မတ်မလီု ၊ အံက်တဝ်ပါ ၂၁
အပ္ဍဲကဵုစၠတ်ထဝ်တွဵုရးမန် ညံၚ်ဂွံကၟာတ်ထောံဝိုၚ်ဝေၚ်တံ သ္ပဒတန်လဝ်ကီုလေဝ် အခိၚ်လာ်ဝှ်တိကှ်လၟုဟ်ဏံ သီုကဵုပေါဲသဘၚ်တံဂှ် ပလေဝ်စမံၚ် သွက်ဂွံကလေၚ်ပံက်ဝိုၚ်ဝေၚ် တံယျဂှ် ညးကြပ်ကဵုရဲပရေၚ်အုပ်ဓုပ်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပရေၚ်ဝိုၚ်ဝေၚ်လံၚ်သြန် နကဵုယၟုပရေံပရေံဒယှ်တှ်မံၚ်ဂှ် ညံၚ်ဂွံကၟာတ်ထောံပိုတ်တ် သ္ပဒတန်လဝ်ဂလာန် ပ္ဍဲကဵုစၠတ်ထဝ် တွဵုရးမန် ကၠောန်လဝ်ကောံဓရီု ဂိတုဂျောန် ၁၉ ဂှ်ရ။
ဂလာန်သ္ပဒတန်ကၟာတ်ဝိုၚ်ဝေၚ် အံၚ်ဇၞးအာတုဲ ပေါဲသဘၚ်တံကဵု ဝိုၚ်ဝေၚ်တံဂှ် ဒှ်မံၚ်အခိၚ်ဗြဲဏံ ၐိုန်ရဇူလဝ်ကီုလေဝ် အခိၚ်လာ်ဝှ်တိကှ် လၟုဟ်ဏံ သီုကဵုပေါဲသဘၚ်တံမွဲစွံကီု ပလေဝ်စမံၚ် သွက်ဂွံကလေၚ်ပံက်အာ ဝိုၚ်ဝေၚ်တံရောၚ်။
ပ္ဍဲစၠတ်ထဝ် ဂလာန်ကၟာတ်ထောံဝိုၚ်ဝေၚ် အံၚ်ဇၞးကီုလေဝ် ညးတာလျိုၚ်ကဆံၚ်သၟဝ်တံ ဟွံကၠောန်ကမၠောန်တုဲ ပ္ဍဲလက်ထက်အာယုက်အလဵုအသဳဏံ ပရေၚ်ဂွံကၟာတ်ဝိုၚ်ဝေၚ်တံဂှ် စၟဳစဟွံဂွံပုဟ် ညးဒေသမန်မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“အဓိကဂှ် ပ္ဍဲအဆံၚ်သၟဝ်တေံ ပရေၚ်ဂီုကၠီု ပရေၚ်အုပ်ဓလီုသၞောဝ်ဓရ်နွံမှ ထိၚ်ဒဝ်ပရေၚ်ဏံမာန်ဏော၊ နူလ္တူတေံ အံၚ်ဇၞးအာဂလာန်ဏံတုဲ ပရေၚ်ထမံက်ရုပ်ရဴ ပ္ဍဲအဆံၚ်သၟဝ်ဏံ ပရေၚ်အုပ်ဓလီုသၞောဝ်ဓရ်လေဝ် ဟွံမွဲပုဟ်။ ဟိုတ်ဂှ်ရ လက်ထက်အလဵုအသဳဏံ ပိုဲတံမုလေဝ် လ္ပစၟဳစရ အဲခယျ” သာ်ဝွံ သ္ဂးရ။
တုဲပၠန် ပြဟ်ဟ်ဏံ ဟိုတ်နူလံၚ်ဝိုၚ်ဝေၚ်တုဲ ကၟိန်အိန်ထံၚ်လ္ၚဵုတံဂှ် ပရေၚ်ပိုန်ဒြပ်လီုအာကီု၊ အကြာဒေသ ပရေၚ်ကၠတ်ဂၠံက်ပၠံၚ်ၜးတံ ဒှ်ဂၠိုၚ်တိုန် ရဲကၠတ်ကွဳလိုန်ဓါတ် ဂၠိုၚ်တိုန်မံၚ်သေဲသေဲဂှ် တီမံၚ်ကီုလေဝ် ကဵုအခေါၚ်ကၠောန်ဝိုၚ်ဝၚ်တံဂှ်တှ်ေ ကၠောန်ကရေပ်မံၚ် ညံၚ်ညးဍုၚ်ကွာန်တံ ဂွံဝါတ်ဂါတ်အာရဏောၚ် ညးပါ်ပါဲလဝ်ရ။
ပ္ဍဲအကြာဒေသ ပရေၚ်လံၚ်ဝိုၚ်ဝေၚ်တံ ညံၚ်ဂွံကၠေံကၠက်အာသၠုၚ်အသိၚ်တုဲ သွက်ဂွံရပ်စပ်ကေတ်အာအရေဝ်ဂှ် ပ္ဍဲဂကောံအလဵုအသဳ ဖျေံလဝ်သ္ဂုတ်သွာတ်နွံတုဲတုဲရောၚ် ဝန်ဇၞော်ပရေၚ်ကေၚ်ကာမၞိဟ် ဥူတေန်ဇြဝ်ထောန် ဟီုလဝ် ပ္ဍဲစၠတ်ထဝ်ကီုရ။
တုဲပၠန် ညးနွံတာလျိုၚ်အဆံၚ်ၚ်တံ ညံၚ်ဂွံထိၚ်ကြာပ်ရပ်စပ်အာ ဝိုၚ်ဝေၚ်တံကီု ဝိုၚ်ဝေၚ်တံအောန်အာတုဲ ရိုဟ်ကၞက်ဂွံပိုတ်အာကေုာံ ညံၚ်ဟွံဂွံကလေၚ်ဒှ် နဲကဲနာနာထမံက်ကၠောန်အာရောၚ် ကဵုလဝ်ဂတိပါၚ် ပ္ဍဲကဵုစၠတ်ထဝ်ရ။
ပ္ဍဲတွဵုရးမန် အလဵုအသဳအဆက်က်တုဲကၠုၚ်တေံ ညံၚ်ပရေၚ်လုပ်သၞောဝ် ဟွံကဵုလဝ်အခေါၚ်ပံက်ဝိုၚ်ဝေၚ်ကီုလေဝ် ပရေၚ်သီုအဝဵု ဒှ်တုဲစိုပ်လက်ထက်သ္ကိုပ်ဝန်ဇၞော် အလဵုအသဳပၞာန်အဆက်က်တံဂှ် ကဵုလဝ်အခေါၚ် တ္ၚဲဇမၠိၚ် ပံက်လဝ်ဝိုၚ်ဝေၚ်ဇၞော်ဇၞော် ညံၚ်ရဴလုပ်သၞောဝ် မဒှ်ရ။
ပရိုၚ်-သြၚ်လောန်တိုၚ်မ်
Photo – CJ