မတ်မလီု ၊ အံက်တဝ်ပါ ၂၆
နူကဵုစၠတ်ထဝ်တွဵုရးမန် ကော်အာကောံဓရီု ပရေၚ်ကာမံက်တိုန်ရောၚ် ပ္ဍဲအံက်တဝ်ပါ ၂၃ ဂှ် နူကဵုစၠတ်ထဝ်မန် ကဵုသမ္တီလလောၚ်တြးလဝ်ရ။
အပ္ဍဲကဵုအံက်တဝ်ပါ ၃၀ ဏံ သွက်ဂွံကၠောန်အာ ကောံဓရီုကာမံက်တိုန်ရောၚ် လလောၚ်တြးလဝ်ရ။
အတိုၚ်ညးကြပ်ကဵုစၠတ်ထဝ်တံဟီုမ္ဂး သွက်ဂွံသ္ပဒတန်ပရေၚ်ခါန်ကၞက် ဝန်ဇၞော်ပရေၚ်ဂီုကၠီုဒေသပယျဵုတၟိဂှ် ကော်ကောံဓရီုပရေၚ်ကာမံက်တိုန်ရောၚ် ဂွံတီရ။
စၞးအဇာ ဝန်ဇၞော်ပရေၚ်ဂီုကၠီုဒေသပယျဵု သ္ကိုပ်ဗိုလ်ဇၞော်ကျဝ်ဇွာမျေအ်ဂှ် ပြံၚ်လှာဲခါန်ကၞက်လဝ် သ္ကိုပ်ဗိုလ်ဇၞော်ယေဝ်ထောဋ်ရဂှ် နူကဵုအလဵုအသဳပၞာန် ပတိတ်လဝ်ပရိုၚ် ပ္ဍဲအံက်တဝ်ပါ ၂၂ ရ။
ဟိုတ်ဂှ်ရ ပ္ဍဲကောံဓရီုကာမံက်တိုန် စၠတ်ထဝ်တွဵုရးမန်ဏံ သ္ပဒတန်ပရေၚ်ခါန်ကၞက် ဝန်ဇၞော်ဂီုကၠီုပယျဵုမန် သ္ကိုပ်ဗိုလ်ဇၞော် ယေဝ်ထောဋ်တုဲ သီုကဵုကၠောန်ပေါဲယဵုဗစာရောၚ် ဂွံတီရ။
ဟိုတ်နူပရေၚ်စလာဘ်ဗဇဴ ကမၠောန်ကူသာန်ဗၞိက် ဒးဒုၚ်တေၚ်စပ်လဝ်ဂှ်ရ ကဵုအခေါင်ဒေါံဇူ သ္ကိုပ်ဗိုလ်ဇၞော် ကျဝ်ဇွာမျေအ်တုဲ ပလံၚ်စွံလဝ်ဒၞာဲဒပ်ဇြဟဟ်အရန် ပ္ဍဲကဵုဌာန်ဂအုပ်ပၞာန်ရးအဂၞဲရဂှ် ဂွံတီလဝ် ညးကြပ်ကဵု အလဵုအသဳပၞာန်တံရ။
အခိၚ်သ္ကိုပ်ဗိုလ်ဇၞော်ကျဝ်ဇွာမျေအ် ကေတ်တာလျိုၚ်ဝန်ဇၞော်ဂီုကၠီုပယျဵု ဏံ ကေတ်သြန်စလဝ်လာဘ်ဗဇဴ ကမၠောန်ကူသာန်ဗၞိက် ဟွံလုပ်သၞောဝ်ဂှ်ကီု၊ ဂွံမံၚ်သြန်လုပ်လၟေၚ်ၚ်ဂိတု နူကဵုသၞေဟ်ကၚ်ဂိက်နာနာတံကီု ဂွံလဝ်သြန် ကိုတ်ကဵုလ္ၚီကိုတ်တံတုဲ အကြာပွိုၚ် ၄ သၞာံဏံဂှ် ဒှ်အာသေဌဳ သ္ဂးမံၚ်အိုတ်ရ။
ပရိုၚ်-သြၚ်လောန်တိုၚ်မ်
Photo – MOI