သဓီု၊ အံက်တဝ်ပါ ၂၂
အပ္ဍဲတွဵုရးမန် ပွိုၚ်ဍုၚ်သဓီု လ္တူဂၠံၚ်သဓီု-ဘာအၚ် ဂအုံကွာန်ထံၚ်မှူ ကရပ်ကွာန်လေဝ်တိုၚ်ဂှ် ကွဳစက်လုပ်ဇီုဒးတုဲ သၟတ်ဗြဴကွးဘာတက္ကသဵု ၃ တၠချိုတ်အာလဝ်ဂှ်ရ လ္တူစောဲလဝ်အမှုကုညးတၠတဲဂှ် ဖျေံအမိၚ်ထံၚ် ဆၜိုတ် ၅ သၞာံဓဝ်ရောၚ် ညးလ္တူဍုၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ညးတၠတဲဇီုလဝ်ကဵုကွဳစက် သၞာဲဒါယိုက်ဝန် နူရုၚ် ကညန ပွိုၚ်ဍုၚ်သဓီု နေလေၚ်သိုဝ်ဝွံ ပ္ဍဲအံက်တဝ်ပါ ၁၉ ဏံ နူကဵုရုၚ်သၞောဝ်ဓဝ် ပွိုၚ်ဍုၚ်သဓီု ဖျေံဏာအမိၚ်ဒဏ်ထံၚ် ၅ သၞာံရ။
သၟတ်ဗြဴကွးဘာတက္ကသဵု ၃ တၠ ဒဵုကဵုဒးချိုတ်လဝ် လ္တူသၞာဲဒါယိုက်ဝန် နူကဵုရုၚ် ကညန ဇီုဒးလဝ်ကဵုကွဳစက်ဏံ ဖျေံထံၚ်ဆ ၅ သၞာံဓဝ်ဂှ်တှ်ေ အကြာညးဍုၚ်ကွာန်တံ ပရေၚ်ပါ်ပါဲသၠုၚ်တိုန်မံၚ်ရ။
တုဲကၠုၚ်ဂိတုမေ ၁၀ တေံ လ္တူဂၠံၚ်သဓီု-ဘာအၚ် သၟတ်ဗြဴကွးဘာ တက္ကသဵု ၃ တၠ ဒဳကၠုၚ်မံၚ်ကွဳလိုန်ဓါတ်ဂှ် သၞာဲဒါယိုက်ဝန် နူရုၚ်ကညန နေလေၚ်သိုဝ် သုၚ်ဗ္ၜူအရက် ဒဳနၚ်ကွဳစက် အသိၚ်ထတ်တ်တုဲ လုပ်ဇီုဒးလဝ်ရောၚ်။
အပ္ဍဲပရေၚ်ကွဳစက်ဇီုဏံ မဧဧအံၚ် အာယုက် ၁၉ သၞာံ ကွးဘာသၞာံ ပထမ Civil တက္ကသဵုနဲကဲပညာ(မတ်မလီု)၊ မနေချဳကျဝ် အာယုက် ၂၀ သၞာံ ကွးဘာသၞာံပထမ Bio Chemistry တက္ကသဵုမတ်မလီု ကေုာံ မဂျူလိုၚ်မိုဝ် ကွးဘာသၞာံဒုတိယ Chemistry တံ မွဲအခိၚ်ဓဝ်ချိုတ်အာလဝ် အပ္ဍဲဒၞာဲဒှ်ဟိုတ်ဂှ်ရ။
လ္တူသၟတ်ဗြဴပိတၠ ကွဳစက်ဇီုတုဲချိုတ်အာဂှ် သွက်ဂွံပရေပရံၚ်ပတုဲထောံအမှုဂးတုဲ နူကဵုကၟိန်အိန်ထံၚ် နေလေၚ်သိုဝ်တံ ကၠုၚ်စာတ်သွက်ဂွံလေဲကဵုသြန် သွက်ညးမွဲမွဲတၠ ၁၀၀ ကိုတ်ကီုလေဝ် နူကဵုကၟိန်အိန်ထံၚ် မနေချဳကျဝ်တံ ဟွံဒုၚ်တဲသြန်တုဲ ဒးဆေၚ်ကၠုၚ်အမှုရဂှ် ညးဒေသတံဟီုတုဲ ဂွံတီရ။
ပရိုၚ်-သြၚ်လောန်တိုၚ်မ်
Photo – CJ