကပှ် ကေတ်ဏာဟဂှ်ဏောၚ်။ ယဝ်ရဒှ်ရဲ တီညာတ်ဆက်စပ်မံၚ်ကဵုဍေံတံမ္ဂး ပ္ညဳကေတ်ညးသ္ကံတုဲ ၜိုတ် ၂၀ ကိုတ် တန်တဴကဵု ဂကူကွဳစက်တုဲ ပ္ညဳကေတ်မံၚ်ညးသ္ကံနွံ” သာ်ဝွံ သ္ဂးရ။
တုဲပၠန် ပ္ဍဲကဵုဒၞာဲ ပရေၚ်ရပ်စပ် စက်ယာန်လိုၚ်သေၚ်ဟွံမွဲတံမ္ဂး ညး ကဵုကေတ်သြန်မာန်ဂှ်တှ်ေ ၜိုတ်ဆသီကေတ်ဏာ၊ ကွဳလိုၚ်သေၚ်ဟွံမွဲ သၟးကီုလေဝ် ဒၞာဲလ္ၚဵု သီုကဵုရပ်ဏာမၞိဟ်ကီုရောၚ် ညးဆက်ဟီုရ။
အတိုၚ်ကိုန်အစဳဇန်ဂှ်မ္ဂး နူကဵုဂကောံဌာနစုၚ်ၚ်တံ ဗက်ကလေၚ်ရပ်မံၚ်တုဲ ကွဳစက်လိုၚ်သေၚ်ဟွံမွဲကီု သီကဵုကွဳလိုန်ဓါတ် ဗက်ရပ်မံၚ်ဖအိုတ်ရောၚ် ညးဒေသ မုဟ်ဍုၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လၟုဟ် ကလေၚ်ရပ်မံၚ်၊ ရပ်မံၚ်ဟီုတှ်ေ တ္ၚဲဏံလေဝ်ရပ်မံၚ် ကွဳလိုန်ဓါတ်တံ၊ ကွဳစက်လိုၚ်သေၚ်ဟွံမွဲတံ သီုဖအိုတ်ရ။ သီုကွဳလိုန်ဓါတ် သီုကွဳစက်တံ။ ရပ်သီုဖအိုတ်ရ။ ကလေၚ်ရပ်မံၚ်။ ဂကောံဌာနစုၚ်ၚ် ဒပ်ပၞာန်တံ ကယျိုၚ်ဍီုတံ ဗၠာဲသၟိၚ်တံ မဝ်တဝ်ပဳကေဝ်တံ ရုၚ်အုပ်ဓုပ်တံ ပါမံၚ်ဖအိုတ်ဏောၚ်။ လၟုဟ် ဗက်ရပ်မံၚ်ဖိုအ်ဏီ ဗက်ရပ်ကွဳစက်လိုၚ်သေၚ်ဟွံမွဲတံ ကွဳလိုန်ဓါတ်တံလေဝ် ကလေၚ်ရပ်မံၚ်ပၠန်” သာ်ဝွံ သ္ဂးရ။
အပ္ဍဲဒေသမ္ဂး ဟိုတ်နူ ရဲသၟဝ်တဲအလဵုအသဳတံ နကဵုကိုန်အစဳဇန် ဗက်ဂၠာဲရပ်မံၚ်ဂှ်ရ ညးလ္ၚဵုပါဲဓလေတ်အာတုဲ ဒးဒဳမံၚ်၊ ညးလ္ၚဵု ပၞုက်စွံလဝ်လေဝ် နွံမံၚ်ရောၚ် ဂွံတီရ။
မွဲလပါ်ပၠန် အလဵုအသဳဒပ်ပၞာန် တွဵုရးမန်တံဝွံ ကၠာဟွံစိုပ် အခိၚ်ပေါဲရုဲမာဲဂှ် နကဵုက္ဍိုပ်လိက် ပရေၚ်ဗတိုက်သရိုဟ် ပရေၚ်ကူသာန်သွံရာန် ဟွံလုပ်သၞောဝ်ဂးတုဲ ဖျေံကိုန်အစဳဇန် ဗက်ရပ်သီကေတ်လဝ် ကွဳစက်လိုၚ်သေၚ်ဟွံမွဲတံ ကၠောန်လဝ်ကီုရ။
အဟိန်ရပ်အာ ပရေၚ်ကွဳစက်လိုၚ်သေၚ်ဟွံမွဲတံမ္ဂး သီကေတ်ဏာ ကွဳစက် ကွဳလိုန်ဓါတ်တံသၟးဟွံက ရပ်ဏာသီုညးဒဳ နကဵုဥပဒေ ပရေၚ်ပၠုပ်ပတိတ်ကပေါတ်တံကီုတုဲ သၟတ်လ္ၚဵုတံဂှ်တှ်ေ ရပ်ပကောံကေတ်ထောံ သွက်ပရေၚ်ယိုက်ဝန်ပၞာန်လေဝ် နွံရ။
အပ္ဍဲတွဵုရးမန် ကွဳစက် ကွဳလိုန်ဓါတ်လိုၚ်သေၚ်ဟွံမွဲတံ လုပ်စိုပ်ကၠုၚ်နူဍုၚ်သေံတုဲ ရပ်ကြပ်ကဵုအလဵုအသဳတံ ဍိုက်မံၚ်ကွဳစက်ယာန် လိုၚ်သေၚ်ဟွံမွဲလေဝ်နွံ ညးလ္ၚဵုထပက်လဝ်သြန်ကဵု ရဲသၟဝ်တဲ အလဵုအသဳပၞာန်တံတုဲ ဍိုက်မံၚ်ကွဳစက်လိုၚ်သေၚ်ဟွံမွဲတံနွံမံၚ်ဂှ် ဂွံတီရ။
ပရိုၚ်-သြၚ်လောန်တိုၚ်မ်
Photo – MOI