မုဟ်ဍုၚ်၊ အံက်တဝ်ပါ ၃၁
အပ္ဍဲတွဵုရးမန် ပွိုၚ်ဍုၚ်မုဟ်ဍုၚ် ဒၞာဲကၠအ်ရာဘာ ကရပ်ဇိုၚ်ကွာန်ကျာ်ရဲဂှ် ဆဵုညာတ်လဝ် ဇွညးတြုံမွဲတၠ ဒးဒုၚ်ပန်ဂစိုတ်လဝ်ရဂှ်လေဝ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ညးတြုံအာယုက် ၃၀ ပြၚ် ချိုတ်မံၚ်ဒးလဝ်ဘဲဝပ်သေနာတ်ဂှ် ပ္ဍဲအံက်တဝ်ပါ ၃၀ နူဂယးပြဟ် အခိၚ်ရဲခွာတ်ထၜိုတ်တံ အာကၠအ်ရာဘာဂှ် ဆဵုညာတ်အာလဝ် မဒှ်ရ။
ဗီုပြၚ်ညးတြုံဏံ ဒးဒုၚ်ရပ်တုဲမှ ပန်လဝ်သေနာတ်ကဵုက္ဍိုပ် ကြပ်ပ်တုဲ ဂၞာဍဟ်ထောၚ်ပြိုဟ် ချိုတ်အာလဝ်ကဵုဘဲဝပ်တံ မဒှ်ရ။
အတိုင်ညးဒေသတံ သ္ၚဳဂၠိပ်မ္ဂး ပ္ဍဲကဵုအံက်တဝ်ပါ ၂၈ ၜိုတ်အခိၚ်ဗတမ် ဂှ်ရ မၞိဟ်ဒးချိုတ်ဏံ ဒးဒုၚ်ပန်ဂစိုတ်ဒှ်မာန်တုဲ ဒၞာဲဆဵုဇွဂှ် သ္ၚောဲခြာမံၚ် နူကဵုဂၠံၚ်ကွဳစက်ကွာန် ၜိုတ်မွဲတိုၚ်ဂှ်တှ်ေ ဂွံမိၚ်ရမျှာၚ်လွဟ် ဟွံလောဲပုဟ် သ္ဂးရ။
ကရပ်ဇွညးချိုတ်ဏံဂှ် ဒၞာဲဇိုၚ်ကွဳစက်၊ တၞးဆာဲကာဒ်ကောန်ဍုၚ် ဂစိုက်လဝ်မွဲစြေက်ဍောတ်ဟေၚ် ဆဵုညာတ်လဝ်တုဲ စပ်ကဵုတၚ်နၚ် ညးချိုတ်လဝ်ဏံ မုလေဝ်ဟွံဆဵုလဝ်ပုဟ် သ္ဂးရ။
ဒၞာဲဆဵုလဝ်ဇွဂှ် ဂကောံပရေၚ်အုပ်ဓုပ်ကဵု ဒပ်ဗၠာဲသၟိၚ်တံ ကၠုၚ်စၟဳစၟတ်တုဲ ကေတ်ဏာလဝ်ဇွဂှ် ဂွံတီရ။
အကြာမုဟ်ဍုၚ်ကဵု ဇြပ်ဗုတံဂှ် ဂကောံရပ်လွဟ်မန်တံ ချဳဒရာၚ်မံၚ်နွံတုဲ စပ်ကဵုပရေၚ်ဏံ နူကဵုဌာန်ပရိုၚ်သြၚ်လောန်တိုၚ်မ် ကေတ်အဆက်သၟာန်လဝ် ဂကောံရပ်လွဟ်မန်တံကီုလေဝ် ကလေၚ်သှ်ဆာဲကဵုလဝ် ဟွံမွဲဏီပုဟ်။
ပရိုၚ်-သြၚ်လောန်တိုၚ်မ်
Photo – Social Media