မတ်မလီု ၊ အံက်တဝ်ပါ ၂၆
အပ္ဍဲတွဵုရးမန် ပွိုၚ်ဍုၚ်ဗွဲမဂၠိုၚ်တံဂှ် စနူတ္ၚဲတံဏံတုဲ ပ္ဍဲကဵုကာလပေါဲသဘၚ် ကရောံပေါဲသှ်ပဝါတံဂှ် ကလေၚ်ကၠောန်မံၚ် ဝိုၚ်ဝေၚ်တံရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အခိၚ်ကာလကသီုဗြဲဂူတေံ ဝိုၚ်ဝေၚ်ကဵုပေါဲသဘၚ်ဇူမံၚ်ကီုလေဝ် ပ္ဍဲဒၞာဲရုၚ်ခိုၚ်ၚ်ကၠိုက်က်တံဂှ် ကၠောန်မံၚ်နွံတုဲ အခိၚ်လၟုဟ်ဏံ အခိၚ်ညးဂမၠိုၚ်အာကြေၚ်ဝေၚ်ဗဵုပေါဲသဘၚ်တံဂှ် ကလေၚ်စုတ်လဝ် သီုကဵုဝိုၚ်ဝေၚ်တံရ။
သွက်ဂွံဒၞာတာကၟာတ်ထောံ ပရေၚ်ပံက်လဝ်ဝိုၚ်ဝေၚ်တံဂှ် ဂလာန်ပတိုန်လဝ်အံၚ်ဇၞးအာ ပ္ဍဲကဵုစၠတ်ထဝ်မန် ကီုလေဝ် ကလေၚ်ကၠောန်မံၚ်ဝိုၚ်ဝေၚ် ဗီုလၟုဟ်ဏံဂှ် ဒှ်ပရေၚ်ဟွံပကာကဵုစၠတ်ထဝ်ရောၚ် အကြာညးဍုၚ်ကွာန်တံ ဟီုဂးပါ်ပါဲမံၚ်ရ။
ထ္ၜးဟိုတ်ကဵုပေါဲသဘၚ်သှ်ပဝါဂှ် ကော်ကေတ်သၟာဒယှ်ေ တၠရမျှာၚ်တံကီု၊ ဝိုၚ်ဂဳတ၊ ပေါဲဇာတ်တံတုဲ ကၠောန်စမံၚ်ဝိုၚ်ဝေၚ်တံဂှ် ဂလာန်အံၚ်လဝ်ပ္ဍဲစၠတ်ထဝ်ကီုလေဝ် ပ္ဍဲအဆံၚ်သၟဝ်ဏံဟွံအံၚ်ဇၞးပုဟ်ဂှ် ညးဒေသၜဳကလေၚ်မွဲတၠ ပါ်ပါဲရ။
“ဍေံတေံ ကော်ကေတ်ညးတၠရမျှာၚ်တံ ဝိုၚ်ဂဳတတံ ပေါဲဇာတ်တံပါစုၚ်ၚ်ရ။ အာဝါဒဵု အာန်ဂလုၚ်တံပါ၊ ပေါဲစာၚ်လေဝ်ပါ၊ ဝိုၚ်ဖေဝ်တံပါ၊ ပ္ဍဲလ္တူစၠတ်ထဝ် ဂလာန်ပတိုန်လဝ် အံၚ်ဂှ် အံၚ်အာရ၊ သၟဝ်ဏံ ဟွံအံၚ်ပုဟ်၊ ဗွဲကြဴတှ်ေ ပဵုပရေံအာဏောၚ်” သာ်ဝွံ သ္ဂးရ။
သွက်ဂွံကၟာတ်ထောံဝိုၚ်ဝေၚ်တံဂှ် ဂလာန်အံၚ်ဇၞးအာကီုလေဝ် နူကဵုအဆံၚ်သၟဝ်စဵုကဵုစိုပ်အဆံၚ်လ္တူတေံ ကေတ်သြန်တုဲ ကဵုလဝ်အခေါၚ်ဂှ်ရ ပရေၚ်ဝိုၚ်ဝေၚ်ဂွံကၠေံဟီုဂှ် ဒးကေတ်ထောံ ကေတ်အရေဝ်သီုဖအိုတ်မှ ဒှ်မာန်ရောၚ် ညးဆက်ဟီုရ။
