နေဗျဳဒဝ် ၊ နိုဝမ်ပါ ၇
အပ္ဍဲကဵုစၠတ်ထဝ် အလဵုအသဳပၞာန်ထိၚ်ချုက်လဝ် သွက်ဒေသဆန္ဒမာဲ ပွိုၚ်ဍုၚ် ၅၅ ဒၞာဲညးစၞးအမာတ် သၠးအာလဝ်တံဂှ် စိုပ်ဂိတုအေဗရာ ၄ သၞာံဂတးဏံမ္ဂး ကၠောန်ကဵုပေါဲရုဲမာဲအကြာရောၚ် နူကဵုကဝ်မယှေန် ပေါဲရုဲမာဲကၟိုန်ဍုၚ် UEC လလောၚ်တြး ပ္ဍဲကဵုနိုဝမ်ပါ ၅ ဂှ်ရ။
အတိုၚ်ဥပဒေ ကဝ်မယှေန်ပေါဲရုဲမာဲကၟိုန်ဍုၚ် ၝောံပိုဒ် ၁၀ ကေုာံ ဥပဒေပေါဲရုဲမာဲစၠတ်ထဝ် ဆေၚ်စပ်ကဵုၝောံပိုဒ် ၃၄(ဂ)၊ နဲကဲဥပဒေ ၁၆(က) ဂှ် သွက်ဂွံကၠောန်အာပေါဲရုဲမာဲအကြာဂှ် မ္ဒးလလောၚ်တြးဏာ သ္ဂးရ။
ဣဏံဂှ်တှ်ေ ဟိုတ်နူပရေၚ်နာနာသာ် ညးစၞးအမာတ်တံ စိုပ်အာအပ္ဍဲဂကောံအလဵုအသဳတုဲ ဒၞာဲသၠးအာလဝ်တံဂှ် သွက်ဂွံကလေၚ်ဗပေၚ်စုတ်ကီု ဟိုတ်နူအကာဲအရာဒၞာဲတိဍာ် ဟွံဒှ်ကၠောန်လဝ်ပေါဲရုဲမာဲတံဂှ် နဒဒှ်ပေါဲရုဲမာဲ သွက်ဂွံကၠောန်ကဵုအာ မဒှ်ရ။
အပ္ဍဲပေါဲရုဲမာဲအကြာမ္ဂး နကဵုသၞောတ် ညးဂွံမာဲဂၠိုၚ်အိုတ်ဇၞး FPTP ဂှ် ကၠောန်အာတုဲ ပ္ဍဲစၠတ်ထဝ်ညးဍုၚ်ကွာန်ဂှ် ၃၄ ဒၞာဲ၊ ပ္ဍဲစၠတ်ထဝ်ကောန်ဂကူဂှ် ၅ ဒၞာဲ၊ ပ္ဍဲစၠတ်ထဝ်ရးဒေသကဵု တွဵုရး ၁၆ ဒၞာဲတံ ပါလုပ်ရ။။
သွက်ဒၞာဲတိဍာ်ဆန္ဒမာဲ စၠတ်ထဝ်ညးဍုၚ်ကွာန်၊ စၠတ်ထဝ်ရးဒေသကဵု တွဵုရးတံမ္ဂး ဒေသဒပ်ပၞာန်ဗမာတံ ကလေၚ်ထိၚ်ချုက်ဂွံလဝ်ကီု ဒၞာဲတိဍာ် အကြာဒပ်ပၞာန်ဗမာကဵု ဒပ်ပၠန်ဂတးတံ ပြိုၚ်ပကာန်မံၚ် ဇြဟတ်ပၞာန်တံလေဝ် စုတ်လဝ်ကီုရ။
ဗွဲတၟေၚ် တွဵုရးချေၚ် ပွိုၚ်ဍုၚ်တောန်ဇြာန်ကဵု ဖလာန်၊ ရးသဂိုၚ် ကဝ်လေန်၊ ထဳချိုက်၊ မာန်မံက်၊ အေန်တဝ်၊ ယေန်မာပေန်၊ ပလေဝ်၊ တဇြာ၊ ရးမာန္တလေဝ် မိုဝ်ဂုက်၊ သေတ်ကူ၊ နွာထိုဝ်ဂျဳ ကေုာံ တွဵုရးသေံသၟဝ်ကျာ ကျံက်မေဝ်တံ မဒှ်ရ။
