ကျာ်မြဟ်၊ နိုဝမ်ပါ ၇
အပ္ဍဲတွဵုရးမန် ပွိုၚ်ဍုၚ်ကျာ်မြဟ်ကီု သီုကဵုဒၞာဲအလုံဍုၚ်မွဲ ၅၅ ပွိုၚ်ဍုၚ် ဒၞာဲညးစၞးအမာတ်သၠးမံၚ်တံဂှ် ကၠောန်အာပေါဲရုဲမာဲ အကြာရောၚ် နူကဵုကဝ်မယှေန်ပေါဲရုဲမာဲကၟိုန်ဍုၚ် အလဵုအသဳပၞာန်လလောၚ်တြး လဝ်ရ။
အတိုၚ် နူကဵုကဝ်မယှေန် ပေါဲရုဲမာဲကၟိုန်ဍုၚ် လလောၚ်တြးလဝ် ပ္ဍဲဂိတုနိုဝမ်ပါ ၅ ဂှ်တှ်ေ သွက်ဂွံကၠောန်အာ ပေါဲရုဲမာဲအကြာ ပ္ဍဲသၞာံ ၂၀၂၇ ဂိတုအေဗရာ ၄ တ္ၚဲအဒိုတ် မဒှ်တုဲ နကဵုသၞောတ်ညးဂွံမာဲဂၠိုၚ်ဇၞး FPTP ဂှ် ကၠောန်အာရောၚ်။
အပ္ဍဲပေါဲရုဲမာဲအကြာဏံ သွက်စၠတ်ထဝ်ညးဍုၚ်ကွာန်ဂှ် ၃၄ ဒၞာဲ၊ သွက်စၠတ်ထဝ် ကောန်ဂကူ ၅ ဒၞာဲ၊ သွက်ရးဒေသကဵုတွဵုရး ၁၆ ဒၞာဲ ဂှ် ကၠောန်အာရောၚ် ဂွံတီရ။
အပ္ဍဲကဵုပွိုၚ်ဍုၚ်လလောၚ်တြးလဝ် ပေါဲရုဲမာဲအကြာတံဂှ်တှ်ေ ညးစၞးအမာတ်ညးတံစိုပ်အာလဝ် ပ္ဍဲဂကောံအလဵုအသဳတံကီု ဟိုတ်နူပရေၚ်ဂီုကၠီုတုဲကၠုၚ် ပ္ဍဲကာလပေါဲရုဲမာဲတေံ ဟွံဒှ်ကၠောန်လဝ်ပေါဲရုဲမာဲတံ မပါလုပ်ရ။
ညးစၞးအမာတ် စၠတ်ထဝ်ညးဍုၚ်ကွာန် နူကဵုပွိုၚ်ဍုၚ်ကျာ်မြဟ် အမာတ်ဗော်ဗျဳခိုၚ်ဖျိုဝ် USDP ဥူမျိုဝ်မျေအ် ကေတ်တာလျိုၚ် ဒှ်အာဒုဝန်ဇၞော် ဌာနဝန်ဇၞော်ပရေၚ်သိုၚ်ခၞံတုဲ စၞးညးဏံဂှ် ဒးကလေၚ်စုတ်လဝ် ပ္ဍဲကဵုပေါဲရုဲမာဲအကြာ မဒှ်ရ။
အပ္ဍဲလက်ထက်ကံၚ်သဳပၞာန် တုဲကၠုၚ်သၞာံ ၂၀၂၅ ဂိတုအေဗရာဂှ် ခါန်ကၞက်လဝ် ဥူမျိုဝ်မျေအ် ဒုဝန်ဇၞော် ဌာနပရေၚ်သိုၚ်ခၞံတုဲ ပ္ဍဲကဵုပေါဲရုဲမာဲဂှ်လေဝ် နကဵုညးစၞးအမာတ် ဗော်ဗျဳခိုၚ်ဖျိုဝ် USDP လုပ်ပြိုၚ်ဂွံအာဇၞးတုဲ ဆက်ခါန်ကၞက်ကဵုလဝ် ဒုဝန်ဇၞော် ဌာနပရေၚ်သိုၚ်ခၞံ ရ။
တုဲကၠုၚ်ပေါဲရုဲမာဲ ၂၀၂၅ – ၂၀၂၆ တေံ သွက်ညးစၞးအမာတ် စၠတ်ထဝ်ညးဍုၚ်ကွာန် ပွိုၚ်ဍုၚ်ကျာ်မြဟ်ဂှ် ညးစၞးနူကဵု ဗော်ပရေၚ်ဍုၚ်ကွာန် ၆ ဗော် အလံၚ်အမာတ် ၆ တၠတံ လုပ်ပြိုၚ်တုဲ နူကဵုဗော် USDP ဥူမျိုဝ်မျေအ် ဂွံအာဇၞးရ။
ပရိုၚ်-သြၚ်လောန်တိုၚ်မ်
Photo – MOI