ထဝါဲ၊ အံက်တဝ်ပါ ၂၇
အပ္ဍဲခရိုင်ထဝါဲ ပရေၚ်ဍာ်ဇၞော် တိလိုက်စှ်ေ ပ္ဍဲပွိုၚ်ဍုၚ်ဂမၠိုၚ် က္တဵုဒှ်လဝ်တုဲ လက်ကရဴဏံ မၞိဟ်ယဲဂၞဴကဵု ယဲခၞော်စှော်တံ တောဲဆက်ဒှ်ကၠုၚ်ဂၠိုၚ် မံၚ်ရောၚ်ဂှ် ဂွံတီနူ ဂကောံသုတေသန FE 5 Thanintharyi ရ။
တုဲကၠုၚ်ဂိတုသိပ်တမ်ပါတေံ ပ္ဍဲခရိုင်ထဝါဲ ကွာန်နွံမံၚ် ပွိုၚ်ဍုၚ်လံၚ်လုၚ်ဂှ် ပရေၚ်ဍာ်ဇၞော် တိလိုက်က္တဵုဒှ်လဝ်တုဲ ညးဒေသတံ ဒှ်တိုန် ယဲဂၞဴကဵုယဲခၞော်စှော်တံရ။
ဟိုတ်နူဗြဲဂူလဝ်ဆက်က် ဟွံပိုတ်တုဲ ဍာ်ဇၞော် ဒဵုသရိုဟ် ပ္ဍဲကဵုပွိုၚ်ဍုၚ် ခရိုင်ထဝါဲတံ ဒှ်လဝ်ဂှ်ရ ဍာ်အးအးဇ္ၚးဇ္ၚးဟွံမွဲတုဲ ယဲဂၞဴ ဒှ်တိုန်သ္ဂးရ။
ကွာန်လ္ၚဵုနွံမံၚ် ပ္ဍဲပွိုၚ်ဍုၚ်လံၚ်လုၚ်ဂှ် ဟိုတ်နူဒးဒုၚ်လဝ်ဘဲ တိလိုက် ဇၞော်ကဵုဇြဟတ်ဂှ်ရ မွဲကွာန်မ္ဂး မၞိဟ်ၜိုတ် ၁၀ တၠ စဒှ်မံၚ်ယဲဂၞဴကဵုယဲခၞော်စှော်တံရဂှ် ညးတာလျိုၚ် FE 5 Thanintharyi မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပြဟ်ဟ်ဏံ ဟိုတ်နူ ပရေၚ်အာကၠုၚ်ဂၠံၚ်ဍာန်ခက်ခုဲမံၚ်တုဲ သွက်ဂွံဝဳ ယဲဂၞဴလီုကဵု ယဲခၞော်စှော်တံဂှ် ဒှ်မံၚ်အခက်အခုဲကဵုဂဥုဲဇဗတံရောၚ် ညးဆက်ဟီုရ။
မွဲလပါ်ပၠန် ဟိုတ်နူတိလိုက်အာလဝ်တုဲ ဒးကလေၚ်ပလေဝ် ဍာန်ဂၠံၚ်ကီု ဒဒန်လီုမံၚ်သၟးဟွံက သွက်သ္ဂောံဂွံ ဍာ်သုၚ်အးအးတံမာန်ဂှ် ဒးကၠောန်အာမံၚ်ပရေၚ်ရီုဗၚ်ဟံၚ်ပြာ်တံ အဆက်က်ရောၚ် သ္ဂးရ။
စနူကဵုဂိတုသိပ်တမ်ပါ နူ ၂၅ ဒဵုစိုပ် ၂၉ ဟိုတ်နူပရေၚ်ဍာ်ဇၞော်တိလိုက် ဒှ်ကၠုၚ်လဝ်ပ္ဍဲခရိုင်ထဝါဲဂှ်ရ ညးဍုၚ်ကွာန်ကောန်အရာပ် ၄၀ တၠပြၚ် လမျီုဒးဆောံလေၚ်ကၠုၚ်လဝ်နွံရ။
ပရိုၚ်-သြၚ်လောန်တိုၚ်မ်
Photo – CJ