ဗြဝတဳ၊ အံက်တဝ်ပါ ၃၁
တွဵုရးကရေၚ် ပ္ဍဲကဵုပယျဵုဗြဝတဳဂှ် အကြာဒပ်ပၞာန်ဗမာ၊ ဒပ်ပၠန်ဂတးတံ ဟိုတ်နူအကာဲအရာ ပေါဲဗတိုက် ဒှ်မံၚ်ဇၞော်ကဵု ဇြဟတ်တုဲ စနူအံက်တဝ်ပါ ၃၀ ဂှ် ဒပ်ပၞာန်သေံကၟာတ်ထောံ ဂိက်သၞေဟ်ကၚ်ပယျဵုတံ ပွိုၚ်မွဲသတ္တဟ ဂွံတီရ။
ပ္ဍဲကဵုအံက်တဝ်ပါ ၂၉ ကရပ်ဗ္ဒာဲကွာန် မေန်လက်ပါန် ပွိုၚ်ဍုၚ်ဗြဝတဳဂှ် ဒပ်ပၠန်ဂတးကဵု ဒပ်ပၞာန်ဗမာတံ ပေါဲဗတိုက်ဒှ်မံၚ်ဇၞော်ကဵုဇြဟတ်တုဲ မကမ်နူကဵုပေါဲဗတိုက်ဏံ အာဒတုံစှ်ေလဝ် လ္တူသ္ၚိဌာန် ညးဒေသ မဟာဝါန် ပွိုၚ်ဍုၚ်မာဆံက် ခရိုၚ်တက်၊ ရးနိဂီုဍုၚ်သေံရ။
အပ္ဍဲကဵုပရေၚ်တံဏံ ကောန်သေံညးဗြဴအာယုက် ၅၅ သၞာံမွဲတၠ အဟိန်အောပ်မံၚ် အကြာသ္ၚိဂှ် ဒးအာဝပ် ကဝေက်မကမ် လွဟ်ဇၞော် တုဲ ဒးပလံၚ်ဗစိုပ်ဝဳမံၚ် လ္တူရုၚ်ဂဥုဲမာဆံက်ရဂှ် လိက်ပရိုၚ်သေံတံ ချူထမံက်လဝ်ရ။
အကြာနူကဵုပေါဲဗတိုက် ရမျှာၚ်ခတိုဟ်နာနာသာ် ဂွံမိၚ်မံၚ်ဆက်က်တုဲ ကောန်ကွာန် မံၚ်ဒၟံၚ်ကရပ်ဇိုၚ်ပယျဵုတံ နကဵုပရေၚ်ကာမံက်တိုန် ဒးဂြိပ်ပါဲမံၚ် ဒၞာဲဗၠးဘဲတံရ။
သွက်ဂွံကလေၚ်ပလန်အာ အကာဲအရာဏံဂှ် ဒပ်ပၞာန်သေံ ပန်လွဟ်ကဵုသတိ နကဵုမကမ်ပၟတ်သ္ဍဴတံကီု ထပ်ဖျေံဟလိုၚ်လဝ် ပရေၚ်ဂီုကၠီုပယျဵုတံတုဲ ကၠောန်မံၚ်မၚ်မွဲရံၚ်စံၚ် ပရေၚ်စဵုဒၞာတံ သ္ဂးရ။
ပြဟ်ဟ်ဏံ ဟိုတ်နူပေါဲဗတိုက်တံဒှ်မံၚ် ပ္ဍဲကဵုပယျဵုသေံ-ဗမာဂှ်ရ ဒၞာဲကရပ်ပေါဲဗတိုက်ကီု ဂိက်သၞေဟ်ကၚ်ဂၠုၚ် လပါ်သေံ မွဲဒမြိပ်ပယျဵုတံဂှ် စနူအံက်တဝ်ပါ ၃၀ စိုပ်နဝ်ဝမ်ပါ ၅ တေံ ဒပ်ပၞာန်သေံ ကၟာတ်ထောံဗွဲယာယဳရောၚ် ပတိတ်လဝ်ပရိုၚ်ရ။
ဒၞာဲဂိက်သၞေဟ်ကၚ်ဂၠုၚ် ကၟာတ်လဝ်ပွိုၚ်မွဲသတ္တဟ မွဲဒမြိပ်ပယျဵုတံဂှ် ဒှ်မံၚ်ဂိက်သၞေဟ်ကၚ် သွက်အရာကိစ္စ ဂွံအာကၠုၚ် ပရေၚ်သွံရာန် ကပေါတ်ဗၞိက် နာနာသာ်တံဂှ် သုၚ်စောဲမံၚ်ရ။
အခိၚ်ကၠာတေံ ပေါဲဗတိုက်သ္ကာတ်မြဟ် ဒှ်ကၠုၚ်ဂှ်လေဝ် ဒပ်ပၞာန်သေံ ကၟာတ်ထောံ ဂိက်သၞေဟ်ကၚ်ဂၠုၚ်စက်တံ ဗီုဏံကီုတုဲ အခိၚ်ပေါဲဗတိုက်ကလေၚ်ညိၚ်အာမ္ဂး ဒပ်ပၞာန်သေံ ကလေၚ်ပံက်ကဵု ပၠန်ရ။
ဒပ်ပၞာန်ဗမာ သွက်ဂွံကလေၚ်ထိၚ်အာ တိဍာ်မေန်လက်ပါန်ကဵု ဖလူ သၠုၚ်ကျာ ပွိုၚ်ဍုၚ်ဗြဝတဳမာန်ဂှ် ပ္ဍဲဂိတုအံက်တဝ်ပါအိုတ်ဏံ ဒပ်ပၞာန်ဗမာ ကလေၚ်ထပက်ကရောၚ်ပၞာန် ဗတိုက်ကၠုၚ်ဂှ် ဒှ်လဝ်ပေါဲဗတိုက်ကဵု ဂကောံဇြဟတ်ပၠန်ဂတး KNLA မဟာဒပ် ၆ သ္ကိုပ်သ္ကလဝ်တံတုဲ ပေါဲဗတိုက်အကြာၜါလပါ် သ္ကာတ်မြဟ်မံၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media