ယှိုဲကျေန် ၊ အံက်တဝ်ပါ ၂၇
အပ္ဍဲရးဗဂေါ ပွိုၚ်ဍုၚ်ယှိုဲကျေန် ပ္ဍဲကွာန်အေန်တိုက် ပေါဲဗတိုက်ဟွံမွဲမွဲသာ် ၜၚ်ကျာဒပ်ပၞာန်ဗမာကြဳဗုမ်တုဲ ညးဍုၚ်ကွာန် ချိုတ် ၂ တၠ၊ ဒးဝပ် ၆ တၠရဂှ် နူကဵု KNU ဗဟဵု ပတိတ်လဝ်ပရိုၚ် ပ္ဍဲအံက်တဝ်ပါ ၂၆ ဂှ်ရ။
လောန်ကၠုၚ်အံက်တဝ်ပါ ၂၂ ၜိုတ်အခိၚ်နူဂယး ၁၀ နာဍဳ ၜၚ်ကျာဂျက်ဖိုက်တာဒပ်ပၞာန်ဗမာ ၂ မ ကြဳဖျေံဗုမ် ပ္ဍဲကဵုကွာန်အေန်တိုက်ဂှ် ပေါဲဗတိုက်မွဲသာ်လဝ် ဟွံမွဲလဝ်ပုဟ်။
ဟိုတ်နူပရေၚ်ကြဳဗုမ်ဏံဂှ် ကိုယေဝ်ထက်အံၚ် အာယုက် ၃၃ သၞာံ၊ ဒဝ်ဇြေန်မာမျေအ် အာယုက် ၅၅ သၞာံ ဒးကဝေက်မကမ်ဗုမ် ချိုတ်အာတုဲ ညးဗြဴ ၆ တၠ ဒးလဝ်ဝပ်ရ။
တုဲပၠန် သ္ၚိရဲကွာန်အေၚ်တိုက် သ္ၚိဥူဝေၚ်သိုဝ်၊ ဥူတိၚ်ဝေၚ် ကဵု ဥူဝေၚ်ထိုက်တံ ၃ မ ဒးကဝေက်မကမ်ဗုမ်တုဲ လီုလာ်အာလဝ်ရဂှ် နူကဵုဗော်သွးကရေၚ် KNU ပတိုန်ထ္ၜးလဝ် သီုကဵုသက်သဳ ဗီုရုပ်စၟတ်သမ္တီတံရ။
ဒပ်ပၞာန်သီအဝဵုတံ ဟွံဒဂေတ်ဗက် တၚ်တုပ်စိုတ်ဘုံအာသဳယာန်တုဲ အလုံဍုၚ်မွဲ ပန်မံၚ်ကဵုလွဟ်ဇၞော်ကီု ပရေၚ်ကြဳမံၚ်ဗုမ်တံ ကၠောန်မံၚ် အမှုရာဇဝတ်ပၞာန် အရိုဟ်ဟ်တ္ၚဲရောၚ် KNU သ္ဂးရ။
အတိုၚ်လိက်ဒုၚ်စဳရေၚ် နူကဵုဂကောံသုတေသနအေန်သတဳကျု ပရေၚ်စဵုဒၞာဂီုကၠီုဍုၚ်ဗမာ MDSI မ္ဂး တုဲကၠုၚ် အကြာသိပ်တမ်ပါ ပွိုၚ်မွဲဂိတုဂှ် ပ္ဍဲအလုံဍုၚ်မွဲ ဒပ်ပၞာန်ဗမာကြဳလဝ်ဗုမ် ၆၅၀ ဝါပြၚ် ကလိလောန်ဒုဟ် ကၠောန်လဝ်နွံရ။
ဟိုတ်နူဒပ်ပၞာန်ဗမာ ကြဳလဝ်ဗုမ်ဂှ်ရ ညးဍုၚ်ကွာန်ကောန်အရာပ် ဟွံအောန်နူ ၁၄၅ တၠ ချိုတ်အာ၊ ဒးလဝ်ဝပ် ၂၁၄ တၠနွံတုဲ ပရေၚ်ကြဳဗုမ်တံဂှ် မွဲဂိတုတုဲမွဲဂိတု သၠုၚ်တိုန်ကၠုၚ်မံၚ်ရောၚ် လလောၚ်တြးလဝ်နွံရ။
ပရိုၚ်-သြၚ်လောန်တိုၚ်မ်
Photo – Social Media