ဟိုတ်နူဝိုၚ်ဝေၚ်ဂှ်ရ ဘဝလီုအာသၟးဟွံက ကိစ္စဒှ်ဟွံထေက်တံ ဒှ်အာလဝ်ကီု ပရေၚ်ကဵုလဝ်အခေါၚ် ပံက်ဝိုၚ်ဝေၚ်တံဏံဂှ်ရဲကၠိုဟ်ခၠၚ်တံ ဘိုၚ်သောၚ်ကလးကဵုထေက်တုဲ နကဵုဂလာန်ကၟာတ်ဝိုၚ်ဝေၚ်သၟးဂှ် မုလေဝ်ဒှ်ကၠုၚ်မာန်ဟွံသေၚ်ပုဟ် ညးဒေသရေဝ်မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ဟိုတ်နူဝိုၚ်ဝေၚ်တံဏံ ဘဝလီုအိုတ်၊ ဘဝလီုတုဲ ကိစ္စဟွံဒှ်ထေက်တံ ဒှ်အာလဝ်၊ ဒှ်ပရေၚ်လီဠာန်တံ ဗွဲမဂၠိုၚ်။ ကိစ္စဆက်စပ်ကဵု ပရေၚ်ဝိုၚ်ဝေၚ်တံရ။ ဣဏံဂှ်တှ်ေ မၞိဟ်ကၠိုဟ်ဂၠိုၚ်ၚ်တံ ဘိုၚ်သောၚ်ကလးကဵုတှ်ေ စိုပ်တရဴဂၠိုၚ် ခယျ။ ဆၜိုတ်ပတိုန်ဂလာန်မွဲဍောတ်ဏံ မုလေဝ်ဒှ်ကၠုၚ်မာန်ဟွံသေၚ်ပုဟ်” သာ်ဝွံ သ္ဂးရ။
သွက်ဂွံကၟာတ်ဝိုၚ်ဝေၚ် ပတိုန်လဝ်ဂလာန်ဂှ် တုဲကၠုၚ်ဂိတုဂျောန် ၁၉ တေံ ညးစောဒကဟွံမွဲ သ္ပလဝ်ဒတန် ပ္ဍဲကဵုစၠတ်ထဝ်တွဵုရးမန်ရ။
ပ္ဍဲအကြာဒေသ ပရေၚ်ဝိုၚ်ဝေၚ် ညံၚ်ဂွံအိုတ်ကၠေံအာကေုာံ သၠုၚ်အသိၚ်တုဲရပ်စပ်အာရောၚ် နူကဵုဂကောံအလဵုအသဳတွဵုရးမန် ဝန်ဇၞော်ပရေၚ်ကေၚ်ကာမၞိဟ် ဥူတေန်ဇြဝ်ထောန် ကဵုလဝ်ဂတိ ပ္ဍဲကဵုစၠတ်ထဝ် နွံရ။
အပ္ဍဲတွဵုရးမန် ပရေၚ်ပံက်ဝိုၚ်ဝေၚ်တံဂှ် နူကဵုအလဵုအသဳအဆက်က်တေံ နကဵုပရေၚ်လုပ်သၞောဝ် ကဵုလဝ်အခေါၚ်ဟွံမွဲကီုလေဝ် ပရေၚ်သီအဝဵုဒှ်ကၠုၚ်တုဲ စိုပ်လက်ထက် သ္ကိုပ်ဝန်ဇၞော်အလဵုအသဳပၞာန်ခါန်ကၞက် အဆက်က်တံ ညံၚ်ဂွံလဝ်အခေါၚ်လုပ်သၞောဝ် ပံၚ်ဝိုၚ်ဝေၚ်ဇၞော်ကဵုဇြဟတ် သီုကဵုကၠောန်ပေါဲသဘၚ်တ္ၚဲဇမၠိၚ်တံ မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media