သွက်ပေါဲရုဲမာဲအကြာ စၠတ်ထဝ်ကောန်ဂကူဂှ်တှ်ေ တွဵုရးကချေၚ် ဒၞာဲဒေသဆန္ဒမာဲစၟတ် (၅)၊ တွဵုရးချေၚ် ဒေသဆန္ဒမာဲစၟတ် (၃)၊ ရးဒေသဗဂေါ ဒေသဆန္ဒမာဲစၟတ် (၄) ကဵု (၅)၊ ရးဒေသမာန္တလေဝ် ဒေသဆန္ဒမာဲစၟတ် (၆) တံ မပါလုပ်ရ။
ဆဂး ဒၞာဲတိဍာ်ဒပ်ပၞာန် အာရက္ခ AA ထိၚ်ချုက်ဂွံလဝ် တွဵုရးရခေၚ် ၁၄ ပွိုၚ်ဍုၚ်ဂှ်တှ်ေ ဒပ်ပၞာန်ဗမာဒးလးလဝ်တဲ သီုဖအိုတ်တုဲ သွက်ပေါဲရုဲမာဲအကြာဂှ် စုတ်ကဵုလဝ် ဒေသတိဍာ်ဆန္ဒမာဲတံ ဟွံမာန်ပုဟ်။
မွဲလပါ်ပၠန် သွက်ဂွံကလေၚ်ထိၚ်ချုက်အာ ဒၞာဲတိဍာ် ဒပ်ပၞာန်ဗမာ ဒးလးလဝ်တဲတံမာန်ဂှ် နကဵုပရေၚ်ယိုက်ဝန်ပၞာန် ပကောံဂွံလဝ်ဇြဟတ်တံဂှ် ဒပ်ပၞာန်ဗမာတံကလေၚ်ထပက်မံၚ်ပၞာန် ပ္ဍဲကဵုတိဍာ်ပၠန်ဂတးတံကီု နူကဵုပၞာန်ကျာလေဝ် ဟွံရုဲဒၞာဲကြဳဗုမ်တုဲ ဗတိုက်မံၚ် မဒှ်ရ။
ပြဟ်ဟ်ဏံ နူကဵုပေါဲရုဲမာဲဂှ် ဒပ်ပၞာန်ဗမာ ပြံၚ်လှာဲလဝ် အလဵုအသဳပၞာန်ကီုလေဝ် ဂကောံအာသဳယာန်ကဵု ကုလသမဂ္ဂတံဂှ် နကဵုပရေၚ်ဍုၚ်ကွာန်လုပ်သၞောဝ် သ္ပကဵုလဝ်စၟတ်သမ္တီ ဟွံသေၚ်ဏီပုဟ်။
အပ္ဍဲပေါဲရုဲမာဲ ၂၀၂၅-၂၀၂၆ တေံ ပါ်ပိသ္ကုတ်တုဲ ဒပ်ပၞာန်သီအဝဵုကၠောန်ကဵုလဝ်ဂှ် အလုံဍုၚ်မွဲ ပစူဂွံလဝ်ကဠာမာဲ ၂၆၃ ပွိုၚ်ဍုၚ်ဟေၚ်မာန်တုဲ ဒးပသှ်ေစွံလဝ် ၆၇ ပွိုၚ်ဍုၚ်ဏီရ။
ဣဏံဂှ် ပ္ဍဲကဵုဝၚ်ပေါဲရုဲမာဲ ရးနိဂီုဍုၚ်ဗမာ မွဲဒမြိပ်မ္ဂး ဒးပသှ်ေစွံကၠုၚ်လဝ် ဒေသတိဍာ် ရုဲမာဲဂၠိုၚ်အိုတ်တုဲ ဍုၚ်ဂၠးကဝ်ကီု ညးဍုၚ်ကွာန်ကီု ကဵုလဝ်ပရေၚ်ထံက်ဂလာန်ပေၚ်ၚ် ဟွံမွဲပုဟ် ညးချဳဒရာၚ်ပရေၚ်ဒဳမဝ်ကရေသဳတံ ထံက်ထ္ၜးလဝ်ရ။
ပရိုၚ်-သြၚ်လောန်တိုၚ်မ်
Photo – MOI