မတ်မလီု ၊ နိုဝမ်ပါ ၆
သွက်ဂွံထမံက်အာရုပ်ရဴ ပရေၚ်ပၞာန်၊ ပရေၚ်ဍုၚ်ကွာန်တံမာန် ကံၚ်သဳဖိတ်ဒရေဝ်ဍုၚ်မန် MSFC ကဵု ဒပ်ပၠန်ဂတးဍုၚ်မန် MSRF တံ ကၠောန်ဗ္ဒျ်လဝ် ပေါဲတက်ကျာသဳကၠဳ ပ္ဍဲကဵုတိဗၠးၜးမွဲဒၞာဲရဂှ် လလောၚ်ပတိတ်လဝ် ပရိုၚ် ပ္ဍဲနိုဝမ်ပါ ၄ ဂှ်ရ။
တုဲကၠုၚ်အံက်တဝ်ပါ ၂၉ တေံ ညးနွံတာလျိုၚ် ကံၚ်သဳဖိတ်ဒရေဝ် ဍုၚ်မန် MSFC ကမ္မတဳ ၃ တိုင်ကေုာံ သ္ကိုပ်ဒပ် ဒပ်ပၠန်ဂတးဍုၚ်မန် MSRF တံ ကၠောန်ဗ္ဒျ်လဝ် ပေါဲတက်ကျာသဳကၠဳရ။
စပ်ကဵုအကာဲအရာ ပရေၚ်ကမၠောန် ကံၚ်သဳဖိတ်ဒရေဝ်ဍုၚ်မန် ကၠောန်မံၚ်တံဂှ် ပတိုန်ထ္ၜးလဝ်ကဵု ညးတာလျိုၚ်ဌာနတံတုဲ တၚ်နွံပၟိက် သွက်ပရေၚ်ကမၠောန်အဓါန်ဂတ ဒပ်ပၠန်ဂတးဍုၚ်မန် တံဂှ် သဳကၠဳလဝ်သၠဲသၠဲလးလး မဒှ်ရ။
တုဲပၠန် သွက်ဂွံထမံက်အာရုပ်ရဴ ပရေၚ်ပၞာန်၊ ပရေၚ်ဍုၚ်ကွာန် ဟလေၚ်ညဳညဳမာန် ကေုာံ ပရေၚ်ကမၠောန် ယိုက်ဂၠေၚ်ဝန် ညးဍုၚ်ကွာန်တံ သွက်ဂွံထမံက်အာပရေၚ်လဝေၚ်ပၞာန် ပ္ဍဲဇၟာပ်ပ်ဒေသတံမာန် သဳကၠဳဖျေံအာ နဲကဲဗျူဟာကမၠောန်တံရ။
သွက်ဂွံပံၚ်တောဲ ထမံက်အာရုပ်ရဴပရေၚ်ပၞာန် ကရောံမဟာမိတ် ပ္ညဳပ္ညပ်သဳကၠဳမံၚ်ကဵု ဗော်ဍုၚ်မန်တၟိ NMSP-AD နွံမံၚ်ဂှ် ကမ္မတဳပရေၚ် အုပ်ဓုပ် MSFC ဥက္ကဌ နာဲမန်သာၚ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“စပ်ကဵုပရေၚ်ပံၚ်တောဲ သွက်ဂွံထမံက်အာရုပ်ရဴပရေၚ်ပၞာန်ဂှ်တှ်ေ ပြဟ်ဟ်ဏံ ပိုဲတံ ပ္ညဳပ္ညပ်သဳကၠဳမံၚ်ကဵု ဗော်ဍုၚ်မန်တၟိ NMSP-AD ဖိုဟ်ရ။ ဣဏံဂှ်တှ်ေ ဗီုလဵုဂွံပံၚ်တောဲအာကဵု ဂကောံမဟာမိတ်ဇၞော်ပိုဲ SCEF ဂှ်ရော။ ပရေၚ်ဏံ ပိုဲတံချပ်စမံၚ်ညးသ္ကံ” သာ်ဝွံ သ္ဂးရ။
NUG, CRPH ကဵု ဂကောံမဟာမိတ် ကောန်ဍုၚ်အရၚ်တံ ပံၚ်တောဲ ဒက်ပတန်လဝ် ကံၚ်သဳပၠတရဴဖိတ်ဒရေဝ် SCEF ကေုာံ ဂကောံဇြဟတ်ပၠန်ဂတး ဒုၚ်သ္ဇိုၚ်တွဵုရးမန်တံ အပ္ဍဲအကြာဂိတု တုဲကၠုၚ် ဂျူလိုၚ်ကဵု အံက်တဝ်ပါတေံဂှ် နူကဵုအန်လိုၚ် ကေၚ်သဳကၠဳလဝ် ၜါဝါကီုရောၚ်။
