ပလဝ်၊ နိုဝမ်ပါ ၉
အပ္ဍဲကဵုရးတနၚ်သဳ ပွိုၚ်ဍုၚ်ပလဝ် ကွာန်မဇြဝ် ဟိုတ်နူဒပ်ပၞာန်ကျာကြဳဗုမ်တုဲ ညးဍုၚ်ကွာန် ၃ တၠတံ ချိုတ်အာလဝ်ဂှ် နူကဵုဗော်သွးကောန်ဂကူကရေၚ် KNU ခရိုၚ်ဗိက်ထဝါဲ လလောၚ်ပတိတ်ပရိုၚ်ရ။
အပ္ဍဲနိုဝမ်ပါ ၆ ၜိုတ်အခိၚ်နူဂယး ၁၀ နာဍဳဂှ် ပေါဲဗတိုက်ဟွံမွဲမွဲသာ် မွဲအခိၚ်ဓဝ်ၜၚ်ကျာ ၄ ပန်မတံ ပြိုၚ်တုဲကြဳဖျေံလဝ်ဗုမ် မဒှ်ရ။
ဟိုတ်နူကဵုပရေၚ်ကြဳဗုမ်ဏံဂှ် နူကဵုကွာန်မဇြဝ် ကောန်ၚာ်အာယုက် ၁၀ သၞာံမွဲတၠ၊ ညးဇိုၚ်တဲဟွံခိုၚ်မွဲတၠ ကေုာံ ညးဗြဴအာယုက် ၄၀ ပြၚ် မွဲတၠ ချိုတ်တုဲ ကောန်ကွာန် ၇ တၠတံ ဒးအာဝပ်ရ။
ပေါဲဗတိုက်ဟွံမွဲကီုလေဝ် ဒၞာဲကွာန်ဌာန်ဒေသ ညးဍုၚ်ကွာန်တံမံၚ်စံၚ်ဂှ် နကဵုရန်တၟံနွံနွံ ကြဳလဝ်ဗုမ်ဂှ် ညးတာလျိုၚ်လလောၚ်ပရိုၚ် KNU ခရိုၚ်ဗိက်ထဝါဲ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲပရေၚ်ကြဳလဝ်ဗုမ်ဏံ သ္ၚိမွဲမ၊ ဘာတန်ကောန်ၚာ်မွဲမ၊ ကွဳလိုန်ဓါတ် မွဲမ ဒးဘဲလီုလာ်အာတုဲ ညးဍုၚ်ကွာန်လၟိဟ်ကဵုလ္ၚီ ထောံသ္ၚိဌာန်ဒးဂြိပ်ပါဲအာအိုတ်ရ။
တုဲကၠုၚ် ဂိတုအံက်တဝ်ပါ ၃၀ တေံလေဝ် ရးတနၚ်သဳ ပွိုၚ်ဍုၚ်တယိတ်ချံၚ် ပ္ဍဲကဵုကွာန်ကညေန်ချံၚ်ဂှ် ၜၚ်ကျာပၞာန်ကြဳဗုမ်တုဲ ရဲသ္ၚိကၟိန်အိန်ထံၚ် အတိုၚ်မွဲသ္ၚိ ချိုတ် ၄ တၠတုဲ ဒးဝပ် ၃ တၠ နွံရ။
အကာဲအရာပရေၚ်ပၞာန် ကြံၚ်မ္ၚိုဟ်မံၚ် ရးတနၚ်သဳ ပ္ဍဲကဵုပွိုၚ်ဍုၚ်တံဂှ်တှ်ေ စနူဂိတုအံက်တဝ်ပါတုဲ နူကဵုဒပ်ပၞာန်ကျာအလဵုအသဳပၞာန် ဗက်ကြဳမံၚ်ဗုမ် အလန်ကၠေတ်ကၠုၚ်ရဂှ် ညးဒေသတံဟီုတုဲ ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media