နေဗျဳဒဝ် ၊ အံက်တဝ်ပါ ၃၁
စပ်ကဵုကိစ္စ ပရေၚ်ယိုက်ဝန်ပၞာန်တုဲ ညးဍုၚ်ကွာန်တံ ဒးဒှ်မံၚ်သောက စံၚ်တူမံၚ်ဂှ် လ္တူဒပ်ပၞာန်ကဵုအလဵုအသဳတံဂှ် နူကဵုစၠတ်ထဝ် ထိင်ကြာပ်အာမာန်ဟာ ဟွံသေၚ်မ္ဂး စိုတ်ထိၚ်ကြာပ် နွံညိဟာဂှ် ဖိုဟ်ဂွံဒးသၟာန်အာရောၚ် ဂကောံလ္ၚတ်မဟာဗျူဟာ မူဝါဒဍုၚ်ဗမာ ISP-Myanmar ထံက်ထ္ၜးလဝ်ရ။
စနူသၞာံ ၂၀၂၆ ဂိတုမာတ်တေံ ဒဵုကဵုစိုပ်ဂိတုအံက်တာပါဏံ အပ္ဍဲကဵုကောံဓရီု စၠတ်ထဝ်ညးဍုၚ်ကွာန် လၟေၚ်ဍာံ တင်သၟာန် ဟွံအောန်နူ ၄၉၅ သၟာန်လဝ်တံဂှ်တှ်ေ စပ်ကဵုကိစ္စယိုက်ဝန်ပၞာန်တုဲ သၟာန်ကၠုၚ်လဝ် ၃ တၚ်ဟေၚ် နွံရ။
ပ္ဍဲကဵုစၠတ်ထဝ်ကောန်ဂကူကဵု စၠတ်ထဝ်ကၟိန်ဍုၚ်တံ မွဲလန်မွဲဝါမှ ကေၚ်သၟာန်ကၠုၚ်လဝ်တင်သၟာန် ဟွံမွဲပုဟ်ဂှ် နူကဵုတင်နၚ် ISP-Myanmar ပ္ဍဲအံက်တဝ်ပါ ၂၉ ဏံ လလောၚ်ပတိတ် ချူထမံက်လဝ်ရ။
တုဲပၠန် ရးမာန္တလေဝ်၊ ရးမဂွေ၊ ရးဗဂေါ၊ တွဵုရးမန် ကေုာံ တွဵုရးသေံ ပ္ဍဲကဵုစၠတ်ထဝ်ရးဒေသကဵု တွဵုရးတံဂှ်လေဝ် စပ်ကဵုပရေၚ် ယိုက်ဝန်ပၞာန်တုဲ တင်သၟာန်မွဲမွဲကဵု ကေၚ်သၟာန်လဝ်တၚ်သၟာန် ၅ ဝါ ဟေၚ် နွံရ။
ယဝ်ရ ရံၚ်အာတၚ်သၟာန် အမာတ်ညးစၞးစၠတ်ထဝ်တံမ္ဂး သၞောဝ်ဥပဒေ ညးဂမၠိုၚ်တံ မ္ဒးဖေက်တကိုတ်တ္ၚဵုမံၚ် ယိုက်ဝန်ပၞာန်ဂှ် စွံလဝ်ခေတ္တတုဲ သွက်ဂွံဗဒေါအ်အာဟွံသေၚ်၊ ပရေၚ်ကမၠောန် ကၠောန်လဝ် ဟွံကိတ်ညဳကဵုဥပဒေ၊ နဲကဲဥပဒေတံဂှ်ဟေၚ် သွက်ဂွံထိၚ်ကြာပ်အာတုဲ ကဵုမံၚ်ဇြဟတ် ဍောတ်ဇၞော်ဟွံရုဲ သွက်ဂွံယိုက်ဂၠေၚ်အာ လျိုၚ်ဝန်ပၞာန်တံရောၚ်။
