ရေဝ်၊ အံက်တဝ်ပါ ၂၃
အပ္ဍဲတွဵုရးမန် ပွိုၚ်ဍုၚ်ရေဝ် နူကဵုတမ်ဒပ် ခမရ ၅၉၁ ဖျေံသ္ဇိုၚ်ကွာန်ဘာ ကောန်ပၞာန်ယိုက်ဝန် ၃ တၠဂြိပ်တိတ်အာ နူကဵုဒပ်ရဂှ် ကောန်ကွာန်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အပ္ဍဲဂိတုအံက်တဝ်ပါ ၁၉ အခိၚ်နူဂယးပြဟ်ဂှ် ကောန်ပၞာန်ယိုက်ဝန် ပၞာန်လၟေၚ် ၁၅၊ ၃ တၠ လွဟ်ဟွံပါ အဟိန်စဴကၠုၚ်နူမုက်ပၞာန်ဂှ် ဂြိပ်တိတ်အာနူကဵုတမ်ဒပ်ရ။
လက္ကရဴ ကောန်ပၞာန်ယိုက်ဝန် ၃ တၠဂြိပ်တိတ်အာနူကဵုတမ်ဒပ်ဏံဂှ် ကရောၚ်ပၞာန်ဗမာ ဇြဟတ်ၜိုတ် ၁၀၀ တံ ဍံၚ်ဗက်ထဍေၚ်ဂၠိုက်ဂၠာဲ ဒၞာဲဒပ်ပၠန်ဂတးတံချဳဒရာၚ် ဒဵုကဵုကွာန်အကျာံဂှ်လေဝ် ကလေၚ်ရပ်ဂွံဏာ ဟွံမွဲပုဟ် သ္ဂးရ။
ကရောၚ်ပၞာန်ဗမာ ဗက်ခြးဂၠာဲမံၚ် ကရပ်ပွဳဗွိုၚ်ကွာန်အကျာံဂှ် အတိုၚ်ပွိုၚ်မွဲတ္ၚဲအိုတ်အာကီုလေဝ် ဟွံဆဵုတုဲ စိုပ်အခိၚ်သဝ်တ္ၚဲဂှ်ကလေၚ်စဴစိုပ်အာ ပ္ဍဲတမ်ဒပ် ခမရ ၅၉၁ ဂွံတီရ။
ဟိုတ်နူ ကရောၚ်ပၞာန်ဗမာ ထပက်လုပ်ကၠုၚ်တုဲ ညးဒေသကွာန်အကျာံကဵု ကရပ်ပွဳဗွိုၚ်ကွာန်တံဂှ် ၐိုန်ရဂွိၚ်ဖေက်မံၚ်ကီုလေဝ် ဂြိပ်ပါဲတိတ်အာ နူကဵုကွာန်ဟွံမွဲပုဟ် သ္ဂးရ။
ကောန်ပၞာန်ယိုက်ဝန် ၃ တၠဂြိပ်တိတ်ဏံဂှ် ဒဵုကဵုအံက်တဝ်ပါ ၂၂ ဂှ် ဟွံစိုပ်ကၠုၚ်ဇရေၚ် ဒပ်ပၠန်ဂတးဖျေံသ္ဇိုၚ်ဒေသတံဏီပုဟ်။
နူကဵုတမ်ဒပ် ဖျေံသ္ဇိုၚ်ကွာန်ဘာ ခမရ ၅၉၁ ပရေၚ်ကောန်ပၞာန်ယိုက်ဝန်ပၞာန်တံ ဂြိပ်တိတ်အာမံၚ်နူကဵုဒပ်ဂှ် ဒှ်မံၚ်မွဲဏှမွဲဏှတုဲ ဗွဲမဂၠိုၚ်တံဂှ် စိုပ်အာဇရေၚ် ဂကောံပၠန်ဂတးတံရ။
ပရိုၚ်-သြၚ်လောန်တိုၚ်မ်
Photo – MOI