မတ်မလီု၊ အံက်တဝ်ပါ ၂၆
ကပေါတ်ကၠုၚ်နူသေံတံဂှ် ဒပ်ပၞာန်ဗမာ ဟိုတ်နူကၟာတ်ဆိုအ်တာဒၞာ ဗက်ဂၠာဲရပ်မံၚ်ဂှ်ရ အပ္ဍဲဍုၚ်ဗမာကပေါတ်ကၠုၚ်နူသေံတံ အောန်စှ်ေအာကွေံကွေံတုဲ ဂအာၚ်ဗွဝ်ဖျာဒမၠုတံ ဇၞော်တိုန်ကၠုၚ်မံၚ်ရောၚ် သၟာဗၞိက်တံကဵုညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဟိုတ်နူဒပ်ပၞာန်ဗမာ ဗက်ဂၠာဲရပ်မံၚ် ကပေါတ်ကၠုၚ်နူသေံတံဂှ်တုဲ နူကဵုဂၠံၚ်ဍာန်လုပ်သၞောဝ်ဂှ်လေဝ် ဖ္ဍိုက်ကေတ်နၚ်ကပေါတ်သေံ အခေါၚ်ဗၠးဗၠးၜးၜးဟွံမွဲဂှ်ရ နူကဵုဒေသပယျဵုဂၠံၚ်ဂြိုပ် ဒၞာဲတိဍာ် ဂကောံရပ်လွဟ်ကောန်ဍုၚ်အရၚ်တံ ထိၚ်ချုက်လဝ်ဂှ် သၟာဗၞိက်တံ ဖ္ဍိုက်ပလံၚ်ပၠုပ်မံၚ် ဒဵုစိုပ်အပ္ဍဲဍုၚ်တံရောၚ်။
ဗွဲကြဴဏံ အပ္ဍဲကဵု ပလံၚ်ဗစိုပ်ကပေါတ်သေံတံမ္ဂး ဂကောံပွဳဗွိုၚ်သၟာဗၞိက်တံသၟးဟွံက လိၚ်ကေတ် ညးတာလျိုၚ်ဒပ်ပၞာန်ဗမာ ကဆံၚ်အကြာပ်ဒပ် ကောန်ဒပ်တံကီု၊ ရဲသၞာဲဒါယိုက်ဝန်အလဵုအသဳတံ သီုကဵုကၟိန်အိန်ထံၚ်ကောန်ဇာတ်တံဟွံသှ်ေ ပၞုက်ဒမၠု ပလံၚ်ဗစိုပ်ကဵုမံၚ်ကပေါတ်သေံ နူကဵုဂၠံၚ်ဟွံလုပ်သၞောဝ် ဇၞော်ကဵုဇြဟတ် ကၠောန်မံၚ်အိုတ်ရဂှ် သ္ဂးရ။
ညးကြပ်ကဵုပွဳဗွိုၚ်ဒပ်ပၞာန်တံကီု၊ ရဲသၞာဲဒါယိုက်ဝန်လ္ၚဵုကဵု ကၟိန်အိန်ထံၚ်ဂှ် နကဵုဂကောံ နူလ္ဂုၚ်၊ နေဗျဳဒဝ်၊ စိုပ်မာန္တလေဝ်။ နူကဵုရးဗဂေါမွဲအဆံၚ် အာလပါ်တွဵုရးမန် တွဵုရးကရေၚ် စိုပ်ဒေသပယျဵုသေံတုဲ နကဵုဂၠံၚ်ဒမၠု ဖ္ဍိုက်ပလံၚ်ပၠုပ်ကေတ်နၚ်လဝ် ကပေါတ်ဍုၚ်သေံတံရောၚ်။
နူကဵုဏံ လ္ၚဵုတံဂှ် နူကဵုဂၠံၚ်ဂြိုပ်မွဲအဆံၚ် ပလံၚ်ပၠုပ်နၚ်လဝ် ကပေါတ်ဍုၚ်သေံတံရ။
