မတ်မလီု ၊ အံက်တဝ်ပါ ၂၂
အပ္ဍဲကဵုဂကောံအလဵုအသဳပၞာန် တွဵုရးမန် ဒၞာဲတာလျိုၚ် ဝန်ဇၞော်ပရေၚ်ဂီုကၠီုဒေသပယျဵု သ္ကိုပ်ဗိုလ်ဇၞော် ကျဝ်ဇွာမျေအ်ဂှ် ပြံၚ်သၠာဲခါန်ကၞက် သ္ကိုပ်ဗိုလ်ဇၞော်ယေဝ်ထောဋ်တုဲ ထပက်လဝ်အဇာရဂှ် ညးကြပ်ကဵုရုၚ်အလဵုအသဳပၞာန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သ္ကိုပ်ဗိုလ်ဇၞော် ကျဝ်ဇွာမျေအ် ယၟုဇၞော်မံၚ်ကဵု ပရေၚ်ကူသာန် ဟွံလုပ်သၞောဝ်ဂှ် အခိၚ်ဒပ်ပၞာန်သီအဝဵုတုဲ ဗွဲကြဴ ပ္ဍဲလက်ထက် ကံၚ်သဳပၞာန်ဂှ် ခါန်ကၞက်ကဵုလဝ် ဒၞာဲတာလျိုၚ် ဝန်ဇၞော်ပရေၚ်ဂီုကၠီု ဒေသပယျဵု တွဵုရးမန်ရ။
စနူသၞာံ ၂၀၂၂ ဂိတုအဝ်ဂတ် ၁၉ သ္ကိုပ်ဗိုလ်ဇၞော် ကျဝ်ဇွာမျေအ် ကေတ်တာလျိုၚ် ဝန်ဇၞော်ပရေၚ်ဂီုကၠီုဒေသပယျဵု တွဵုရးမန်တုဲ လၟုဟ်ပေၚ်စိုပ်အာ ၄ သၞာံပြၚ်ရ။
ပရေၚ်ကၠောန်လဝ်အပြံၚ်သၠာဲ ဝန်ဇၞော်ပရေၚ်ဂီုကၠီုဒေသပယျဵု တွဵုရးမန်ဂှ် ခြာဟွံလံ နူကဵုဂကောံအလဵုအသဳဒပ်ပၞာန်တံ လလောၚ်တြးကၠုၚ်ပရိုၚ်မာန်ရောၚ် သ္ဂးရ။
ပရေၚ်ကၠောန်လဝ်အပြံၚ်သၠာဲ ဝန်ဇၞော်ပရေၚ်ဂီုကၠီုဒေသပယျဵု တွဵုရးမန်ဟီုဂှ်တှ်ေ ကဵုကၠောန်စ သွက်ညးမွဲတၠပၠန်ရောၚ်ဂှ် ညးဒေသတံ ဟီုဂးပါ်ပါဲမံၚ်ရ။
သ္ကိုပ်ဗိုလ်ဇၞော် ကျဝ်ဇွာမျေအ် အခိၚ်ကေတ်လဝ်တာလျိုၚ်ဏံ ပံၚ်တောဲလဝ်ကဵုသ္ကိုပ်ဝန်ဇၞော်မန်တြေံ ဥူအံၚ်ကျဳတိၚ်တုဲ ကဵုအခေါၚ်ပံက်လဝ်ဝိုၚ်ဝေၚ် ညံၚ်ကဵုလုပ်သၞောဝ်ရောၚ်။
တုဲပၠန် ကပေါတ်သၟာဗၞိက်တံ ကၠုၚ်နူသေံဂှ် ထ္ၜးဟိုတ် ပရေၚ်ကူသာန်ဟွံလုပ်သၞောဝ်ဂးတုဲ ရပ်စပ်သီကေတ်ထောံကီုလေဝ် ရဲကြပ်ကဵုညးဂှ်တှ်ေ ကေတ်သြန်ဗွဲမဂၠိုၚ်တုဲ ကဵုလဝ်အခေါၚ်ညံၚ် လုပ်သၞောဝ်ရောၚ်။
အခိၚ်သ္ကိုပ်ဗိုလ်ဇၞော် ကျဝ်ဇွာမျေအ် ကေတ်လဝ်တာလျိုၚ် ဝန်ဇၞော်ပရေၚ်ဂီုကၠီုဒေသပယျဵု ပွိုၚ် ၄ သၞာံပြၚ်ၚ်ဏံ ဂွံအာသြန်လၟိဟ်ကိုတ်ဗွဲမဂၠိုၚ်တုဲ ဒှ်အာသေဌဳမာန်ရောၚ် ရဲမံၚ်ကြပ်ကဵု ဗွိုၚ်အလဵုအသဳပၞာန်တံ ဟီုဂးမံၚ်ညးသ္ကံရ။
ပရိုၚ်-သြၚ်လောန်တိုၚ်မ်
Photo – Social Media