ကျာ်ထဝ်၊ နိုဝမ်ပါ ၇
အပ္ဍဲတွဵုရးမန် ပွိုၚ်ဍုၚ်ကျာ်ထဝ် ဗ္ဒိုပ်ဒပ်ပၞာန်ညးဍုၚ်ကွာန် PDF ယာယဳ နွံမံၚ်ကရပ်ကွာန်ခမံက်ခွေ မွဲဒၞာဲဂှ် ဒပ်ပၞာန်ဗမာသီဂွံဏာရဂှ် ရိုဟ်ကၞက်ပရိုၚ်ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အပ္ဍဲနိုဝမ်ပါ ၅ အခိၚ်နူဂယးဂှ် ကရောၚ်ပၞာန်ဗမာတံ တိုန်ကၠုၚ်ကဵုဇြဟတ်ဂၠိုၚ်ၚ်တုဲ စိုပ်ကရပ်ကွာန်ခမံက်ခွေဂှ် ဒှ်ပေါဲဗတိုက်ကဵု ဒပ် KNLA သ္ကိုပ်သ္က ဂကောံမဟာမိတ် ဒပ်ပၠန်ဂတးတံရ။
ပ္ဍဲကဵုပေါဲဗတိုက်ဏံ လပါ်ဒပ်ပၞာန်ဗမာတံ ဍိုက်ကဵုဇြဟတ်ဂၠိုၚ်ၚ်တုဲ ထပက်ကၠုၚ်ကရောၚ်ပၞာန်ဂှ်တှ်ေ ဒပ်ပၠန်ဂတးတံ ဒးဆုဲတိတ်အာနူကဵု ဗဒိုပ်ယာယဳ နွံမံၚ်ကရပ်ကွာန်ခမံက်ခွေဂှ်ရ။
နူကၠာကရောၚ်ပၞာန်ဗမာတံ ဟွံထပက်ကၠုၚ်ဏီဂှ် ပဆုဲပြံၚ် ပတိတ်ဏာလဝ် ကပေါတ်အရာကိစ္စဇၞော်တံ ဗွဲမဂၠိုၚ်တုဲရဂှ် လပါ်ဒပ်ပၠန်ဂတးတံ သ္ဂးရ။
ကရောၚ်ပၞာန်ဗမာ စိုပ်မံၚ်ကွာန်ခမံက်ခွေတံကဵု အကြာဒပ်ပံၚ်တောဲ မဟာမိတ်ပၠန်ဂတးတံ ဆက်ဒှ်မံၚ်ပေါဲဗတိုက် ဒဵုကဵု နိုဝမ်ပါ ၆ အခိၚ်နူဂယးဂှ်ရ။
စနူကဵု ဂိတုနိုဝမ်ပါ ၃ ပ္ဍဲပွိုၚ်ဍုၚ်ကျာ်ထဝ်ဂှ် ဇြဟတ်ဒပ်ပၞာန်ဗမာ ၁၂၀၀ ပြၚ်ၚ်တံ ပါ်လဝ် ၄ ကရောၚ်တုဲ ထပါ်မံၚ်ကရောၚ်ပၞာန် မဒှ်ရ။
ဟိုတ်နူ ကရောၚ်ပၞာန် ဒပ်ပၞာန်ဗမာထပက်လုပ်ဂှ်ကီု ပေါဲဗတိုက် အကြာၜါလပါ်လေဝ်ဒှ်မံၚ်ဂှ်တုဲ ရဲကွာန်ဇြဳပျံၚ် နူကဵု (၁) စဵုစိုပ်ဇြဳပျံၚ် (၆) ကွာန်၊ ကွာန်ဝေၚ်ကာန်၊ ကျံက်ယျေတွေၚ်၊ ပျေန်ကတိုဝ်ကုၚ်၊ ပုၚ်နဲကုၚ် နူကဵုကွာန် ၂၀ ပြၚ် ညးဍုၚ်ကွာန် ၁၅၀၀၀ ပြၚ်ၚ် ဒးဂြိပ်ပါဲမံၚ် ဒၞာဲဗၠးဘဲအန္တရာဲတံရ။
ပရိုၚ်-သြၚ်လောန်တိုၚ်မ်
Photo – Social Media