နေဗျဳဒဝ် ၊ နိုဝမ်ပါ ၃
ကာလဒးကလေၚ်ဆက်ဆောံအာကဵု ဂကောံပၞာန်တံမ္ဂး ညးစၞးတၟေၚ်တံကီု နူကဵုအမာတ်ကလုတ်ဂၠးကဝ်တံကီု မဂၞန် ပရေၚ်တောတက် ဂကောံပွဳဗွိုၚ်ဂၠးကဝ်တံ ဒးၜတ်ကၞာတ်အာ ထေက်တံဂှ် နူကဵုအလဵုအသဳ NUG ဝန်ဇၞော်ဍုၚ်သအာၚ် ဒဝ်ဇြေန်မာအံၚ် ကဵုဏာပရိုၚ် ပ္ဍဲအံက်တဝ်ပါ ၃၁ ဂှ်ရ။
က္ဍိုပ်သ္ကိုပ်ဂကောံပၞာန် တိတ်မံၚ်တရဴဍုၚ်သအာၚ်တံကီု လ္တူအာသဳယာန်ကဵု ဍုၚ်ဇိုၚ်ဝုတ်ဒိုဟ်လ္ၚဵုတံ ကလေၚ်စုက်လုက် ကၠုၚ်ကဵု ဂကောံပၞာန်တံဂှ်တုဲ သွက်ပၠန်ဂတးကီု ပရေၚ်ဍုၚ်သအာၚ်ကီု ဒဝိၚ်ညးဍုၚ်ကွာန်တံ နွံကၠုၚ်မံၚ်ဂှ် ကၠိုဟ်ကေတ်လဝ်ရောၚ် နူကဵု Facebook ဟီုဂးကဵုဏာသမ္တီကု ညးဍုၚ်ကွာန်တံရ။
သွက်ဂွံၜတ်ကၞာတ်အာ ပရေၚ်တောတက်ဍုၚ်ဗမာမ္ဂး နူကဵုဂကောံပၞာန်တံ စွံပွန်ကဵုညးဍုၚ်ကွာန်တံတုဲ ပန်မံၚ်နွံဟၟဲ၊ ပရေၚ်အရီုဗၚ်ဗစာရဏာမၞိဟ်တံ စိုပ်အာဒၞာဲ ရန်လဝ်ဍာံဍာံကီုဟာ၊ ဒဝ်အံၚ်သာန်သုကျဳကဵု ကောန်ထံၚ်ပရေၚ်ဍုၚ်ကွာန်တံဂှ် အကာဲအရာကလေၚ်ဗလးကဵု နွံဟၟဲ စပ်ကဵုပရေၚ်တံဏံဂှ် ဒးၜတ်ကၞာတ်အာထေက် သ္ဂးရ။
တုဲပၠန် စပ်ကဵုတၚ်တုပ်စိုတ်ဘုံ အာသဳယာန် ၅ တၚ်တုဲ ယဝ်ရ ၜတ်ကၞာတ်အာ ပရေၚ်တောတက်ဆုတ်ယောၚ်တံမ္ဂး တရဴကၠုၚ်စိုပ်လဝ်မွဲဂှ်ဟေၚ် ၜတ်ကၞာတ်အာဟွံဂွံပုဟ်ဂှ် သွက်ပွဳဗွိုၚ် ဂၠးကဝ် နူကဵု NUG, ကံၚ်သဳပၠတရဴဖိတ်ဒရေဝ် မိက်ဂွံဟီုလဴဏာ ဂလာန်ပရိုၚ် သီုကဵုတင်ဒတူလိုၚ်တံတုဲ ကဵုလဝ်သမ္တီရ။
နူကဵုပရေၚ်အာလဝ်တရဴတံဏံဂှ် နကဵုပရေၚ်ဍုၚ်ကွာန် ဂကောံပၞာန် တံ ညံၚ်ဟွံဂွံပတိတ်ကေတ်ပရဲကီု သွက်ဂွံပတိတ်အာပရဲ နွံမံၚ် ဂှ်လေဝ် စွံသတိညိကီု လ္တူဏံ ညံၚ်ဂွံ ဂါံတတ်ထၜက်အာ မာန်ဂှ်လေဝ် ကဵုမံၚ်ဂလာန်ပရိုၚ်နွံမံၚ်ရောၚ် ဒဝ်ဇြေန်မာအံၚ် ဟီုရ။
နူကဵုဍုၚ်လ္ၚဵုတံ နူကဵုပရေၚ်ဆက်ဆောံ ဒုၚ်သ္ဇိုၚ်ဂုဏ်ဖဵုပိုန်ဒြပ် တံမွဲအဆံၚ် သွက်ဂကောံပၞာန် ဒှ်ကၠုၚ်မံၚ်ပရေၚ်အထံက်ပၚ်တံဂှ် စွံလဝ်ဇြိုဟ်နက်တုဲ ဗွဲမဂတာပ်အခိၚ် ဗီုလဵုစဵုဒၞာကလေၚ်ပလန်အာဂှ် ပလေဝ်ပလေတ်မံၚ်ရောၚ် သ္ဂးရ။