တုဲပၠန် နူကဵုတွဵုရးမန်၊ ကရေၚ် အတိုၚ်ဂၠံၚ်ဇၞော်ကွဳစက် အာဗဂေါဝ်၊ လ္ဂုၚ်၊ မာန္တလေဝ်မ္ဂး ကဵုသြန်တတ်အာဂိက်သၞေဟ်ကၚ် ဒပ်ပၞာန်တံအဆံၚ်ၚ်တုဲ ညိလေဝ်ဟွံဒးဒုၚ်ရပ် နကဵုကွဳစက်သ္ၚိ ကွဳစက်လိုၚ် ကွဳစက်ဟိုၚ်လက်တံ ဖ္ဍိုက်ကပေါတ်သေံပလံၚ်စမံၚ်ရဂှ် အတိုၚ်ညးဆဵုနမတ်တံဟီုလဝ် ဂွံတီရ။
ညးတာလျိုၚ်ပၞာန်တံ ဖ္ဍိုက်ကပေါတ်ဗၞိက်သေံတုဲ ပရေၚ်စၟဳစၟတ်ဟွံမွဲ တတ်အာဂိက်သၞေဟ်ကၚ်စၟဳစၟတ် ပရေၚ်ဂီုကၠီုတံမာန်တုဲ ကပေါတ်ဗၞိက်သေံသၟးဟွံက လိၚ်ဖ္ဍိုက်မကမ်၊ လွဟ် ကပေါတ်ပၞာန်တံလေဝ် နွံမံၚ်ဂှ် ဂွံတီလဝ် နူကဵုရိုဟ်ကၞက်ပရိုၚ် ဗလးတိတံရ။
ကွဳစက်ရဲဒပ်ပၞာန်တံဂှ် ပရေၚ်စၟဳစၟတ်ဟွံဒးကေတ်မွဲသာ် ဍေံတံကေတ်လဝ်သြန်ဂၠိုၚ်ၚ်တုဲ ဗလးကဵုမံၚ်ရောၚ် သ္ဂးရ။
ညးဍုၚ်ကွာန်တံ ကာလဖ္ဍိုက်ပတိုန်ကပေါတ်ဗၞိက်သေံမ္ဂး ဟွံလုပ်သၞောဝ်ဂးတုဲ ဒပ်ပၞာန်ဗက်ဂၠာဲသီကေတ်မံၚ်ဂှ်တှ်ေ ညးဍုၚ်ကွာန်တံ ဆောံလေၚ်အာလဝ်ဇၞော်ကဵုဇြဟတ် သြန်ကိုတ်ကဵုလက်ဗွဲမဂၠိုၚ်ကီုလေဝ် ရဲဂကောံပၞာန်တံ လိၚ်ပလံၚ်စမံၚ်ကပေါတ်ဗၞိက် ကၠုၚ်နူသေံဂှ်တှ်ေကေတ်သြန်တုဲ ညိဟွံရပ် ကဵုလဝ်အခေါၚ်သာသာ မဒှ်ရ။
လၟုဟ်ပြဟ်ဟ်ဏံလေဝ် အကြာတွဵုရးကရေၚ်ကဵုတွဵုရးမန်ဂှ် ကပေါတ်ကၠုၚ်နူသေံ နွံမံၚ်ဗွဲမဂၠိုၚ်တုဲ ကွဳစက်ဖ္ဍိုက်ကပေါတ်သေံတံကီု ဒၞာဲဂိုဒံၚ်ခြိုၚ်စွံလဝ်ကပေါတ်တံကီု လုပ်ရပ်တုဲ မၞိဟ်ဂှ်ဖျေံထံၚ် ကပေါတ်ဗၞိက်တံဂှ် သီကေတ်ထောံ ဗွဲအတေၚ်အဓ္ဓမရ။
ပရိုၚ်-သြၚ်လောန်တိုၚ်မ်
Photo – Social Media