နေဗျဳဒဝ်၊ အံက်တဝ်ပါ ၂၁
စပ်ကဵုကဏ္ဍဓါတ်လလဳကဵု ကၠေၚ်ဍေၚ်တုဲ သွက်ဂွံသၠုၚ်ပတိုန် ပရေၚ်ပံၚ်တောဲကဵု ပရေၚ်ဓလိုက်တမ်ရိုဟ်မာန် အလဵုအသဳပၞာန်ကဵု အလဵုအသဳသေံတံ သဳကၠဳမံၚ်ဂှ်တှ်ေ လ္တူဂကောံပၠန်ဂတး ဖျေံသ္ဇိုၚ်ဒေသတံ ဒှ်ကၠုၚ် ပရေၚ်ဇီုကပိုက်မာန်ရောၚ် ညးလ္ၚတ်တံ သ္ၚဳဂၠိပ်အိုတ်ရ။
အပ္ဍဲကဵုဂိတုအံက်တဝ်ပါ ၁၉ နူကဵုအလဵုအသဳသေံ ဝန်ဇၞော်ကၠေၚ်ဍေၚ် Akanat Promphan သ္ကိုပ်သ္ကဂကောံညးစၞးတံ ကၠုၚ်နေဗျဳဒဝ်တုဲ ဆဵုဂဗလဝ်ကဵု သမ္မတခါန်ကၞက်ကေတ်တ် ဥူမေန်အံၚ်လှိုၚ်ကဵု ဝန်ဇၞော်ကၠေၚ်ဍေၚ် ဥူကိုကိုလွေၚ်တံရ။
ကိစ္စသွက်ဂွံသၠုၚ်ပတိုန်ပရေၚ်ပံၚ်တောဲ ဆေၚ်စပ်ကဵုကၠေၚ်ဍေၚ် ကေုာံ ဒစးဒုၚ်သွက်ဂွံစဵုဒၞာဘဲဒဏ်သဘာဝ အကာဲအရာအကြာၜါဍုၚ် ဗီုပြၚ်ဂွံပံၚ်တောဲအာမာန်ဂှ် ပ္ဍဲကဵုဆဵုဂဗလဝ်ကု ဥူမေန်အံၚ်လှိုၚ်ဂှ် သဳကၠဳလဝ်မဒှ်ရ။
အကြာၜါဍုၚ် ဆေၚ်စပ်ကဵုကဏ္ဍဓါတ်လလဳကဵုကၠေၚ်ဍေၚ်တံ သွက်ဂွံပံၚ်တောဲ ကၠောန်အာညးသ္ကံကြပ်ပ်မာန်ဂှ်တုဲ ကိစ္စထပက်လိက်ကသုက် MoU တံဂှ် ဝန်ဇၞော်ဥူကိုကိုလွေၚ်ကဵု ဝန်ဇၞော်ကၠေၚ်ဍေၚ်သေံတံ ဆဵုဂဗသဳကၠဳလဝ်ရ။
အပ္ဍဲကဵုကိုန်အစဳဇန် သၟုဟ်ဓါတ်သဘာဝ ပံၚ်တောဲလဝ်ကဵုဍုၚ်သေံတံဂှ် ညံၚ်ဂွံကၠောန်ပတိတ်အာလၟိဟ်ဂၠိုၚ်ၚ်မာန် ကိစ္စသေံတံ မိက်ဂွံထပ်လုပ်ဓလိုက်တမ်ရိုဟ် ကိုန်အစဳဇန်တၟိတၟိတံလေဝ် ပါမံၚ်ကီုရ။
တုဲပၠန် တောဲလဝ်ပိုက်လိုၚ်ကဵုဍုၚ်သေံတံဂှ် ညံၚ်ဂွံသုၚ်စောဲစကာအာ အစောန်စရာဲဍိုက်က်ပေၚ်ၚ်မာန် ကိစ္စသွက်ဂွံပံၚ်တောဲအာကေုာံ ဒုၚ်သ္ဇိုၚ်ကဵု ဒေသထဝါဲတုဲ ဗမာ-သေံ-ရတ်ယှာ ၃ ဍုၚ်ဏံ ပံၚ်တောဲ သွက်ဂွံကၠောန်အာ ပရေၚ်ကူသာန်ကၠေၚ်ဍေၚ်တံ မဒှ်ရ။
