မတ်မလီု ၊ နိုဝမ်ပါ ၆
အပ္ဍဲတွဵုရးမန် နူကဵုအလဵုအသဳပၞာန် ပြံၚ်လှာဲခါန်ကၞက်ကဵုလဝ် ဝန်ဇၞော်ပရေၚ်ဂီုကၠီုကေုာံ ဒေသပယျဵု စိုပ်လက်ထက် သ္ကိုပ်ဗိုလ်ဇၞော် ယေဝ်ထောဋ်ပၠန်လေဝ် ဆက်ဖျေံကဵုမံၚ်ပါမေတ်ဝိုၚ်ဝေၚ်တံရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စၞးအဇာ ဝန်ဇၞော်ဂီုကၠီုမန်တြေံကၠာတေံ သ္ကိုပ်ဗိုလ်ကျေဝ်ဇွာမျေအ်ဂှ် တုဲကၠုၚ်အံက်တဝ်ပါ ၃၁ ဏံ ပ္ဍဲကဵုကၠောန်လဝ် ကောံဓရီုစၠတ်ထဝ် တွဵုရးမန် ပရေၚ်ကာမံက်တိုန်ဂှ် ခါန်ကၞက်သ္ပဒတန်ကဵု ဝန်ဇၞော်ပရေၚ်ဂီုကၠီုကေုာံ ဒေသပယျဵု သ္ကိုပ်ဗိုလ်ဇၞော်ယေဝ်ထောဋ် ရ။
ဝန်ဇၞော်ဂီုကၠီု ဒှ်အာအပြံၚ်အလှာဲကီုလေဝ် ပရေၚ်ကဵုကၟာတ် ထောံလဝ် ဝိုၚ်ဝေၚ်ဟွံမွဲ ထ္ၜးလဝ်ဟိုတ်ကဵု ကာလပေါဲသဘၚ်နွံတုဲ ပါဲနူဍုၚ်မတ်မလီုမ္ဂး ကဵုလဝ်အခေါၚ်ပံက်ဝိုၚ်ဝေၚ် အကြာပွိုၚ်ဍုၚ်တံ ဇၞော်ကဵုဇြဟတ်ရောၚ်။
ဝန်ဇၞော်ဂီုကၠီုတၟိ သ္ကိုပ်ဗိုလ်ဇၞော်ယေဝ်ထောဋ် ကဵုအခေါၚ်တုဲ သ္ကိုပ်အုပ်ဓုပ်ပွိုၚ်ဍုၚ် ကေုာံ သ္ကိုပ်ဒပ်ဗၠာဲသၟိၚ်ပွိုၚ်ဍုၚ် ဆေၚ်စပ်တံ ပတိတ်ကဵုမံၚ်ပါမေတ်တံ မဒှ်ရ။
ဟိုတ်နူကလေၚ်ကဵုလဝ်အခေါၚ် ပံက်ဝိုၚ်ဝေၚ်တံတုဲ ပရေၚ်ကၠတ်ဂၠံက်ပၠံၚ်ၜးတံ ကလေၚ်ဒှ်ကၠုၚ် ဂၠိုၚ်တိုန်မံၚ်ပၠန်ဂှ် ညးဒေသမန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပ္ဍဲအကြာဝိုၚ်ဝေၚ် ပၠုပ်ပေါဲဇာတ်တုဲ ဒုၚ်ယၟု။ ပံက်လဝ်ဝိုၚ်ဝေၚ်တံ။ ဝိုၚ်ဝေၚ်ကလေၚ်စပၠန်တုဲ ပ္ဍဲကဵုပွိုၚ်ဍုၚ်ပိုဲ ကမၠတ်တံဟဂိတ်တံ ဂၠိုၚ်တိုန်မံၚ်။ အခိၚ်ဝိုၚ်ဝေၚ်ဟွံမွဲတှ်ေ မုလေဝ်ဟွံဒှ်။ လၟုဟ်ပဵုကြီုတိုန်မံၚ်” သာ်ဝွံ သ္ဂးရ။
ရဲသၟဝ်တဲအလဵုအသဳ ဒပ်မၚ်ကွာန်၊ ဂကောံဂီုကၠီုညးဍုၚ်ကဵု ဗတိုက်သရိုဟ်ပကီုပရာတ်တံ စဵုဒၞာကေတ်လဝ်ကဵုပရေၚ်ဂီုကၠီု သွက်ဝိုၚ်ဝေၚ်တံဂှ်ရ ပရေၚ်ပါ်ပါဲအကြာညးဍုၚ်ကွာန်တံ ဇၞော်တိုန်ရ။
အပ္ဍဲကဵုတွဵုရးမန် ပံက်ကၠုၚ်လဝ်ဝိုၚ်ဝေၚ်တံ ညံၚ်ကဵုတ္ၚဲဇမၠိၚ် ကဵုကၠုၚ်လဝ်အခေါၚ်တံဂှ် ညံၚ်ဂွံကၟာတ်ထောံ ပ္ဍဲကဵုစၠတ်ထဝ်တွဵုရးမန် ကၠောန်လဝ်ကောံဓရီု ဂိတုဂျောန် ၁၉ တေံ ဂလာန်သၟာန်လဝ် အံၚ်ဇၞးအာတုဲ ဝန်ဇၞော်ဂကောံအလဵုအသဳတံကီု အမာတ်ညးစၞးတံ သီုဖအိုတ် ပရေၚ်စောဒကဒစဵုစးဟွံမွဲ သ္ပလဝ်ဒတန်ရောၚ်။
ဆဂး ပ္ဍဲတွဵုရးမန်ဂှ်တှ်ေ စနူကဵုအခိၚ်ပေါဲသဘၚ် လာ်ဝှ်တိကှ်ဏံတုဲ လ္တူပံက်လဝ်ဝိုၚ်ဝေၚ်တံဂှ်တှ်ေ ဝန်ဇၞော်တံကီု အမာတ်ညးစၞးတံကီုဂှ် ကၟာတ်လဝ်ပါၚ် မံၚ်ဒၟံၚ် သီုဖအိုတ်ရ။
ပရိုၚ်-သြၚ်လောန်တိုၚ်မ်
Photo – MOI