မတ်မလီု ၊ နိုဝမ်ပါ ၆
အလဵုအသဳပၞာန်ခါန်ကၞက်ကဵုလဝ် သ္ကိုပ်ဝန်ဇၞော်တွဵုရးမန် ဥူအံၚ်ဝေၚ်တာန် ၐိုန်ရဟီုကြီုလဝ် ဍုၚ်မတ်မလီု ညံၚ်ဂွံဒှ် Smart City ကီုလေဝ် အခိၚ်လၟုဟ်ဏံ ပၟတ်ဓါတ်လလဳ ဂွံမံၚ်ပွိုၚ်မွဲတ္ၚဲ ၜိုတ် ၃ နာဍဳဟေၚ်ဒှ်မံၚ်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပၟတ်ဓါတ်လလဳဂှ်တှ်ေ ပ္ဍဲပွိုၚ်မွဲတ္ၚဲ သၞောတ်ဂေတ်အလန် ၈ နာဍဳ A1,A2,B1,B2 ပါ်လဝ် ၄ ဂကောံတုဲ တြးကဵုရောၚ် နူကဵုဌာနပရေၚ် ဓါတ်လလဳ အလဵုအသဳပၞာန် လလောၚ်တြးလဝ်ရ။
ကာလကဵုအာ ပၟတ်ဓါတ်လလဳပၠန်ဂှ်တှ်ေ ကဵုမံၚ် ၂ နာဍဳ ထပိုတ် ၆ နာဍဳ၊ ကဵု ၄ နာဍဳ ထပိုတ် ၆ နာဍဳ၊ ကဵု ၂ နာဍဳ ထပိုတ် ၄ နာဍဳ စကာအာသၞောတ်ဏံရောၚ် လလောၚ်တြးလဝ်ကီုလေဝ် နတဲမ္ဂး ကဵုလဝ်ပွိုၚ် ၁ နာဍဳတုဲ ထပိုတ်ထောံပၟတ်ဓါတ်လလဳ ၜိုတ် ၇ နာဍဳရ။
ဟိုတ်နူအခိၚ်ထပိုတ်လဝ်ပၟတ် လအ်မံၚ်ကွေံကွေံဂှ်ရ စနူကဵုပရေၚ် တောမ်တပ်တံ ဒှ်မံၚ်အခက်အခုဲရဂှ် ညးလ္တူဍုၚ်မတ်မလီုမွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပၟတ်ဂှ် လအ်ဟဍၚ် ပရေအ်ဟဍၚ်၊ ဒှ်ဒဒိုက်ကဵု ပရေၚ်တောမ်တပ်တံ၊ အခိၚ်ကောန်ၚာ်တံ အာဘာ ပုၚ်ဂွဳလေဝ်ဟွံဂတာပ်အာ။ မၚ်မံၚ်အခိၚ်ပၟတ်ကၠုၚ်တုဲ ဒးကၠောန်မံၚ်၊ အခိၚ်ပၟတ်ကၠုၚ်တှ်ေ မၚ်ကၠောန်အာ ဟွံမိက်ကၠောန်တှ်ေ ဗီုကၠာတေံ စကာဖဴဆးအှော်တံတုဲ ဒးတောမ်တပ်စအာ” သာ်ဝွံ သ္ဂးရ။
ပ္ဍဲကဵုဍုၚ်မတ်မလီု အခိၚ်ပၟတ်ဓါတ်လလဳပိုတ် ပရေအ်ဂၠိုၚ်ကီုလေဝ် ပ္ဍဲကဵုဌာန်ဂအုပ်ပၞာန်ရးအဂၞဲ၊ သ္ၚိဌာန်ဝန်ဇၞော်အလဵုအသဳတံကီု ဘာတက္ကသဵုကဵု ရုၚ်အလဵုအသဳတံဂှ် ဂွံမံၚ်ပၟတ်ဓါတ်လလဳ ပွိုၚ် ၂၄ နာဍဳပေၚ်ၚ်ရ။
အခိၚ်ပၟတ်ဓါတ်လလဳ ဟိုတ်ဂွံပိုတ်အာမံၚ် လအ်အ်ဂှ်တှ်ေ နူကဵုရးနိဂီုဍုၚ်တေံ ယှအ်ဖျေံလဝ် မဂ္ဂါဝပ်တံဂးတုဲ နူကဵုဌာန ပရေၚ်ဓါတ်လလဳ ပွိုၚ်ဍုၚ်မတ်မလီု ထ္ၜးလဝ်ဟိုတ်နွံရ။
ပၟတ်ဓါတ်လလဳ ကဵုမံၚ်ပွိုၚ် ၁ နာဍဳဟွံပေၚ်ကီုလေဝ် နူကဵုဌာန ပရေၚ်ဓါတ်လလဳဂှ်တှ်ေ ထပဵုကံက်ကေတ်လဝ် စရိတ်မဳတာပၟတ် တံနွံမံၚ်ဂှ် ညးလ္တူဍုၚ်မတ်မလီုမွဲတၠပၠန် ဟီုရ။
“ကျာပိုက်လေဝ် ပၟတ်ပၠိုတ်၊ ဆေဝ်ပလေဝ်ပိုက်လေဝ် ပၟတ်ပၠိုတ်၊ System Breakdown ဒှ်တှ်ေလေဝ် ပၟတ်ပၠိုတ်ဂှ်တှ်ေ သွက်မၞိဟ်အဆံၚ်အဒေါဝ်တံ ရဲကောန်တၠဒဒိုက်တံ ဂိဂၠိုၚ်မံၚ်။ အခိၚ်ပၟတ်ကၠုၚ် ၁ နာဍဳလေဝ်ဟွံပေၚ်။ ပၟတ်ပၠိုတ်အာပၠန်ယျ။ စရိတ်မဳတာတံ ကံက်ထပဵုတိုန်ဂၠိုၚ်မံၚ်” သာ်ဝွံ သ္ဂးရ။
ဟိုတ်နူယှအ်ဖျေံလဝ်ဇြဟတ်ပၟတ်တုဲ ကဵုမံၚ်ကီု၊ အခိၚ်မိက်ဂွံကဵုတှ်ေ ကဵု၊ အခိၚ်မိက်ဂွံထပိုတ်တှ်ေ ထပိုတ်ထောံတုဲ ရဲဒးကၠောန်စမံၚ်ကဵု ပၟတ်ဓါတ်လလဳတံ ပရေၚ်ယုက်ဒေက် ဒှ်အာသၟးဟွံက သွက်ပရေၚ်ပိုန်ဒြပ် ဘဝမၞိဟ်တံလေဝ် ဒှ်အာတၚ်ဝါတ် ဗွဲမဂၠိုၚ်နွံမံၚ် ညးဆက်ဟီုရ။
အပ္ဍဲအကြာဒေသ အခိၚ်ဂွံဇြဟတ်ပၟတ်ဓါတ်လလဳ အောန်စှ်ေအာတုဲ ကမၠောန်ပူဂဵုဍောတ်တ်တံကီု၊ ကမၠောန်အဇာဍောတ်၊ အဇာအဒေါဝ် ကေုာံ အဇာဇၞော်တံ ယုတ်ဒေက်အာကီု စရိတ်ကၠောန်ပတိတ် အိုတ်ဂၠိုၚ်အာ၊ ၚုဟ်မးကပေါတ်တံလေဝ် ဇၞော်တိုန်မံၚ်ရောၚ် တၠကမၠောန်ပရေၚ်ပိုန်ဒြပ်တံ ဟီုဂးမံၚ်ရ။
ပရိုၚ်-သြၚ်လောန်တိုၚ်မ်
Photo – Social Media