ကိုန်အစဳဇန် ပတိတ်ဓါတ်လလဳနကဵုဇြဟတ်ဍာ် နူၜဳသြၚ်လောန်ကဵုကြုၚ်တနၚ်သဳတံတုဲ ကိုန်အစဳဇန် တတ်ကၠောံရးနိဂီုဍုၚ် သွက်ဂွံပလံၚ်တြးအာဓါတ်လလဳတံဂှ် ကိစ္စကာန်ပနဳသေံ မိက်ဂွံဓလိုက်တမ်ရိုဟ်ဂှ်လေဝ် သဳကၠဳလဝ်ရောၚ် အလဵုအသဳပၞာန် လလောၚ်ပတိတ်လဝ်ပရိုၚ်ရ။
ကိုန်အစဳဇန် ဗီုတံဏံ သွက်ဂွံထမံက်အာရုပ်ရဴမာန် ပရေၚ်ညိၚ်ဝပ်တိဍာ် ညံၚ်သ္ဂောံဂွံအာ လ္တူဂကောံပၠန်ဂတး နွံမံၚ်အကြာဒေသတံဏံ ကၠောန်ကၠုၚ်ပရေၚ်ပသောၚ်တိဍာ်မာန်ရောၚ် ညးအုပ်ကာကံၚ်သဳမဳဒဳယာဗၠးၜးဗမာ ဥူတိုဝ်ဇြဝ်လာတ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“တောဲဗက်ကၠုၚ်လက်ကရဴတုဲ ပရေၚ်ဇီုကပိုက်တံ ဒှ်ကၠုၚ်မာန်ဂှ်တှ်ေ ကဵုကၠုၚ်ဇြဟတ်ဟရိုဟ် လ္တူဂကောံပၠန်ဂတးတံဂှ် ထပ်ဂဗဆဵုပၠန်ဏောၚ်။ ဗီုတံဏံရ ဍုၚ်သေံ ဒးဗ္ဒာဲဒလာဲမံၚ်ကၠေၚ်ဍေၚ် နူကဵုဍုၚ်ဗမာ ဇြဟတ်ဇၞော်တိုန်ကၠုၚ်ဂှ် မေန်အံၚ်လှိုၚ် ပတိတ်ကေတ်ပရဲတုဲ အဲခယျကေတ်တှ်ေ သွက်ညးတေံ ဂွံဒှ်ပရေၚ်လုပ်သၞောဝ်ကီု သွက်ဂွံဗတိုက်ဂကောံပၠန်ဂတးတံဂှ် ညးတေံ ပဵုတုဲပတိတ်ကၠုၚ်ဇြဟတ်ဏောၚ်။ ဆဂး ပရေၚ်ကိုန်အစဳဇန်တံဏံဂှ် ဒှ်ကၠောန်မှလေဝ် ဒှ်ဒကာဘာဍာံဍာံ အဲမိက်ဂွံဟီု” သာ်ဝွံ သ္ဂးရ။
လောန်ကၠုၚ် သတ္တဟတေံလေဝ် ဥူမေန်အံၚ်လှိုၚ် စိုပ်ကၠုၚ်ဒေသထဝါဲ ရးတနၚ်သဳတုဲ စပ်ကဵုပရေၚ်ဒေသဖောအ်ဗြဳတောတက် အရာနွံပၟိက်တံသွက်ဂွံဗပေၚ်ကဵုအာဂှ် ကၠုၚ်စိုပ်ဟီုဂးလဝ်ရောၚ်။
