မတ်မလီု၊ အံက်တဝ်ပါ ၂၁
တွဵုရးမန် ဍုၚ်မတ်မလီု ပ္ဍဲကဵုကမၠောန်သိုၚ်ခၞံ အရာပ်သာယာဧ မွဲဒၞာဲဂှ် ဟိုတ်နူအသိၚ်ဂမ္တဴသၠုၚ်တုဲ သၟာကမၠောန်ပါန်ရန်မွဲတၠ ဒေါမ်စှ်ေ ချိုတ်အာလဝ်ဂှ် ဂွံတီနူ ညးဒေသတံကဵုဂကောံရီုဗၚ်တံရ။
အပ္ဍဲဂိတုအံက်တဝ်ပါ ၁၉ အခိၚ်တ္ၚဲစေၚ် အခိၚ်ကွဳစက်ဍာ်သုၚ်ကၠုၚ်ဂှ် သၟာကမၠောန်ပါန်ရန် တိတ်ဂတမုက်သ္ၚိ အဟိန်ကၠုၚ်သၠာဲဍာ်ဗူဂှ် ဝိုတ်စိပ်ဒေါမ်စှ်ေအာ ဟဂှ်ရ။
တုဲပၠန် သၟာကမၠောန်ပါန်ရန် ဝိုတ်စိပ်ဒေါမ်စှ်ေလဝ်ဂှ် နကဵု ပရေၚ်ကာမံက်တိုန် နူဂကောံရီုဗၚ်ဟံၚ်ပြာ် “ကျန်းမာချမ်းသာ” ကၠုၚ်ဝဳကဵုကီုလေဝ် လမျီုဒးအိုတ်အာ မဒှ်ရ။
အတိုၚ်တၚ်နၚ်ဌာန်ပရိုၚ်သြၚ်လောန်တိုၚ်မ် ပကောံဂွံလဝ်မ္ဂး အပ္ဍဲတွဵုရးမန် အကြာဂိတုဏံ ဟိုတ်နူအသိၚ်ဂမ္တဴ သူပါအေလ်နဳညိုသၠုၚ်ဇၞော်ကဵုဇြဟတ်ဒှ်တုဲ ပရေၚ်ဂမ္တဴလုပ် Heat Stroke ဒှ်ဂှ် မၞိဟ်ချိုတ်အာလဝ် ၆ တၠတုဲယျ။
ဟိုတ်နူဒးဘဲဒဏ်အသိၚ်ဂမ္တဴဂှ်ရ ပ္ဍဲပွိုၚ်ဍုၚ်ၜဳကလေၚ် ၄ တၠ၊ ပွိုၚ်ဍုၚ်သဓီု ၁ တၠ၊ ပွိုၚ်ဍုၚ်မတ်မလီု ၁ တၠ အပံၚ်ဖအိုတ် ချိုတ်လဝ် ၆ တၠဒှ်အာတုဲ ဗွဲမဂၠိုၚ် ရဲသုၚ်အရက်ကဵုသၟတ်အဝဲဍောတ်တ်တံ ပါလုပ်ရ။
အတိုၚ်နူကဵုဌာနပရေၚ်ဗြဲကျာ လလောၚ်တြးလဝ် ပ္ဍဲကဵုအံက်တဝ်ပါ ၁၉ မ္ဂး အသိၚ်ဂမ္တဴဍုၚ်မတ်မလီုဂှ် စိုပ်လဝ်ဒဵုကဵု ၃၆ ဒဳဂရဳ သေလ်သဳယာတ်နွံတုဲ အသိၚ်ဂမ္တဴ ထပ်သၠုၚ်တိုန်မာန်ရောၚ် ကဵုလဝ်သတိနွံရ။
ဟိုတ်နူအသိၚ်ဂမ္တဴ ထပ်သၠုၚ်တိုန်မံၚ်တုဲ စနူကဵုအခိၚ်နူဂယး ၁၀ နာဍဳ စိုပ်သဝ်တ္ၚဲ ၄ နာဍဳ ညံၚ်ဂွံဝေၚ်ပါဲ အသိၚ်လျးတ္ၚဲ တိုက်ရိုက်တဝ်ဝ်ညိ၊ ကၠုၚ်နူကဵုဒၞာဲဂမ္တဴဂၠိုၚ်ၚ်တုဲ မွဲအလန်ဓဝ် လ္ပလုပ်အာဒၞာဲဂံက်က်ညိ၊ ပရေၚ်အာကၠုၚ်တိတ်မ္ၚးတံ စွံသတိအိုတ်ညိ သာ်ဝွံ နူကဵုဌာနပရေၚ်ထတ်ယုက် ဗတိုက်ဖအောဝ်လဝ်ရ။
ပ္ဍဲအကြာဂိတုနဝ်ဝမ်ပါ ကဵု ဒဳဇြမ်ပါ သၞာံ ၂၀၂၆ ဏံ အသိၚ်ဂမ္တဴ သူပါအေလ်နဳညို စိုပ်အာအကာဲအရာ သၠုၚ်အိုတ်ဒှ်မာန်တုဲ မၞိဟ်လၟိဟ်ကဵုကိုတ်တံ ချိုတ်မာန်ရောၚ်ဂှ် တၠပညာဥတုရာသဳဂၠးကဝ်တံ တော်ဆလဝ်နွံရ။
ပရိုၚ်-သြၚ်လောန်တိုၚ်မ်
Photo – Social Media