မတ်မလီု ၊ နိုဝမ်ပါ ၃
နူကဵုဂကောံအလဵုအသဳပၞာန် တွဵုရးမန် ဝန်ဇၞော်ပရေၚ်ဂီုကၠီု ဒေသပယျဵုမန် သ္ကိုပ်ဗိုလ်ဇၞော်ကျဝ်ဇွာမျေအ် ဒးဒေါအ်ဇူအာလဝ်ဂှ်
အလဵုအသဳပၞာန် သွက်ဂွံကေတ်အာအရေဝ်နွံမံၚ်ရဂှ် ညးကြပ်ကဵု အလဵုအသဳပၞာန်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲကဵုဂိတုအံက်တဝ်ပါ ၃၁ ဂှ် စပ်ကဵုပရေၚ်ကူသာန်ဗၞိက် ဟွံလုပ်သၞောဝ်တံ သ္ကိုပ်ဗိုလ်ဇၞော်ကျဝ်ဇွာမျေအ် ယၟုဒယှ်မံၚ်ဂှ် နူကဵုအလဵုအသဳပၞာန် ကဵုဒေါအ်ဇူနုက်တိတ်အာတုဲ ပလံၚ်လဝ် ဇြဟတ်အရန် ပ္ဍဲကဵုဌာန်ဂအုပ်ပၞာန်ရးအဂၞဲရ။
ပြဟ်ဟ်ဏံ နူအလဵုအသဳပၞာန်ကဵု သ္ကိုပ်ဗိုလ်ဇၞော်ကျဝ်ဇွာမျေအ် ဒေါအ်ဇူနုက်တိတ် ပလံၚ်လဝ်ဇြဟတ်အရန်ကီုလေဝ် အခိၚ်ယိုက်ဂၠၚ် ကေတ်လဝ်တာလျိုၚ်တေံ ပရေၚ်တေၚ်စပ်လဝ် ဗွဲမဂၠိုၚ်တံနွံဂှ်ရ ပတိတ်ထောံနူဇြဟတ်အရန်တုဲ သွက်ဂွံကေတ်အာအရေဝ် ဖန်ဖက်မံၚ်ရောၚ် သ္ဂးရ။
လ္တူသ္ကိုပ်ဗိုလ်ဇၞော်ကျဝ်ဇွာမျေအ်ဂှ် အလဵုအသဳပၞာန် ဗီုလဵုကေတ်အရေဝ် ဖန်ဖက်ရောဂှ် ဟွံတီကီုလေဝ် ဆက်စပ်ကဵု ပရေၚ်ကူသာန်ဗၞိက် ဟွံလုပ်သၞောဝ်တံတုဲ ကေတ်အရေဝ်မာန်ရောၚ် ဂှ် ညးကြပ်ကဵုအလဵုအသဳပၞာန်တံ ဟီုရ။
ဝန်ဇၞော်ဂီုကၠီုမန်တြေံ သ္ကိုပ်ဗိုလ်ဇၞော်ကျဝ်ဇွာမျေအ်ဝွံ ဒပ်ပၞာန်သီအဝဵုတုဲ နူကဵုလက်ထက် ကံၚ်သဳပၞာန် သၞာံ ၂၀၂၂ ပ္ဍဲဂိတုအဝ်ဂတ်ဂှ် ခါန်ကၞက်ကဵုလဝ် နဒဒှ် ဝန်ဇၞော်ပရေၚ်ဂီုကၠီု ဒေသပယျဵုမန် မဒှ်ရ။
အခိၚ်သ္ကိုပ်ဗိုလ်ဇၞော်ကျဝ်ဇွာမျေအ် ကေတ်လဝ်တာလျိုၚ် ဝန်ဇၞော်ဂီုကၠီုမန် ပွိုၚ်ပန်သၞာံပြၚ်ၚ်ဂှ်တှ်ေ ပံၚ်တောဲပရအ်စလဝ်ကဵု သ္ကိုပ်ဝန်ဇၞော်တွဵုရးမန်တြေံ ဥူအံၚ်ကျဳတိၚ်တုဲ ကေတ်သြန် ကဵုလဝ်အခေါၚ် ပံက်ဝိုၚ်ဝေၚ်သၠဲသၠဲလးလး ညံၚ်ကဵုလုပ်သၞောဝ်တံရောၚ်။
တုဲပၠန် ထ္ၜးဟိုတ် ကပေါတ်ဗၞိက်သေံ ဟွံလုပ်သၞောဝ်တုဲ ရပ်ကၠုၚ်လဝ်ကီုလေဝ် ညးကြပ်ကဵုညးတံဂှ်တှ်ေ ကေတ်လဝ်သြန် ဂၠိုၚ်ၚ်တုဲ ကဵုအခေါၚ် ညံၚ်ရဴလုပ်သၞောဝ် မဒှ်ရ။
အခိၚ်သ္ကိုပ်ဗိုလ်ဇၞော်ကျဝ်ဇွာမျေအ် ကေတ်လဝ်တာလျိုၚ်ဂှ် ထ္ၜးဟိုတ် ပရေၚ်ဂီုကၠီုတုဲ ပံက်လဝ်ဂိက်သၞေဟ်ကၚ် ပ္ဍဲဒၞာဲပၞော်လုပ်တိတ်ဍုၚ် ကံက်ကေတ်လဝ်သြန်နွံတုဲ လ္တူသြန်ဂွံနၚ်ဂှ်တှ်ေ ပါ်ပရအ် ကေတ်လဝ် သွက်ညးမွဲအရၚ်ကီုရောၚ် ညးကြပ်ကဵု အလဵုအသဳပၞာန်တံ ဟီုရ။
ဒၞာဲတာယျိုၚ် သ္ကိုပ်ဗိုလ်ဇၞော်ကျဝ်ဇွာမျေအ်ဂှ် ပ္ဍဲဂိတုအံက်တဝ်ပါ ၃၁ တေံ စၠတ်ထဝ်တွဵုရးမန် ကော်ကောံဓရီုကာမံက်တိုန်တုဲ ထပက်အဇာ သ္ကိုပ်ဗိုလ်ဇၞော်ယေဝ်ထောဋ် သ္ပဒတန်ခါန်ကၞက်လဝ် မဒှ်ရ။
ပ္ဍဲကဵုပရေၚ်ကူသာန်ဗၞိက် ဟွံလုပ်သၞောဝ်တံ ယၟုဇၞော်မံၚ် သ္ကိုပ်ဗိုလ်ဇၞော်ကျဝ်ဇွာမျေအ် အခိၚ်ကေတ်လဝ်တာလျိုၚ် ဝန်ဇၞော်ဂီုကၠီုမန် ပွိုၚ်ကာလ ပန်သၞာံပြၚ်ဏံဂှ်တှ်ေ လောဲအာသြန် ကိုတ်နကဵုလၟိဟ် ဗွဲမဂၠိုၚ်နွံမံၚ် ပရေၚ်ဟီုဂး အကြာညးကြပ်ကဵု အလဵုအသဳပၞာန်တံ နွံမံၚ်ရ။
ပရိုၚ်-သြၚ်လောန်တိုၚ်မ်
Photo – Social Media