ဘာအၚ်၊ နိုဝမ်ပါ ၃
တ္ၚဲတွဵုရးကရေၚ် မရနုက်ကဵု ၇၁ သၞာံ အခိၚ်ကြပ်ကၠုၚ်ဏံ ပ္ဍဲကဵုပွိုၚ်ဍုၚ်ဘာအၚ် အခိၚ်ကၟာတ်ဒဒန်သြၚ်လောန်ကဵု ဒဒန်ဒုၚ်တမိတံ နူကဵုအလဵုအသဳတွဵုရးကရေၚ် ယှအ်ဖျေံ ပြံၚ်လှာဲလဝ် အခိၚ်ရဂှ် ဂွံတီနူညးဒေသတံရ။
ဒဒန်သြၚ်လောန်(ဘာအၚ်) ဆက်ကဵုလဝ် တွဵုရးကရေၚ် ပွိုၚ်ဍုၚ်ဘာအၚ်ကဵု ပွိုၚ်ဍုၚ်သဓီု တွဵုရးမန် နွံမံၚ် လ္တူဂၠံၚ်ဇၞော် ကွဳစက်ဂှ် စနူဂယး ၅ နာဍဳ ဒဵုအခိၚ်ဗတမ် ၁၀ နာဍဳ ကဵုအခေါၚ်တတ်ကၠောံအာကၠုၚ် မဒှ်ရ။
ဒဒန်ဒုၚ်တမိ နွံမံၚ်အကြာပယျဵုဒေသမန်ကဵု ကရေၚ်ဆက်စပ်ဂှ် စနူအခိၚ်နူဂယး ၅ နာဍဳ ဒဵုစိုပ်ဗတမ် ၈ နာဍဳ ကဵုအခေါၚ်တတ်ကၠောံ ရဂှ် ရိုဟ်ကၞက်ပရိုၚ်ဒေသတံ သ္ဂးရ။။
စနူတ္ၚဲ နိုဝမ်ပါ ၁ ဂှ်တုဲ ပြံၚ်လဝ်အခိၚ်တတ်ကၠောံဒဒန် ၂ ဏံ သ္ဂးရ။
ကၠာတေံ ဟိုတ်နူအကာဲအရာ ပရေၚ်ဂီုကၠီုတိဍာ်ဒေသတံဂှ် ပိုၚ်ခြာထောံအခိၚ် တတ်ဒဒန်သြၚ်လောန်ကဵု ဒဒန်ဒုၚ်တမိတံတုဲ ပရေၚ်အာကၠုၚ်ညးဒေသတံ ဒးဆဵုဂဗအာကဵု အခက်အခုဲ နာနာသာ်ရ။
ဆဂး ဒဒန်သြၚ်လောန်(ဘာအၚ်) ဂွံအခေါၚ်တတ်ဒဒန် ဒဵုကဵုအခိၚ်ဗတမ် ၁၀ နာဍဳကီုလေဝ် ဒဒန်ဒုၚ်တမိဂှ်တှ်ေ ၜိုတ်အခိၚ်ဗတမ် ၈ နာဍဳဟေၚ် ကဵုအခေါၚ်တတ်ကၠောံဂှ်တုဲ မုလေဝ်တၟေၚ်ကၠုၚ် ဟွံသေၚ်၊ အခိၚ်ကၟာတ် ဒဒန်ဒုၚ်တမိဂှ်လေဝ် ဒဵုကဵုဗတမ် ၁၀ နာဍဳကီု ဗီုအခိၚ်ကၟာတ်ဒဒန် သြၚ်လောန်တုပ်ပ် ညံၚ်ဂွံစွံကဵုဂှ် ဆန္ဒညးဍုၚ်ကွာန်တံ နွံမံၚ်ရောၚ်။
ပ္ဍဲကဵုသၞေဟ်ကၚ်ဂိက် ဒဒန်သြၚ်လောန်(ဘာအၚ်) ကဵု ဒဒန်ဒုၚ်တမိတံမ္ဂး ဂကောံပံၚ်ကောံဒပ်ပၞာန်ဗမာတံ နူကဵုညးအာတရဴတံ စွံပွန်ကဵု သၟတ်အဝဲဍောတ် ရဲ CDM တံတုဲ ရပ်ကၠေၚ်အာတ်မံၚ်သြန်သၟးဟွံက ကပေါတ်ကၠုၚ်နူသေံတံဂှ်လေဝ် နူကဵုသၞေဟ်ကၚ်ဂိက်တံဏံ ပတေၚ်ဓရတ်ရပ်စပ်မံၚ်ရ။
ဟိုတ်နူကြပ်မံၚ်ကဵုတွဵုရးကရေၚ် ပ္ဍဲကဵုတွဵုရးမန် ဒဒန်သြၚ်လောန် (မတ်မလီု)၊ ဒဒန်သြၚ်လောန်(ၜါသွာၚ်) ကေုာံ ဒဒန်ၜဳကဍတ်(မတ်မလီု) တံဂှ်လေဝ် စနူဂိတုအံက်တဝ်ပါ ၁ ဂှ်တုဲ နူကဵုအလဵုအသဳတွဵုရးမန် ပြံၚ်လှာဲလဝ်အခိၚ် ပံက် ၊ ကၟာတ် ဒဒန်တံကီုရ။
စိုပ်နိုဝမ်ပါ ၇ ဏံမ္ဂး သွက်သဘၚ်ပေါဲ တ္ၚဲတွဵုရးကရေၚ် မရနုက်ကဵု ၇၁ သၞာံဂှ် ကၠောန်ထ္ၜးယှအ်ဖျေံကဵုလဝ်ညိညိတုဲ ပလေဝ်စလဝ် သွက်ဂွံကၠောန်အာ ပေါဲသဘၚ် တ္ၚဲတွဵုရးကရေၚ် မိပ်ပ်ဇြိပ်ပ်ရ။
ပရိုၚ်-သြၚ်လောန်တိုၚ်မ်
Photo – Social Media