နေဗျဳဒဝ်၊ အံက်တဝ်ပါ ၂၃
အပ္ဍဲကဵုတွဵုရးမန် ဒၞာဲဂိက်သၞေဟ်ကၚ်တံ ယဝ်ရ အာတ်သြန်မ္ဂး တေၚ်စပ်မာန်တုဲ ကေတ်အာအရေဝ် နကဵုဥပဒေ၊ နဲကဲဥပဒေတံရောၚ် ဂကောံအလဵုအသဳပၞာန် နူကဵုဌာနဝန်ဇၞော်ကေၚ်ကာအပ္ဍဲဍုၚ် ဒုတိယဝန်ဇၞော် သ္ကိုပ်ပၞာန်မေန်တူ ဟီုရ။
အပ္ဍဲအံက်တဝ် ၂၁ ကၠောန်လဝ်ကောံဓရီုစၠတ်ထဝ်ညးဍုၚ်ကွာန်ဂှ် ပရေၚ်ကံက်မံၚ်သြန်ဒၞာဲဂိက်သၞေဟ်ကၚ် အပ္ဍဲကဵုတွဵုရးမန် သွက်ဂွံပလီုကၠေံထောံအစဳဇန်နွံ/ဟၟဲ ညးစၞးစၠတ်ထဝ် ညးဍုၚ်ကွာန်ပွိုၚ်ဍုၚ်ရေဝ် မိမျေအ်တာန် သၟာန်ဏာလဝ် တင်သၟာန်ဂှ်ရ။
အကြာဒေသ ဒၞာဲဂိက်သၞေဟ်ကၚ် ကံက်မံၚ်အကံက်ဟွံလုပ်သၞောဝ် ပ္ဍဲကဵုဂၠံၚ်ဍာန် ပလံၚ်ဗစိုပ်ကပေါတ်ဗၞိက်တံဏံ ဂၠိုၚ်တိုန်ဂှ်ရ ၚုဟ်ကပေါတ်တိုန်ဍၚ်ကၠုၚ်မံၚ်ရဂှ် ညးစၞးစၠတ်ထဝ် ဟီုရ။
ပ္ဍဲကဵုတွဵုရးမန် ပံက်စွံလဝ် ဂိက်သၞေဟ်ကၚ် နွံ ၁၂ ဒၞာဲတုဲ ရဲဌာနပံၚ်ကောံနာနာတံ အဓိကစၟဳစၟတ်မံၚ် ဂဥုဲၜူမာဲ၊ ကွဳစက်လိုၚ်သေၚ်ဟၟဲ ကေုာံ ကပေါတ်ဟွံလုပ်သၞောဝ်တံရောၚ် သ္ကိုပ်ပၞာန်မေန်တူ သ္ဂးရ။
အပ္ဍဲအရာ စၟဳစၟတ်မံၚ်တံဂှ် ညံၚ်ဟွံဂွံဒှ်ပရေၚ်တာဒၞာကပေါတ်ဗၞိက်တံဂှ်ကီု၊ ပရေၚ်အာတ်သြန် ညံၚ်ဟွံဂွံဒှ် ကေုာံ ပရေၚ်ဆက်ဆောံလ္တူ ကုညးဍုၚ်ကွာန်တံ ညံၚ်ဂွံဆက်ဆောံအာဗွဲမယေန်သၞာၚ်ဂှ် စွံပရေၚ် ဇြိုဟ်ဟ်နက်က်တုဲ ကၠောန်ၜိုတ်ရေၚ်တၠုၚ်မံၚ်ရောၚ် ဟီုရ။
ဟိုတ်ဂှ်ရ ဒၞာဲဂိက်သၞေဟ်ကၚ်တံ ပရေၚ်ကံက်သြန် ယဝ်ရတေၚ်စပ်ကၠုၚ်နွံမ္ဂး နကဵုဥပဒေ၊ နဲကဲဥပဒေ ကေတ်အာအရေဝ်ရောၚ်ဂှ် သ္ကိုပ်ပၞာန်မေန်တူ ကလေၚ်သှ်ဆာဲလဝ် ပ္ဍဲကဵုစၠတ်ထဝ်ရ။
ဆဂး ပ္ဍဲဗလးတိမ္ဂး စပ်ကဵုဖ္ဍိုက်ဏာကပေါတ်တံတုဲ ဒၞာဲဂိက်သၞေဟ်ကၚ်တံ အာတ်ကေတ်မံၚ်သြန် နူကဵုညးဍုၚ်ကွာန်တံ နကဵုနဲကဲနာနာသာ်ကၠောန်မံၚ်ရောၚ်ဂှ် ညးဒေသတံဟီုတုဲ ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media