အကာဲအရာ ပရေၚ်ဍုၚ်သအာၚ်တံဝွံ ဒုၚ်သ္ဇိုၚ် တၞးရုပ်ပေါဲဆဵုဂဗတံတုဲ ဂကောံပၞာန်လုပ်အာသၞောဝ်ယျ ဍုၚ်ဂၠးကဝ်တံ သ္ပစၟတ်သမ္တဳယျ ခါတ်အကာဲ ဖျေံစိုတ်ဟီုဂးထောံ ချိုတ်တ်ပၠိုတ်တ် ဟွံဂွံပုဟ် ညးဆက်ဟီုရ။
အခေါၚ်အရာသ္ပစၞး ဍုၚ်ဗမာကေုာံ ညးဍုၚ်ကွာန်တံဂှ် ဂကောံပၞာန်တံ ကၠောန်ပေါဲရုဲမာဲ နူကဵုစၠတ်ထဝ် ထပက်အဇာမာန် ဟွံမာန်၊ နူကဵုပရေၚ်ကမၠောန်ဏံမွဲအဆံၚ် အလဵုဂကောံပၞာန် တတ်ထပါ်အာ ဇြဟတ်ဟရိုဟ် ဍုၚ်ဂၠးကဝ်တံ မာန်ယျဟာဟီုဂှ် ပတိတ်လဝ် တၚ်သၟာန်ရောၚ်။
နကဵုဂကောံပၞာန် သွက်သ္ဂောံဂွံအာ ပရေၚ်သ္ပစၟတ်သမ္တီလုပ်သၞောဝ် နူကဵုဗွိုၚ်ဂၠးကဝ်တံမာန်ဂှ် တန်တဴမံၚ်ကဵု ပရေၚ်ကမၠောန်ဍေံတံ ကၠောန်လဝ် သွဟ်ဖဵုဂုဏ်နတဲမံက်တိတ်လဝ်တံ ၜတ်ကၞာတ်အာ ဒှ်တုဲ ပ္ဍဲအကာဲအရာပြဟ်ဟ်ဏံ ဟွံလောဲသွာဏီပုဟ် ညးခါတ်အကာဲ ပရေၚ်ဍုၚ်ကွာန်တံ သ္ၚဳဂၠိပ်လဝ် မဒှ်ရ။
သွက်သၞာံဏံ တၚ်ရန်တၟံ ကဏ္ဍပရေၚ်ဍုၚ်သအာၚ် NUG ဂှ်တှ်ေ နူကဵုဍုၚ်ဂၠးကဝ်တံ ညံၚ်ဟွံဂွံသ္ပစၟတ်သမ္တီ စၠတ်ထဝ်ကဵု အလဵုအသဳ ဂကောံပၞာန်တံဒှ်တုဲ အေန်သတဳကျူယှေန် လပါ်ပၠန်ဂတးတံ ညံၚ်ဂွံဒှ်လုပ်သၞောဝ်ဂှ် စွံလဝ်တိုၚ်ပကဴရောၚ် ဒဝ်ဇြေန်မာအံၚ် ဟီုရ။
သွက်တၚ်ရန်တၟံဏံ စၠတ်ထဝ်ဂကောံပၞာန်ဂှ် နူကဵုဍုၚ်ဂၠးကဝ်တံ သ္ပစၟတ်သမ္တီယျဟာ၊ ပ္ဍဲကုလသမဂ္ဂ ဂကောံပၞာန် ဂွံအခေါၚ် သ္ပစၞးယျဟာ၊ ပ္ဍဲကောံဓရီု အဆံၚ်လှုၚ်အာသဳယာန်တံ သမ္မတ ပတောအ် ဂွံအခေါၚ်တိုန်စိုပ်ယျဟာ ဟွံဂွံဟာ ဒးၜတ်ကၞာတ်အာကဵု အရာတံဏံဂှ် ညးထံက်ထ္ၜးလဝ်ရ။
ပရေၚ်ရီုဗၚ်ဗစာရဏာမၞိဟ်တံ ပါ်ခြာဟွံမွဲ ညံၚ်ဂွံစိုပ်အာ ညးဍုၚ်ကွာန်တံကီု၊ သွက်ဂွံဒက်ပတန်အာ ကၟိန်ဍုၚ် ဖိတ်ဒရေဝ် ဒဳမဝ်ကရေသဳတံဂှ် ညံၚ်ဂွံဒှ်အာပရေၚ်အထံက်ပၚ် တန်ရန်တၟံ ပၠန်ဂတးမာန်ဂှ် အပ္ဍဲအကြာဍုၚ်ဂၠးကဝ်တံ NUG ရုန်ဂစာန်အာရောၚ် သ္ဂးရ။
စပ်ကဵုပရေၚ်ဍုၚ်ကွာန်၊ ပရေၚ်ပၞာန် နူကဵုအပ္ဍဲဍုၚ် တောတက်တိုန် မံၚ်တံဂှ် ပ္ဍဲကဵုမုက်ဂၠးကဝ် ပံၚ်ပစပ်ပ္ညဳပ္ညပ်အာ နနဲမဟာဗျူဟာ စှ်ေစှ်ေတုဲ ပရေၚ်ဂိုတ်ဂစာန် အပ္ဍဲဍုၚ်မ္ၚးဍုၚ်တံ စွံတၞဟ်ခြာ ကၠောန်အာ ဟွံဂွံပုဟ်ဂှ်လေဝ် ဟီုလဴလဝ်ကဵု ညးဍုၚ်ကွာန်တံ မဒှ်ကီုရ။
ပရိုၚ်-သြၚ်လောန်တိုၚ်မ်
Photo – Social Media