ဘာအၚ်၊ နိုဝမ်ပါ ၉
နူကဵုပၞာန်ကျာ အဟိန်ကြဳမံၚ်ဗုၚ်တံ ပ္ဍဲကဵုတွဵုရးကရေၚ်ဂှ်တှ် သွက်ဂွံဂွံပရေၚ်ၜိုဟ်လလမ်မ္ဂး သောၚ်ကလးအာကဵု ဓဝ်အေင်ဒုၚ် ကၠိုဟ်ခၠၚ်တံညိ သမ္မတခါန်ကၞက်ကေတ်တ် ဗတိုက်ဖအောဝ် ဟီုဂးလဝ်ရ။
ပ္ဍဲနိုဝမ်ပါ ၇ သွက်သဘၚ်ကၞာ တ္ၚဲတွဵုရးကရေၚ် မရနုက်ကဵု ၇၁ ဝါ သမ္မတ ဥူမေန်အံၚ်လှိုၚ် ပလံၚ်ဗစိုပ်ကဵုလဝ် ပ္ဍဲလိက်သဝဏ်ဂှ် ဗတိုက်ဖအောဝ်လဝ်ရ။
အကြာတွဵုရးကရေၚ် ပ္ဍဲဒေသလ္ၚဵုတံ အခိၚ်ဗွဲမလံလ ဟိုတ်နူ ဒှ်ကၠုၚ်လဝ်ပရေၚ်ပဋိပက္ခရပ်လွဟ်ကဵု ပကီုပရာတ်တံဂှ်တှ်ေ ဇီုကပိုက်ဒှ်မံၚ်ကဵု သွက်ဘဝမၞိဟ်တံ ပရေၚ်ပညာ၊ ပရေၚ်ထတ်ယုက် ကဵု လ္တူပရေၚ်ပိုန်ဒြပ်တံဂှ် ဂွံဆဵုညာတ်ကေတ်မံၚ်ရောၚ် ဥူမေန်အံၚ်လှိုၚ် သ္ဂးရ။
ပရေၚ်ၜိုဟ်လလမ်ဝွံ ဒှ်ရိုဟ်ကၞက်သ္ဇိုၚ် သွက်ပရေၚ်ဖောအ်ဗြဳ ဒေသတံတုဲ မွဲလပါ်ကေုာံမွဲလပါ် ပရေၚ်ဓဝ်ကၠိုဟ်ခၠၚ်ကဵု ဂလာန်ပတေဟ်တံ နွံမံၚ်ညးသ္ကံမ္ဂး ပ္ဍဲအရာဒက်ပတန် ပရေၚ်ၜိုဟ်လလမ် ဍာ်ဇမၠိၚ်ဂှ် ဒှ်ကၠုၚ်ဇြဟတ် အဓိကရောၚ် ဟီုရ။
သွက်တွဵုရးကရေၚ် ညံၚ်သ္ဂောံဂွံပရေၚ်ၜိုဟ်လလမ်မ္ဂး လ္တူလညာတ် ပါ်ခြာမံၚ်တံဂှ် မွဲလပါ်ကဵုမွဲလပါ် ညံၚ်ဂွံစွံအာ ပရေၚ်ရှ်ေသှ်ေအဲပရဲ၊ တက်ကျာသဳကၠဳသောၚ်ကလးအာ နကဵုဓဝ်လအေၚ်ဒုၚ်တံကီု၊ ပရေၚ်ပဋိပက္ခတံ သွက်ဂွံယအ်ကၠေံကၠက်အာဂှ် ညးဆေၚ်စပ်တံသီုဖအိုတ် နကဵုစိုတ်စေတနာဍာံဍာံ ထေက်ကဵုဒးပံၚ်တောဲ ကၠောန်အာမွဲစွံရောၚ် ကၟာတ်လဝ်ဒုဟ်ညးတုဲ ဥူမေန်အံၚ်လှိုၚ် ဟီုလဝ်ရ။
ပ္ဍဲတွဵုရးကရေၚ် နူကဵုဒပ်ပၞာန်ကျာ အလဵုအသဳပၞာန် အဟိန်ကြဳမံၚ် ဗုၚ်ဏံဂှ်တှ်ေ ညးဍုၚ်ကွာန် မံၚ်စံၚ်တန်တဴမံၚ် ပ္ဍဲကဵုတွဵုရးကရေၚ်တံ ဘဲအန္တရာဲနာနာသာ်ကဵုဂွံဗၠးၜးတုဲ သြဝ်ကဵုဂွံပိုၚ်ပြဳအာ ဘဝမၞိဟ် ၜိုဟ်သြိုဟ်သာယာအိုတ်ညိဂှ် မုက်ဂွဟွံမွဲ ဥူမေန်အံၚ်လှိုၚ် ကဵုဏာရာဒၞာမိက်ရ။
တ္ၚဲတွဵုရးကရေၚ် မရနုက်ကဵု ၇၁ ဝါဂှ် နူကဵုနိုဝမ်ပါ ၅ စိုပ် ၁၀ သွက်ဂွံကၠောန်အာ ပွိုၚ် ၆ တ္ၚဲပေၚ်ၚ်ဂှ် အလဵုအသဳပၞာန်တွဵုရး စဳဇန်လဝ်တုဲ ညးအာတရဴတံ ညံၚ်ဂွံကၠုၚ်ဝေၚ် တ္ၚဲသဘၚ်ပေါဲ တ္ၚဲတွဵုရးကရေၚ်ဂှ် ဗတိုက်ဖအောဝ် တံၚ်ဂြဲမံၚ်ရ။
ပရိုၚ်-သြၚ်လောန်တိုၚ်မ်