ဗြဝတဳ၊ အံက်တဝ်ပါ ၂၃
အပ္ဍဲကဵုတွဵုရးကရေၚ် ဍုၚ်ဗြဝတဳ ဒၞာဲဒေသပယျဵုသေံ-ဗမာဂှ် ဒပ်ပၞာန်ဗမာတံဗက်ဂၠာဲရပ်မံၚ် ကပေါတ်ဗၞိက်သေံစေအ်အ်တုဲ သွက်ဂွံဖ္ဍိုက်နၚ်ကပေါတ် နူကဵုဍုၚ်သေံတံဂှ် ပဵုတုဲဝါတ်ဂါတ်ကၠုၚ်မံၚ်ရောၚ် ရဲဗွိုၚ်သၟာဗၞိက်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
နကဵုတၚ်ထ္ၜးဟိုတ် ကပေါတ်ဗၞိက်ဟွံလုပ်သၞောဝ်ဂးတုဲ ဗွဲကြဴဏံ ဗက်ရပ်သီကေတ်မံၚ်ကပေါတ်သေံ နွံမံၚ် ဘာအၚ်- ကအ်ကြိက် ဗြဝတဳ တွဵုရးကရေၚ်တံ ဒှ်ကၠုၚ်စေအ်အ်တုဲ သီုသီကေတ်ကပေါတ်ဂှ်ကီု ရပ်မၞိဟ်တုဲ နုက်ကေတ်လေဝ်ဟွံဂွံ သီုဖျေံထံၚ်တံ ဒှ်ကၠုၚ်မံၚ်ရ။
လ္တူဍုၚ် ပရေၚ်ကူသာန်ဗၞိက် ဗြဝတဳဂှ် အကြာမွဲၜါတ္ၚဲဏံ ဒပ်ပၞာန်ဗမာဗက်ဂၠာဲရပ်ကေတ် ဒၞာဲရုၚ်ဂိုဒံၚ်ခြိုၚ်စွံလဝ် ကပေါတ်သေံတံတုဲ အပ္ဍဲကဵုဒးဒုၚ်သီဏာဂှ်တှ်ေ ကပေါတ်ဗၞိက်သေံသၟာဗၞိက်မွဲတၠလေဝ် ဒးဒုၚ်သီဏာလဝ်ရဂှ် ရဲလ္တူဍုၚ်တံ သ္ဂးရ။
တုဲပၠန် ကရပ်ဍုၚ်ဗြဝတဳ ဒၞာဲဂိက်သၞေဟ်ကၚ်ဒဒန် နဒဳလေၚ်မျာၚ်ဂှ် ကွဳစက်ပေတ်ကာတ်ဍောတ်တ် ဖ္ဍိုက်လဝ်ကပေါတ်ဗၞိက်သေံတုဲ ပလံၚ်မံၚ်တရဴဇမၠိတံဂှ် ရပ်ချုက်ပလံၚ်စုတ်ဏာ ပ္ဍဲကဵုရုၚ်တမ်ဒပ် ၂၇၅ ရဂှ် ရဲလ္တူဍုၚ်တံ ဟီုရ။
ဟိုတ်နူဖ္ဍိုက်ပတိုန်နၚ် ကပေါတ်ဗၞိက်သေံဟွံလုပ်သၞောဝ်ဂးတုဲ ရပ်လဝ် ပ္ဍဲကွာန်နဒဳလေၚ်မျာၚ် ဍုၚ်ဗြဝတဳဂှ် ရဲသပေဝ်ယာကွဳစက်ဂှ် ကလေၚ်ဗၠးကီုလေဝ် ဒရိုၚ်ဗာကွဳစက်ညးဒဳကာတံ ဒဵုကဵုအံက်တဝ်ပါ ၂၂ ဂှ် ဟွံကလေၚ်ဗၠးဏီတုဲ ချုက်စွံလဝ် ပ္ဍဲကဵုရုၚ်တမ်ဒပ် ၂၇၅ ဖိုဟ်ဏီရောၚ် ဂွံတီရ။
အပ္ဍဲဍုၚ်ဗြဝတဳဂှ် ဒပ်ပၞာန်ဗမာ ပရေၚ်ဗက်ရပ်ကပေါတ်သေံတံ ဒှ်ကၠုၚ်စေအ်အ်သၟးဟွံက သီုကဵုဂကောံရပ်လွဟ် ဗွဲမဂၠိုၚ်တံဂှ် ဒးဗဇဴကဵုမံၚ်သြန် ဂၠိုၚ်လောန်အာတုဲ သွက်သၟာဗၞိက်တံဂှ် ဒှ်မံၚ်အခက်အခုဲ ဗွဲမဂၠိုၚ်ရောၚ် ရဲပွဳဗွိုၚ်သၟာဗၞိက်တံ ဟီုဂးမံၚ်ရ။
ကပေါတ်သေံကဵုကွဳစက်တံ ယဝ်ဒးဒုၚ်ရပ်အာမွဲမွဲဝါမ္ဂး သၟာဗၞိက်မွဲတၠဂှ် ဒးဆောံလေၚ်အာ သြန်ကိုတ်ဂၠိုၚ်ကဵုလ္ၚီ လက်ကိုတ်တုဲ မၞိဟ်ဂွံကလေၚ်ဗၠးတိတ်ကၠုၚ်ဂှ်လေဝ် ဒးနုက်ကေတ်ကဵုသြန်နွံတုဲ ရဲစှ်ေအာထံၚ်လေဝ် နွံဗွဲမဂၠိုၚ်ရောၚ် သ္ဂးရ။
ဒပ်ပၞာန်ဗမာတံ ဟိုတ်နူဗက်ရပ်ကေတ်မံၚ် ကပေါတ်ဗၞိက်သေံကြာန်န်ဂှ်တုဲ ၚုဟ်မးကပေါတ်သေံ အကြာတွဵုရးကရေၚ်တံ သၠုၚ်တိုန်ကၠုၚ်မံၚ် မွဲအဆံၚ်တုဲမွဲအဆံၚ် ၚုဟ်က္ဍၚ်လောန်အာတုဲ ဂအာၚ်ဗွဝ်ဖျာတံလေဝ် လီုမံၚ်အိုတ်ယျ။
အပ္ဍဲဍုၚ်ဗြဝတဳ ဒေသပယျဵုဂှ် ရပ်မံၚ်ကပေါတ်ဗၞိက်သေံ ကြာန်မံၚ်ဂှ်ရ ဒၞာဲအကြာဂၠံၚ် ပွိုၚ်ဍုၚ်ဘာအၚ်၊ သဓီု၊ ၜဳကလေၚ်ကဵု ကျာ်ထဝ်တံဂှ် ကပေါတ်သေံဟီုတှ်ေ တံၚ်ဖျေံနူကွဳစက်တုဲ ဒပ်ပၞာန်ဗမာတံ သီကေတ်ထောံ သီုဖအိုတ် မဒှ်ရ။
ပရိုၚ်-သြၚ်လောန်တိုၚ်မ်
Photo – MOI