ပျုၚ်ယာန်၊ အံက်တဝ်ပါ ၂၆
ပ္ဍဲဂၠးကဝ် ဒပ်ပၞာန်ဍုၚ်နိဂီုကိုဝ်ရဳယာသၟဝ်ကျာ ဇြဟတ်ခိုဟ်အိုတ်ဂွံဒှ်ကၠုၚ် ညံၚ်ဂွံဒက်ပတန်အာ ကေုာံ သွက်ဂွံသၠုၚ်ပတိုန်အာ အစောန်စရာဲဍာ်ဒကေဝ်ပၞာန်ခေတ်တၟိတံဂှ် က္ဍိုပ်သ္ကိုပ်ကိုဝ်ရဳယာသၟဝ်ကျာ ကေၚ်ဂျုၚ်အန် ကဵုလဝ်စၞောန်ပ္ညုၚ်ရ။
ပ္ဍဲမဟာဍုၚ်ဇၞော်ပျုၚ်ယာန် အံက်တဝ်ပါ ၂၂-၂၃ ပွိုၚ်ၜါတ္ၚဲ ကၠောန်လဝ်သဘၚ်သဳကၠဳသ္ကိုပ်ဒပ်တံဂှ် ကေၚ်ဂျုၚ်အန် ဟီုလဝ်အတိုၚ်ဏံရောၚ် နူကဵုဌာန်ပရိုၚ် KCNA အလဵုအသဳကိုဝ်ရဳယာသၟဝ်ကျာ ထမံက်ပတိတ်လဝ်ရ။
တုဲပၠန် နကဵုဗီုပြၚ်ဇကု ကိုဝ်ရဳယာသၟဝ်ကျာ သၠုၚ်ပတိုန်ကၠောန်အာပရေၚ်အပြံၚ်လှာဲပၞာန်တံတုဲ ဒပ်ပၞာန်ဇြဟတ်ခိုဟ်အိုတ်ညံၚ်ဂွံဒှ်ကၠုၚ် ဒက်ပတန်အာရောၚ် ဟီုလဝ်ရ။
ပ္ဍဲကဵုဂိတုဖေဖဝ်ဝါရဳတုဲကၠုၚ်တေံ ကၠောန်လဝ်သဘၚ်သဳကၠဳဗော်ဂွံအဝဵု ကိုဝ်ရဳယာသၟဝ်ကျာ အလန်နဝမတုဲ ဗွဲကြဴဏံ ကၠောန်ကောံဓရီုသ္ကိုပ်ဒပ် အလဵုရးနိဂီုဍုၚ်မွဲ အလန်ပထမ မဒှ်ရ။
ပ္ဍဲကဵုသဘၚ်သဳကၠဳဏံ အကြာပွိုၚ် ၅ သၞာံဏံ အစောံစရာဲဍာ်ဒကေဝ်ပရေၚ်ပၞာန်ကိုဝ်ရဳယာသၟဝ်ကျာ ဇြဟတ်ညံၚ်ဂွံခိုဟ်တိုန်အာ ကေၚ်ဂျုၚ်အန် ဖျေံလဝ်တုဲ လွဟ်လက်နက်နျူကလဳယာကေုာံ နဲကဲကမ်သၠောဝ်တံ ညံၚ်ဂွံဖောအ်ဗြဴတောတက် ကၠောန်အာညိဂှ် စွံပရေၚ်ဇြိုဟ်နက်တုဲ ဟီုလဝ်ရ။
မွဲလပါ်တေံပၠန် သွက်ဂွံကလေၚ်တက်ကျာသဳကၠဳကဵု ကိုဝ်ရဳယာသၟဝ်ကျာဂှ် သမ္မတအမေရိကာန် ဒဝ်နေဝ်ထရ စိုတ်လုပ်စမံၚ်ကီုလေဝ် က္ဍိုပ်သ္ကိုပ်ၜါဍုၚ်ဏံ ဂွံဆဵုမာန်ဂှ် တၠုၚ်လအာအောန်မံၚ်ဏီ မဒှ်ရ။
ပရေၚ်ကေၚ်ဂျုၚ်အန် ကဵုလဝ်စၞောန်ပ္ညုၚ် ဗီုဏံဂှ် အစောန်စရာဲ လွဟ်လက်နက်နျူကလဳယာကေုာံ နဲကဲကမ်သၠောဝ်တံဟွံက အကာဲအရာ ထပ်သၠုၚ်ပတိုန်အာ အစောံစရာဲဍာ်ဒကေဝ်ပရေၚ်ပၞာန် ကိုဝ်ရဳယာသၟဝ်ကျာဂှ် ထ္ၜးမံၚ်လစွံစိုတ် မဒှ်ရ။
Ref:Reuters