မတ်မလီု ၊ နိုဝမ်ပါ ၇
နူကဵုပရေၚ်ဆက်ဆောံ ကိုဝ်ရဳယာ-အာသဳယာန် မွဲအဆံၚ် မိက်ဂွံကဵုဍုၚ်ကိုဝ်ရဳယာ ထံက်ဂလာန်ကဵု နတဲပရေၚ်ဍုၚ်ကွာန်သၟးဟွံက မိက်ဂွံကဵုသၠုၚ်ပတိုန် ပရေၚ်ဒဳမဝ်ကရေသဳရဂှ် ကံၚ်သဳဖိတ်ဒရေဝ် ပၠတရဴ SCEF အာတ်မိက်လဝ်ရောၚ် ပတိတ်လဝ်ပရိုၚ် ပ္ဍဲနိုဝမ်ပါ ၆ ဂှ်ရ။
အပ္ဍဲဂိတုနိုဝမ်ပါ ၅ ညးစၞးဂကောံ SCEF ဆဵုဂဗကဵု အမာတ်စၠတ်ထဝ် ကောန်ဂကူ ကိုဝ်ရဳယာတံတုဲ သွက်ဂွံဒက်ပတန်ပရေၚ်ဒဳမဝ်ကရေသဳ ကေုာံ အကာဲအရာပရေၚ်ဍုၚ်ကွာန်ဗမာ ပြဟ်ဟ်ဏံကီု တၚ်ရန်တၟံ ဗီုပြၚ်ဒက်ပတန်လဝ် SCEF ကေုာံ အကာဲအရာဒှ်မံၚ်နတဲလၟုဟ်တံဂှ် သောၚ်ကလးကဵုလဝ်ရ။
စပ်ကဵုတၚ်နွံပၟိက် အရီုဗၚ်ဗစာရဏာမၞိဟ် သွက်အပ္ဍဲဍုၚ်ဗမာကီု ဒေသပယျဵုတံကီု နူကဵု SCEF ချိက်ဆက်အာကဵု ဍုၚ်ကိုဝ်ရဳယာတုဲ နူကဵုဂကောံ SCEF တိဍာ်ထိၚ်ချုက်လဝ်တံဂှ် ညံၚ်ဂွံကဵုအရီုဗၚ်မာန် မိက်ဂွံကဵုဂစာန်အာ ပတိုန်ထ္ၜးလဝ်ရ။
စပ်ကဵုပရေၚ်ကိစ္စ ဂကောံအဓိကလ္ၚဵုတံ ဟွံပါလုပ် အပ္ဍဲ SCEF ဏီကီု သွက်အခေါၚ်ပိုၚ်ပြဳ ကောန်ဍုၚ်အရၚ်တံကဵု အကြာအလဵုအသဳဖိတ်ဒရေဝ်တံ ဗီုပြၚ်လဵု ပါ်ပရအ်အာအဝဵုအာဏာတံဂှ်ကီု နူကဵုဒပ်ပၞာန်ပြံၚ်လဝ်ဗီုပြၚ် အလဵုအသဳညးဍုၚ်တုဲ ဆက်ဂၠာဲအာမံၚ် ပရေၚ်သ္ပစၟတ်သမ္တီ ဂၠးကဝ်တံဂှ် ဗီုလဵုဖန်ဇန်အာရောဂှ် အမာတ်ကိုဝ်ရဳယာတံကဵု သဘာပတိ သၟာန်လဝ်ရ။
တုဲပၠန် ဍုၚ်ဗမာပြံၚ်သၠာဲအာ သၞောတ်ဒဳမဝ်ကရေသဳဂှ်တှ်ေ ဂုဏ်ဖဵုပရေၚ်ဍာ်ဇမၠိၚ် သွက်ဍုၚ်ကြုက်ကီု သွက်ဍုၚ်ဇိုၚ်ဝုတ်ဒိုဟ်တံကီု ခိုဟ်နူ ဒးပံၚ်မံၚ်ကဵုဒပ်ပၞာန်ဗမာဏီဂှ် ညံၚ်ညးတံဂွံဒုၚ်ကၠုၚ်တဲ ဗီုပြၚ်လဵုစန်ဒက်အာတုဲ နူကဵုအလဵုအသဳကဵု စၠတ်ထဝ်ဍုၚ်ကိုဝ်ရဳယာ ပရေၚ်သာ်လဵု ကဵုဖျုန်ထေက်၊ နကဵု SCEF ပရေၚ်ကမၠောန်ပံၚ်တောဲ ကၠောန်အာမာန် ချိုတ်တ်ပၠိုတ်တ်တံဂှ် သၟာန်လဝ်ကီုရ။