အပ္ဍဲကဵုဒုတိယဝန်ဇၞော်ပရေၚ်စဵုဒၞာ သ္ကိုပ်ပၞာန်မေန်တူ ကေုာံ ဝန်ဇၞော်ပရေၚ်ဂီုကၠီု ရးမာန္တလေဝ် သ္ကိုပ်ဗိုလ်ဇၞော် နေလေန်သိုဝ်တံ ကဵုလဝ်သွဟ်ဂှ်မ္ဂး ပရေၚ်ဆက်ဆောံကောန်အရာပ်ကဵု ကောန်ပၞာန် တံ ညံၚ်ဂွံကလေၚ်ခိုဟ်တိုန်အာကေုာံ သွက်ဂွံစဵုဒၞာ ရးနိဂီုဍုၚ်ဂှ် ဒှ်တာလျိုၚ် အပ္ဍဲဇၟာပ်ကောန်ဍုၚ်တံရောၚ် ထ္ၜးလဝ်ဟိုတ်နွံရ။
သဘဴ သွက်ဂွံဆက်ထမံက်အာရုပ်ရဴ ဥပဒေယိုက်ဝန်ပၞာန်ဂှ်ဟေၚ် ဂွံဆဵုညာတ်တုဲ စပ်ကဵုဥပဒေဏံမ္ဂး ပ္ဍဲကာလပေါဲရုဲမာဲတေံလေဝ် ဗော်ဗျဳခိုၚ်ဖျိုဝ်ကီု ဗော်ပရေၚ်ဍုၚ်ကွာန် ဗွဲမဂၠိုၚ်တံကီု ဟီုဂးပါ်ပါဲ ဟွံမွဲတုဲ သဳကၠဳအပ္ဍဲစၠတ်ထဝ်ဂှ်လေဝ် အောန်မံၚ်ကွေံကွေံရောၚ် သ္ဂးရ။
အမာတ်ညးစၞးတံဂှ် ဒးဖေက်မံၚ်ဇၟာပ်ပ်ဇဳဒိုဟ်နွံကီု သွက်ခုၚ်ဂဇအ် ဂွံဗိုန် တင်သၟာန်လ္ၚဵု ပတိုန်ထ္ၜးဟီုဂးဏာညိညတုဲ တၠုၚ်လအာ ကဵုတုဲဒှ်အာရောၚ် ညးဒေသမန်မွဲတၠ ဟီုလဝ်လညာတ်ညးရ။
“ပရေၚ်ဒုက္ခသုခ ပိုဲတံ တၠုၚ်လအာ ညးဍုၚ်ကွာန်တံသီုဖအိုတ် ညံၚ်ဂွံပါလုပ်အာ နူကဵုဍုၚ်ဂၠးကဝ်တံ ဘိုၚ်ရီုဗင်ထ္ၜလဘာ်ကဵုမှလေဝ် အလဵုအသဳဒဳမဝ်ကရေသဳဇေတ်တ် မံက်တိုန်ကၠုၚ်မှ သွက်ဂုဏ်ဖဵုညးဍုၚ်ကွာန်တံဂှ် ဟီုဂးမာန် ဂးစဂွံရ။ အခိၚ်ကာလလၟုဟ်ဏံ ပိုဲဟီုမံၚ်လေဝ် ဒှ်အပဵုရ။ အလဵုဇကု အမာတ်စၠတ်ထဝ်တံဂှ်လေဝ် ဒးဖေက်မံၚ်ကီုဏောၚ်။ ဒးဖေက်အလဵုအသဳ။ ဒးဖေက်မံၚ် ဇၟာပ်ပ်ဇဳဒိုဟ်ဏောၚ်။ အဓိက ဆက်ဂဇအ်အာစၠတ်ထဝ် ညးလ္ၚဵုပတိုန်အာဂလာန် ညိညိညညတုဲ ကဵုတုဲအာ အတိုၚ်ဏံဏေၚ် ထေၚ်ရ” သာ်ဝွံ သ္ဂးရ။