မွဲလပါ်ပၠန် ပ္ဍဲကဵုၜဳဇၞော် တိဍာ်ဍုၚ်ဗမာ ဒၞာဲဗလးဧရာဝတဳကဵုတနၚ်သဳ တံမ္ဂး ဆဵုလဝ်ဒၞာဲဂအံၚ် သၟုတ်ဓါတ်သဘာဝ ဒေပ်မံၚ်နွံတုဲ ညံၚ်ဂွံဒှ်ပရေၚ်ပိုန်ဒြပ်ဂှ် ၜံက်ခါဲကၠောန်အာရောၚ် အပ္ဍဲဂိတုဂျောန် ၁၄ တေံ အလဵုအသဳပၞာန် လလောၚ်ပတိတ်လဝ်ပရိုၚ်ရ။
ဗွဲကြဴပရေၚ်သီအဝဵုဒှ်အာတုဲ ဍုၚ်အမေရိကာန်၊ သိပ်ဇြာလာန် ၂၇ ဍုၚ် ပါလုပ်လဝ် နူကဵုဂကောံဗွဝ်ဖျာ ယူရောပ်တံ ဖျေံလဝ်ပရေၚ်ကၟာတ်ဆိုအ်တပ်ဒဏ် လ္တူကမၠောန်ကၠေၚ်စက်ကေုာံ သၟုဟ်ဓါတ်သဘာဝဍုၚ်ဗမာ MOGE နွံရ။
ဟိုတ်ဂှ်တုဲ ပရေၚ်အရီုဗၚ်နူကဵုဍုၚ်ပလိုတ်တံ ဟွံဒးကေတ်မွဲသာ် သွက်ဂွံၜံက်ခါဲအာ ဂအံၚ်ဓါတ်သၟုဟ်သဘာဝ ပ္ဍဲၜဳဇြိုဟ်မာန်ဂှ် ဒးကေတ်နဲကဲပညာ နွံမံၚ်ဗွဲမဂၠိုၚ်ဏီရောၚ် ဥူတိုဝ်ဇြဝ်လာတ် ထံက်ထ္ၜးလဝ်ရ။
သၟုဟ်ဓါတ်သဘာဝဍုၚ်ဗမာ ဗွဲမဂၠိုၚ်တံဂှ် တောဲပိုက်လိုၚ်တုဲ ပလံၚ်ကဵုမံၚ်သေံကဵုကြုက်တံတုဲ သွက်ဍုၚ်သေံ သၟုဟ်ဓါတ်သဘာဝ ၁၅% ဂှ် ဗ္ဒဗ္ဒာဲဒးကေတ်မံၚ်နူကဵုဍုၚ်ဗမာရောၚ်။ ပ္ဍဲကဵုကိုန်အစဳဇန် သၟုဟ်ဓါတ်သဘာဝဍုၚ်ဗမာ “ရတနာ၊ ရဲတံခွန်၊ ဇောတိက”တံဂှ် ကာန်ပနဳသေံ PTTEP ကၠောန်မံၚ်ရ။
ပြဟ်ဟ်ဏံ အကြာသေံကဵုအလဵုအသဳပၞာန်တံသဳကၠဳလဝ် စပ်ကဵုပရေၚ်ဓါတ်လလဳ ကေုာံ ကဏ္ဍကၠေၚ်ဍေၚ်တံတုဲ ဗီုလဵုဂွံလဝ် တၚ်တုပ်စိုတ်၊ ဗီုလဵုထမံက်အာရုပ်ရဴဟီုဂှ် ပ္ဍဲလလောၚ်တြးလဝ်ဂှ် ချူထမံက်လဝ်ဟွံမွဲပုဟ်။
အပ္ဍဲကဵုဆဵုဂဗလဝ် အလဵုအသဳပၞာန်ဂှ် ဝန်ဇၞော်ကၠေၚ်ဍေၚ်သေံ၊ အမာတ်ကလုတ်ဇၞော်သေံ ဆေၚ်စပ်ကဵုဍုၚ်ဗမာ၊ ကာန်ပနဳသေံ PTT၊ PTTEP ကေုာံ ညးတာလျိုၚ် ဂကောံကၠောန်ပတိတ်ဓါတ်လလဳ ဍုၚ်သေံ EGAT တံပါလုပ်လဝ်ရောၚ် အလဵုအသဳပၞာန် လလောၚ်ပတိတ်လဝ် ပရိုၚ်နွံရ။
ပရိုၚ်-သြၚ်လောန်တိုၚ်မ်
Photo – MOI