ဂကောံကောန်ဍုၚ်အရၚ်တံကီု ဖိတ်ဒရေဝ်ယူနေတ်၊ ဂကောံဇြဟတ်ပၠန်ဂတး သီုဖအိုတ်တံဂှ် နူကဵု SCEF လုက်စုက် ဆက်ဆောံမံၚ်တုဲ ကၠောန်အာ အတိုၚ်တၚ်တုပ်စိုတ်ဘုံရောၚ် ညးစၞး SCEF တံ ကလေၚ်သောၚ်ကလးလဝ်ရ။
ဒပ်ပၞာန် ကြဳမံၚ်ဗုမ် လ္တူညးဍုၚ်ကွာန်တံဂှ် ဍုၚ်ကိုဝ်ရဳယာကီု ဂၠးကဝ်တံကီု ဟွံသ္ပပရေၚ်စၟတ်သမ္တီ ဒဵုကဵုလၟုဟ်ဂှ် ဆက်ဒတူဒလိုၚ် ထိၚ်ကဵုအာထေက်တုဲ နကဵုမူဝါဒ ပရေၚ်ဒုၚ်လျိုၚ် တိဍာ်ညိၚ်ဝပ်မွဲ ဒပ်ပံၚ်ကောံမဟာမိတ် ဆက်ဆောံအာကဵု ဍုၚ်ကြုက်၊ အိန္ဒိယ၊ ဍုၚ်အာသဳယာန် ဇိုၚ်ဝုတ်ဒိုဟ်တံဂှ် နွံမံၚ်ပၟိက်ရောၚ် ဟီုလဝ်ရ။
တုဲပၠန် အမာတ်ကလုတ်ကုလသမဂ္ဂ သ္ပစၞးညးဍုၚ်ကွာန်ဍုၚ်ဗမာဂှ် ညံၚ်ဂွံဆက်ထံက်ဂလာန်အာကီု သွက်ဂွံကဵုအထံက်ပၚ် ပရေၚ်ဗစာရဏာမၞိဟ်တံဂှ် ဂကောံညးစၞး SCEF တံ အာတ်မိက်ဏာအလဵုအသဳကေုာံ စၠတ်ထဝ်ဍုၚ်ကိုဝ်ရဳယာတံ မဒှ်ရ။
အပ္ဍဲပေါဲသဳကၠဳဏံ ညးက္ဍိုပ်ဂကောံညးစၞး RKP ဂေန်ဂျောန်ဟယံၚ် သ္ကိုပ်သ္ကလဝ် အမာတ်စၠတ်ထဝ်လ္ၚဵုတိုန်စိုပ်တုဲ နကဵုသဘာပတိဂှ် ပါမောက္ခ ဝါန်ဒုၚ်အု နူကဵုဌာနလ္ၚတ်ပရေၚ်ဂၠးကဝ် တက္ကသိုလ် Dong-A ရေၚ်တၠုၚ်ကဵုလဝ်ရဂှ် ချူထမံက်လဝ် ပ္ဍဲလိက်လလောၚ်တြးရ။
အပ္ဍဲဂကောံညးစၞး SCEF ဂှ်တှ်ေ ဂကောံညးအုပ်ကာဂမၠိုၚ် ဝန်ဇၞော်ပရေၚ်ဍုၚ်သအာၚ် NUG ဒဝ်ဇြေန်မာအံၚ်၊ ညးအုပ်ကာ(၁) KNPP၊ ညးတာလျိုၚ် ကမ္မတဳကေၚ်ကာ ပရေၚ်ဍုၚ်သအာၚ် IEC ကရေၚ်ဍာဲ နဲနေဝ်ဖလိုဝ်၊ ညးအုပ်ကာ CNF သလိုၚ်ထက်နဳ၊ ဂကောံဘဏ္ဍာ SCEF၊ ဝန်ဇၞော် ပရေၚ်ဘဏ္ဍာကိုန်အစဳဇန် ဓလိုက်တမ်ရိုဟ် ဥူတေန်ထောန်နိုၚ်တံ တိုန်စိုပ်သဳကၠဳလဝ် မဒှ်ရ။
ပရိုၚ်-သြၚ်လောန်တိုၚ်မ်
Photo – SCEF