ညံၚ်ဂွံဒှ်အာဗီုပြၚ် ဒဳမဝ်ကရေသဳ အလဵုအသဳကောန်အရာပ် ကၠောန်ပေါဲရုဲမာဲကော်စၠတ်ထဝ်တုဲ သဳကၠဳဟီုဂးမံၚ်ကီုလေဝ် ပရေၚ်ဝါတ်ဂါတ်ကြေပ်ဂြတ် ညးဍုၚ်ကွာန်ကေုာံ သွက်ဍုၚ် နကဵုတၞောဝ်ဒတောဝ်အဆက်က် ချဳအာမံၚ်လပါ်ဆုတ်တုဲ ညံၚ်ဂွံဒေါအ်ထောံမာန် ဆၜိုတ်ပရေၚ်သဳကၠဳ ဗွဲလ္တူကျာဂှ်လေဝ် နူကဵုစၠတ်ထဝ် ကၠောန်ကဵုဟွံမာန်မ္ဂး ညးဍုၚ်ကွာန်ဂှ်တၞဟ် စၠတ်ထဝ်ဂှ်တၞဟ် ဒှ်အာမာန်ရောၚ် ISP-Myanmar သ္ဂးရ။
ဟိုတ်ဂှ်ရ ဍာ်ဇမၠိၚ်မ္ဂး စၠတ်ထဝ်ကဵုညးဍုၚ်ကွာန် ပဵုတုဲ ဘိုအ်ဂွံသ္ၚောဲခြာအာ ကၠုၚ်မာန်ဂှ်လေဝ် ကဵုလဝ်သတိကီုရောၚ်။
အခိၚ်ဒပ်ပၞာန် ကလေၚ်ဒပ်ပတန်မံၚ်ဇြဟတ်ဏံ စပ်ကဵုပရေၚ်ကိစ္စ ယိုက်ဝန်ပၞာန်ဏံ ပၟိက်မိက်ဂွံဒေါအ်တောံ ဟွံမွဲပုဟ်။
ဟိုတ်ဂှ်တုဲ ပ္ဍဲကဵုဍုၚ်ဇၞော်ကေုာံ ကွာန်ရးဒေသ ပဋိပက္ခလွဟ်ဟွံမွဲတံဂှ် စကာနဲကဲစုၚ်တုဲ ထပဵုကၠောန်အာ ပရေၚ်ပကောံကောန်ပၞာန်တၟိတံ ဂၠိုၚ်ၚ်ရောၚ် ပတဝ်အာလဝ် အကာဲအရာဗီုဏံရ။
လၟုဟ်ပၠန် ပကောံကေတ်မံၚ်ကောန်ပၞာန်တၟိ အတေၚ်အဓ္ဓမ ဒှ်ကၠုၚ်မံၚ်လ္တူဍုၚ်ဇၞော်တံ ထေၚ်ၚ်လဵုလဵုဂှ် ညာတ်အာတုဲ စနူကဵုအဆံၚ်သၟဝ် ပၞော်ဂၠံၚ်သွက်ဂွံစလာဘ်ဗဇဴ အဆံၚ်ၚ်တံ ထောၚ်အာအိုတ်ယျ။
အလုံဂကောံမၞိဟ်တံဂှ် ဟိုတ်နူဒးဒုၚ်မံၚ်ဘဲဒဏ်အိုတ်တုဲ ပြံၚ်တိတ်အာမံၚ် ဇရေၚ်ဍုၚ်ဇိုၚ်ဝုတ်ဒိုဟ် နကဵုသၟာကမၠောန်ဆုဲပြံၚ် ဂအုံဂအုံကလောအ်ကလောအ်တံဂှ် ထိၚ်ဟွံမာန် သီဟွံမာန်ပုဟ် သ္ဂးရ။
မွဲလပါ်ပၠန် ဘဝသၟတ်သ္ကုတ်လ္ၚဵုတံ အလဵုစိုတ်ဆန္ဒဇကုဟွံပါ ဒးဗက်အာ ပရေၚ်ယိုက်ဝန်ပၞာန်မ္ဂး သွက်ဇၟာပ်ပ်မၞိဟ်တံ ဒးဆောံလေၚ်အာဘဝၚုဟ်မးနွံတုဲ သွက်သၟတ်ယိုက်ဝန်ပၞာန် တုဲဒှ်အာတံဂှ် ကဵုဖျုန်ဖန်ဇန်အာ အခေါၚ်အရာကမၠောန်တံရောၚ် ဟီုမံၚ်ကီုလေဝ် သွက်ကာလ ဒးဆောံလေၚ်ဟောံဗြောံလဝ်တံဂှ် ကလေၚ်ဂွံထပက်ကေတ်အဇာ ဟွံလောဲသွာပုဟ်။