ဆဂး ပ္ဍဲအခိၚ်ပြဟ်ဟ်ဏံ အကြာဂကောံဇြဟတ်ပၠန်ဂတးမန် သ္ပစၞးတွဵုရးတုဲ ညံၚ်ဂွံပံၚ်ကောံပါလုပ်အာမွဲစွံ ပ္ဍဲကဵု ကံၚ်သဳပၠတရဴ ဖိတ်ဒရေဝ် SCEF မာန်ဂှ် အဆံၚ်သဳကၠဳမံၚ်ညးသ္ကံ အကြာဂကောံတံ ဖိုဟ်ဏီ ဒှ်မံၚ်ရ။
ပြဟ်ဟ်ဏံ အပ္ဍဲကဵုပရေၚ်ဆဵုဂဗတက်ကျာကဵု MSRF ဏံ သဳကၠဳသ္ၚဳဂၠိပ်လဝ် အကာဲအရာ ပရေၚ်ပၠန်ဂတးနာနာတံတုဲ သောၚ်ကလးကဵုလဝ် ပရေၚ်ဆက်ဆောံဂၠးကဝ်၊ ပရေၚ်အုပ်ဓုပ်၊ ပရေၚ်သၞောဝ်ဓရ်၊ ပရေၚ်ဗစာရဏာမၞိဟ် ပတုဲဖဵုညးဍုၚ်ကွာန် စပ်ကဵုလၟေၚ်ကမၠောန် MSFC တံဂှ် နာဲမန်သာၚ် ဟီုရ။
တုဲပၠန် ပ္ဍဲတွဵုရးမန် သွက်ညးဍုၚ်ကွာန် နွံအကြာပရေၚ်ပဋိပက္ခပၞာန် ပ္ဍဲခရိုၚ်သဓီု၊ ပွိုၚ်ဍုၚ်ကျာ်မြဟ်၊ ဇြပ်ဗု၊ ဍုၚ်ရေဝ်တံဂှ် ထံက်ပၚ်ကၠောန်မံၚ်ကဵု တန်ဗတောန် ပရေၚ်ဂီုကၠီုညးဍုၚ်ကွာန်တံ ထံက်ပၚ်စၞစဇွောံမတံ ပရေၚ်ထတ်ယုက်တံဂှ် ညးသောၚ်ကလး ကဵုရ။
အပ္ဍဲကဵုကံၚ်သဳဖိတ်ဒရေဝ်ဍုၚ်မန်ဂှ် ပရေၚ်စဵုဒၞာ၊ ပရေၚ်သၞောဝ်ဓဝ်၊ ကေၚ်ကာအပ္ဍဲဍုၚ်၊ ပရေၚ်ထတ်ယုက်၊ ပရေၚ်ပညာ၊ ပရေၚ်ရီုဗၚ် ဗစာရဏာမၞိဟ်၊ ကောန်ၚာ်ကဵုညးဗြဴ၊ ဆက်ဆောံဍုၚ်မ္ၚး၊ ပရေၚ်ဘဏ္ဍာကဵု ကံက်အခေါန်တံဂှ် ပံက်လဝ်ဌာနလၟေၚ်ၚ်တုဲ ထမံက်မံၚ်ရုပ်ရဴ ကမၠောန်တံ မဒှ်ရ။
ပ္ဍဲပေါဲဆဵုဂဗတက်ကျာဏံ နဒဒှ် ကံၚ်သဳပၠတရဴဖိတ်ဒရေဝ် SCEF သဘာပတိ(၁)ဂှ် နာဲကောရတ် ကေုာံ ကမ္မတဳပရေၚ်အုပ်ဓုပ် MSFC ဥက္ကဌ နာဲမန်သာၚ် ဟီုဂလာန်ဗ္ကန်တုဲ ညးတာလျိုၚ် MSFC တံ သ္ကိုပ်တမ်ဒပ် MSRF နိုၚ်ဒရာဂေါန် ကဵု ကောန်သ္ဂံၚ်တံ တိုန်စိုပ်လဝ်အိုတ်ရ။
ဒက်ပ္တန်လဝ် ကံၚ်သဳပၠတရဴဖိတ်ဒရေဝ် SCEF နကဵုညးစၞးနူကဵုဂကောံ ကဏ္ဍနာနာ ပရေၚ်အုပ်ဓုပ်၊ ပရေၚ်ခၞံဥပဒေ၊ ပရေၚ်စဳရေၚ်သၞောဝ်ဓဝ် ကမ္မတဳ ၃ တိုၚ်တံတုဲ ထမံက်မံၚ်ပရေၚ်ကမၠောန် ဇၟာပ်ပ်ဌာနတံ မဒှ်ရ။
သၟဝ်တဲဌာနပရေၚ်စဵုဒၞာ ကောပ်ကာဲမံၚ်ဂှ်တှ်ေ ဒပ်ပၠန်ဂတးဍုၚ်မန် MSRF နွံမံၚ်တုဲ ဒပ်စဵုဒၞာညးဍုၚ်ကွာန်ရေဝ် YPDF လေဝ် ဒှ်ကောန်ဂကောံ MSFC ပံၚ်တောဲထမံက်အာမံၚ် ပရေၚ်ဍုၚ်ကွာန် ပရေၚ်ပၞာန်တံရ။
ပရိုၚ်-သြၚ်လောန်တိုၚ်မ်
Photo – MSRF