မတ်မလီု၊ အံက်တဝ်ပါ ၃၁
သွက်ဝန်ဇၞော်ပရေၚ်ဂီုကၠီုဒေသပယျဵုမန် ဂကောံအလဵုအသဳပၞာန် သ္ကိုပ်ဗိုလ်ဇၞော် ယေဝ်ထောဋ်ဂှ် ပ္ဍဲစၠတ်ထဝ်တွဵုရးမန် ညးဒစဵုဒစးဟွံမွဲ ခါန်ကၞက် သ္ပလဝ်ဒတန်ရ။
ပ္ဍဲအံက်တဝ်ပါ ၃၀ အခိၚ်နူဂယး ကၠောန်လဝ်ကောံဓရီု ပရေၚ်ကာမံက်တိုန် စၠတ်ထဝ်တွဵုရးမန်ဂှ် ခါန်ကၞက်သ္ပဏာဒတန်ရ။
သ္ကိုပ်ဗိုလ်ဇၞော်ယေဝ်ထောဋ်ဝွံ နွံအာယုက် ၄၉ သၞာံတုဲ စှ်ေလဝ်နူဘာ အလံၚ်ဗိုလ် ဗတောန်ကမၠောန် လၟေၚ် ၂၅ မဒှ်ရ။
တမ်ဝါဒိတေံ ယိုက်ဂၠေၚ်စှ်ေလဝ်တာလျိုၚ် နကဵုဖက်ဆော ညးတာလျိုၚ် ဒပ်ဇြဟတ်အရန် ပ္ဍဲကဵုဌာန်ဂအုပ်ရးပၞာန်အဂၞဲတုဲ ဒှ်ကောန်ဇာတိ ဍုၚ်လှေဝ်ကူ ရးလ္ဂုၚ်မဒှ်ရ။
စၞးအဇာ ဝန်ဇၞော်ပရေၚ်ဂီုကၠီုဒေသပယျဵုမန် သ္ကိုပ်ဗိုလ်ဇၞော် ကျဝ်ဇွာမျေအ်ဂှ် သ္ကိုပ်ဗိုလ်ဇၞော်ယေဝ်ထောဋ် လုပ်ယိုက်ဂၠေၚ် တာလျိုၚ်တုဲ အပါညးဂှ်လေဝ် ဒှ်သ္ကိုပ်ဗိုလ် ဒေါအ်ဇူပၞာန် မွဲတၠ ကီုရ။
ပရေၚ်ကၠောန်အပြံၚ်အလှာဲ ဝန်ဇၞော်ဂီုကၠီုပယျဵု တွဵုရးမန်ဂှ် သဘဴကမၠောန်သၠာဲထောံဒၞာဲ သဳနဳယာ၊ ဂျူနဳယာရောၚ် ညးလ္ၚတ် ပရေၚ်ဍုၚ်ကွာန်တံ သ္ဂးရ။
အပ္ဍဲကဵုပရေၚ်ကူသာန်ဗၞိက် ဟွံလုပ်သၞောဝ်တံ ဟိုတ်နူ ပရေၚ်စလာဘ်ဗဇဴဂှ်ရ သ္ကိုပ်ဗိုလ်ဇၞော်ကျဝ်ဇွာမျေအ်ဂှ် ကဵုဇူထောံ နူကဵုတာလျိုၚ်တုဲ ပလံၚ်ဗစိုပ်လဝ် ဒပ်ဇြဟတ်အရန် ပ္ဍဲကဵုဌာန်ဂအုပ်ရးပၞာန်အဂၞဲဂှ် ဂွံတီနူ ညးကြပ်ကဵု အလဵုအသဳပၞာန် တံရ။
ပရိုၚ်-သြၚ်လောန်တိုၚ်မ်
Photo – Social Media