သွက်ဂွံဂစိုတ် ကောန်ဍုၚ်ဇကုကဵုဇကု ဒးစကာလဝ်အတေၚ်အဓ္ဓမဂှ် ပရေၚ်သၠးဖဵု ဇၞော်လောန်အာကွေံကွေံတုဲ စနူအခိၚ်သီအဝဵုတေံ စဵုစိုပ်သၞာံ ၂၀၂၆ ဂိတုသိပ်တမ်ပါ ၃၀ ဏံ ပ္ဍဲအကြာဒှ်လဝ် ပဋိပက္ခ ရပ်လွဟ်ဏံ ကောန်ဍုၚ်ကွာန်ဟွံအောန်နူ ၁၂,၈၉၃ တံ လမျီုဒးဆောံ အာလဝ်တုဲတုဲ မဒှ်ကီုရ။
တုဲပၠန် ပ္ဍဲကာလအခိၚ်သီလဝ်အဝဵုပြဟ်ဟ်တေံ ပန်ဂစိုတ်လဝ် ပေါဲထ္ၜးဆန္ဒတံကီု ရပ်ချုက်ကၠေၚ်မၞိဟ်တုဲ ချိုတ်အာလဝ် ပ္ဍဲဗဒိုပ်စၟဳစၟတ်တံဂှ် မၞိဟ်ဟွံအောန်နူ ၂,၁၈၃ တၠ ချိုတ်လဝ်ရောၚ် ပ္ဍဲကဵုတၚ်နၚ် ISP-Myanmar ချူထမံက်လဝ်ရောၚ်။
ဣဏံဂှ်ဝွံ လၟိုဟ်မဂၞန်ထေၚ်ၚ်လဵုလဵု ဒှ်ကၠုၚ်လဝ် ပရေၚ်ဆောံလေၚ် တံတုဲ အပ္ဍဲဗလးတိဏံ ပရေၚ်ဟောံဗြောံဒှ်ကၠုၚ်လဝ် ဂၠိုၚ်နူဏံဏီရ။ ဥပဒေယိုက်ဝန်ပၞာန် လမျီုလုပ်အာတုဲ ပရေၚ်ဆောံလေၚ်ဇီု ကပိုက်ကၠုၚ်လဝ် လ္တူကၟိန်အိန်ထံၚ်ဗွဲမဂၠိုၚ်တံ ဇၞော်ကဵုဇြဟတ် ဒှ်မံၚ်ရောၚ် သ္ဂးရ။
သရောပ်ရံၚ်အာ အတိုၚ်ဍုၚ်မွဲမ္ဂး သွက်ခုၚ်အဝဵု ဒၞါဲဂဇအ်ဟွံဂွံကၠေံအာ ပရေၚ်ဒးရုဲစှ်ကေတ် အရာကိစ္စမွဲမွဲမ္ဂး သွက်ဂွံကၠောန်ပတိတ် ဍုၚ်ဂွံဖောအ်ဗြဳ တောတက်တံဂှ် မ္ဒးသၠးကၠေံထောံဏာ ဒှ်ကၠုၚ်ဍာံဍာံ ရောၚ်။
ဣဏံဂှ်တှ်ေ သွက်ရးနိဂီုဍုၚ် နကဵုတၞောဝ်ဒတောဝ်အဆက်က်တံ ချဳအာမံၚ်လပါ်ဆုတ် အကာဲအရာဒှ်ကၠုၚ်မံၚ်တံဂှ် အခန်ကဏ္ဍစၠတ်ထဝ် သွက်ဂွံထိၚ်ကြပ်အာတံဂှ် ဒဵုကဵုလၟုဟ် ဟွံညာတ်ဏီပုဟ် နူကဵု ISP-Myanmar ကဵုသမ္တီ ထံက်ထ္ၜးလဝ်ရ။
ပရိုၚ်-သြၚ်လောန်တိုၚ်မ်
Photo – MOI