တၚ်ဒုဟ်စောဲစပ် နုက်ပတိတ်ထောံ သမ္မတပါရာဂွေ သာန်ဒဳယေဂိုတုဲ ရပ်ထိၚ်လဝ်

အသာန်သဳယောန် ၊ နိုဝမ်ပါ ၉

ကောန်ဍုၚ်ကဝက်ပြၚ်ၚ်တံ လုပ်အကံက်ဗာန်ဟွံဂွံ ဟိုတ်နူပရေၚ်သၞောတ်ဗာန် ဒေါမ်သရိုဟ်အာဂှ် တၚ်ဒုဟ်စောဲစပ် နုက်ပတိတ်ထောံ သမ္မတပါရာဂွေ သာန်ဒဳယေဂို ပဳနေဝ်ယာတုဲ ရပ်ထိၚ်စွံလဝ် ပ္ဍဲသ္ၚိရ။

ပ္ဍဲအကြာသတ္တဟပြဟ်ဟ်ဏံ ဗာန် Ueno Bank ဆက်စပ်မံၚ်ကဵု ပရေၚ်ဂုဏ်ဖဵုပူဂဵုညးတေံ ဒေါမ်သရိုဟ်အာတုဲ အမာတ်ဗော်ညးတေံကီု အမာတ်စၠတ်ထဝ်တံကီု သွက်ဂွံနုက်ပတိတ်ထောံ သမ္မတပဳနေဝ်ယာဂှ် ဖျေံသ္ဂုတ်သွာတ်မာဲတုဲ ရပ်ထိၚ်ထောံရ။

သမ္မတပဳနေဝ်ယာ ပိုၚ်ပြဳဂွံလဝ်ယှေဝ်ယာ ပ္ဍဲကဵုကာန်ပနဳဗာန်ဏံ ကၠောန်လဝ်ပရေၚ်မှာရာမွဲမွဲသာ် ဟွံမွဲပုဟ် ကလေၚ်ကယျာန်လဝ်ရ။

ပ္ဍဲကဵုပရေၚ် တၚ်ဒုဟ်စောဲစပ်ညးတေံဂှ်တှ်ေ ပဋိပက္ခပရေၚ်သွက်ဂုဏ်ဖဵုနွံတုဲ လုပ်ထိၚ်ကြာပ်ဖန်ဖက်လဝ် ပရေၚ်ဆေၚ်စပ်ကဵုဥပဒေတံကီု သၠာဲဂၠံၚ်ကေတ်လဝ်သြန်ဂအုံပေန်သေန်ဂမၠိုၚ်တုဲ ကၟာတ်လဒဵုလဝ် ပရေၚ်ဂကောံဗဟဵုဗာန်တံဂှ် စောစပ်တၚ်လဝ်ဒုဟ် မဒှ်ရ။

ပွမဖံက်ပကဝ် ဂလာန်ပတေဟ်၊ ပွမဓလီုသြဇာကေုာံ တံၚ်ဂြဲတွံဓဝ်၊ ပွမသုၚ်စောဲသြန်ဂအုံဟွံစှ်ေဒၞာဲ စပ်ကဵုပရေၚ်စောစပ်တၚ်ဒုဟ်လဝ်တံတုဲ ပ္ဍဲနိုဝမ်ပါ ၇ ဂှ် စၟဳစၟတ်သၟာန်သၟုက်အာညးတေံရောၚ်ဂှ် သၟာဥပဒေအလဵုအသဳ သဳဗဳယာ မာဂါရဳတာ ဂန်သာလက် ဗက်သတာ ဟီုရ။

နဒဒှ်သမ္မတ ပက်ထရို အေလ်လဳယာနာ ညးလစှ်ေသမ္မတ ပဳနေဝ်ယာ ယဵုသစ္စာတုဲ စပ်ကဵုပရေၚ်ယှုက်ယှုဲထုဲထံၚ်ဏံ ထောံကၠဟ်လဝ် ညးဒးဂိဒေက်လၟိဟ်ပြကောတိကိုတ်တံ ဟွံသေၚ်ပုဟ် ကဵုလဝ်ကတိရ။

ဟိုတ်နူပရေၚ်သၞောတ်ဗာန် လီုလာ်ဒေါမ်သရိုဟ်အာတုဲ ကောန်ဍုၚ်ကွာန်တံ ဒးတတ်ကၠောံလဝ် သွက်ပရေၚ်အခက်အခုဲ ပွိုၚ်မွဲကာလဂှ်တှ်ေ ကလေၚ်ဂွံအာၚုဟ်လေဲပေၚ်ၚ်ရောၚ် အေလ်လဳယာနာ ညးဆက်ကေတ်အာ တာလျိုၚ်သမ္မတ ဒဵုကဵုသၞာံ ၂၀၂၈ တံ ဟီုရ။

ဗာန်လီုလာ်ဒေါမ်သရိုဟ်အာတံဂှ် နူကဵုဗာန်ဗဟဵုပါရာဂွေ သီကေတ်ထောံတုဲ ကောန်ဍုၚ်ကဝက်ပြၚ်ၚ်တံ လုပ်အပ္ဍဲအကံက် သြန်ညးတံပကောံလဝ် ဟွံဂွံဒှ်အာရ။

မၞိဟ်ပကောံလဝ်သြန် ၜိုတ် ၃ ပြကောတိကိုတ်ပြၚ်တံ လုပ်အပ္ဍဲအကံက်ဗာန်ပကောံလဝ်သြန်ညးတံ ကေုာံ အကံက်ပေန်သေန်တံ ပတိတ်ဟွံဂွံတုဲ ဗွဲတၟေၚ် ပ္ဍဲကဵုမဟာဍုၚ်ဇၞော် အသာန်သဳယောန်ဂှ် ညးဂမၠိုၚ်တံ ဒေါသတိတ်အာရ။

စပ်ကဵုပရေၚ်ဏံ အလုံဍုၚ်မွဲ ဒှ်တိုန်ပေါဲထ္ၜးဆန္ဒဗွဲမဂၠိုၚ်တုဲ ပ္ဍဲနိုဝမ်ပါ ၅ ဂှ် လၟိဟ်မၞိဟ်နကဵုလ္ၚီလ္ၚီတံ ပကောံတုဲ သွက်ဂွံပတိတ်ကဵုသြန်ညးတံ အာတ်မိက်တိုန်အိုတ်ရ။

ပေါဲထ္ၜးဆန္ဒ အခိၚ်ပြဟ်ဟ်တေံ ဒှ်ပဋိပက္ခကဵု ဒပ်ဗၠာဲသၟိၚ်တံဂှ် စကာဗုမ်ဍာ်ရမတ်ဓဇူ ပိုက်ဂစိုတ်ပၟတ်တံတုဲ ဒကးပရးထောံ ညးထ္ၜးဆန္ဒတံရ။

အပ္ဍဲကဵုညးစၞးအမာတ်စၠတ်ထဝ် ၄၅ တၠတံနွံမံၚ်ဂှ် ၄၄ တၠ ထံက်ဂလာန် စောဲစပ်တၚ်လဝ်ဒုဟ် လ္တူသမ္မတပဳနေဝ်ယာတုဲ ညးစၞးအမာတ်မွဲတၠဂှ် လုပ်အာစရၚ်မာဲလီု ဂွံတီရ။

Ref:BBC