ကျာ်မြဟ် ၊ နိုဝမ်ပါ ၉
တွဵုရးမန် ပွိုၚ်ဍုၚ်ကျာ်မြဟ်ကီု သီုအလုံဍုၚ်မွဲ သွက်ဒေသ ညးစၞးအမာတ်သၠးအာ ၅၅ ဒၞာဲတံဂှ် ကၠောန်ပေါဲရုဲမာဲအကြာရောၚ် ကဝ်မယှေန်ပေါဲရုဲမာဲကၟိုန်ဍုၚ် လလောၚ်တြးလဝ် ပ္ဍဲနိုဝမ်ပါ ၅ ဂှ်ရ။
အတိုၚ်ကဝ်မယှေန်ပေါဲရုဲမာဲ လလောၚ်တြးလဝ်မ္ဂး ပ္ဍဲပွိုၚ်ဍုၚ်ကျာ်မြဟ် ဒၞာဲဆန္ဒမာဲညးစၞးအမာတ် စၠတ်ထဝ်ညးဍုၚ်ကွာန် သၠးမံၚ်ဂှ်တှ်ေ သွက်ဂွံကၠောန်ပေါဲရုဲမာဲအကြာ ပ္ဍဲလ္တူဍုၚ် ၄ အရာပ်ကဵု ဂအုံကွာန် ၂၀ ကွာန်တံဂှ် လလောၚ်တြးလဝ်ရ။
အတိုၚ်စရၚ်လၟိဟ်မၞိဟ်သၞာံ ၂၀၂၄ ဂှ်တှ်ေ အပ္ဍဲပွိုၚ်ဍုၚ်ကျာ်မြဟ် အရာပ်လ္တူဍုၚ် ၄ အရာပ်ကဵု ဂအုံကွာန် ၄၄ ကွာန်တံနွံတုဲ သွက်ဂအုံကွာန် ၂၄ ကွာန် ကၠောန်ပေါဲရုဲမာဲဟွံမာန်ဂှ်ရ တၟော်အာမ္ဂး ကရပ် ၅၀% ကၠောန်ပေါဲရုဲမာဲ ဟွံမာန်ပုဟ်။
မဒှ်ဂအုံကွာန် ကၠောန်ကဵုပေါဲရုဲမာဲဟွံမာန်တံဂှ်တှ်ေ ကွာန်ဒပ်ပၠန်ဂတးတံဂ္ဇအ်လဝ်ဂှ်ကီု ကွာန်ဒပ်ပၞာန်ဗမာတံ ကဵုပရေၚ်ဂီုကၠီုပေၚ်ၚ်ဟွံမာန် ဗွဲမဂၠိုၚ် ပါလုပ်ရ။
သွက်ညးစၞးအမာတ် ပွိုၚ်ဍုၚ်ကျာ်မြဟ် ဒၞာဲဆန္ဒမာဲစၠတ်ထဝ်ညးဍုၚ်ကွာန် စၟတ်သမ္တီဒေသဆန္ဒမာဲညဳသၟဟ်ဒးရးမ္ဂး လုပ်ပြိုၚ်ရောၚ် ဥူတဇြဝ် ဥက္ကဌဗော် “အမျိုးသား အကျိုးစီးပွား တိုးတက်ရေးပါတီ” ဟီုကဵုဌာန်ပရိုၚ် သြၚ်လောန်တိုၚ်မ်ရ။
“အဲဂှ် ပရေၚ်ရုဲစှ်တိဍာ်တံ ဒေသဒၞာဲဆန္ဒမာဲတံ ဒးစၟတ်သမ္တီအာ နွံမံၚ်ဏီ။ စၟတ်သမ္တီတုဲမှ ဟီုသောၚ်ၚ် မုလေဝ်ဟွံတၟေၚ်မ္ဂး မုသ္ပရော ဟွံလုပ်ပြိုၚ်ပုဟ်။ မုဟီုဟီု ဒေသဆန္ဒမာဲ ညဳသၟဟ်ဒးရးမ္ဂး လုပ်ပြိုၚ်ထေက်တှ်ေ ပြိုင်အာဏောၚ်” သာ်ဝွံ သ္ဂးရ။
တုဲပၠန် ဒေသလ္ၚဵု ပ္ဍဲကဵုပွိုၚ်ဍုၚ်ကျာ်မြဟ်ဂှ်တှ်ေ ပရေၚ်ဂီုကၠီုဟွံမွဲတုဲ ပေါဲရုဲမာဲတုဲကၠုၚ်ဂှ်လေဝ် ကၠောန်ကဵုဟွံမာန် ဒှ်လဝ်ဂှ်ရ စပ်ကဵုပရေၚ်ဂီုကၠီုကီု ကိစ္စတၞဟ်ဟ်တံသဳကၠဳတုဲမှလေဝ် နကဵုဗော်လုပ်ပြိုၚ်ဟွံပြိုၚ်ဂှ် ကဵုအာသ္ဂုတ်သွာတ်ရောၚ် ညးဆက်ဟီုရ။
တုဲကၠုၚ်ပေါဲရုဲမာဲ ၂၀၂၅ – ၂၀၂၆ တေံ သွက်ညးစၞးအမာတ် စၠတ်ထဝ်ညးဍုၚ်ကွာန် ပွိုၚ်ဍုၚ်ကျာ်မြဟ်ဂှ် ညးစၞးနူကဵု ဗော်ပရေၚ်ဍုၚ်ကွာန် ၆ ဗော် အလံၚ်အမာတ် ၆ တၠတံလုပ်ပြိုၚ်တုဲ နူကဵုဗော် USDP ဥူမျိုဝ်မျေအ် ဂွံလဝ်ဇၞး မဒှ်ရ။
ညးစၞးအမာတ် စၠတ်ထဝ်ညးဍုၚ်ကွာန် နူကဵုပွိုၚ်ဍုၚ်ကျာ်မြဟ် အမာတ်ဗော်ဗျဳခိုၚ်ဖျိုဝ် USDP ဥူမျိုဝ်မျေအ် ဒးကေတ်တာလျိုၚ် ဒှ်အာ ဒုဝန်ဇၞော် ဌာနဝန်ဇၞော်ပရေၚ်သိုၚ်ခၞံတုဲ သွက်ဒေသဆန္ဒမာဲ ဒၞာဲသၠးမံၚ်ဂှ် ဒးကလေၚ်စုတ်လဝ် ပ္ဍဲကဵုပေါဲရုဲမာဲအကြာ မဒှ်ရ။
သွက်ဂွံကၠောန်အာပေါဲရုဲမာဲအကြာ ပ္ဍဲသၞာံ ၂၀၂၇ ဂိတုအေဗရာ ၄ မဒှ်တုဲ သွက်စၠတ်ထဝ်ညးဍုၚ်ကွာန် ၃၄ ဒၞာဲ၊ သွက်စၠတ်ထဝ်ကောန်ဂကူ ၅ ဒၞာဲ၊ သွက်ရးဒေသကဵု တွဵုရး ၁၆ ဒၞာဲတံ ကၠောန်အာရောၚ် ကဝ်မယှေန်ပေါဲရုဲမာဲကၟိုန်ဍုၚ် လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – Social Media