ကျာ်ထဝ်၊ နိုဝမ်ပါ ၉
တွဵုရးမန် ရုၚ်ဌာန်ဂအုပ်တမ်ဒပ် ၃ KNLA နွံမံၚ်ပွိုၚ်ဍုၚ်ကျာ်ထဝ်ဂှ် ဒပ်ပၞာန်ဗမာတံသီဂွံဏာရဂှ် ရိုဟ်ကၞက်ပရိုၚ်ပၞာန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ရုၚ်ဌာန်ဂအုပ်တမ်ဒပ် ၃ မဟာဒပ် ၁ KNU/KNLA ဂှ် ဒပ်ပၞာန်ဗမာ ဍိုက်လုပ်ဗတိုက်ကဵုဇြဟတ်ဂၠိုၚ်ၚ်တုဲ ပ္ဍဲနိုဝမ်ပါ ၇ အခိၚ်နူဂယးပြဟ်ဂှ် ဒပ်ပၞာန်ဗမာတံ သီဂွံဏာ မဒှ်ရ။
အတိုၚ်ရိုဟ်ကၞက်ပရိုၚ်ပၞာန်တံ ဟီုမ္ဂး ရုၚ်ဌာန်ဂအုပ်တမ်ဒပ် ၃ ဂှ် ဟိုတ်နူဒပ်ပၞာန်ဗမာတံ ဍိုက်ထပက် လုပ်ဗတိုက်ကဵု ဇြဟတ်ဂၠိုၚ်ၚ်ဂှ်တှ်ေ ညံၚ်ရဴ ဆုတ်တိတ်ကဵုအာဗွဲယာယဳတုဲ နူကၠာကရောၚ်ပၞာန်ဗမာ ဟွံထပက်ကၠုၚ်ဏီဂှ် ပဆုဲပြံၚ်ပတိတ်ဏာလဝ် ရုၚ်ဌာန်ဂအုပ်တမ်ဒပ်တုဲတုဲရဂှ် သ္ဂးရ။
အဃောဒပ်ပၞာန်ဗမာတံ သီဂွံဏာရုၚ်ဌာန်ဂအုပ်တမ်ဒပ် ၃ ဂှ်တှ်ေ သီုကဵုသီဂွံဏာ မါၚ်ကၠောန်တဲလ္ၚဵုတံကီု ကပေါတ်ပၞာန်လ္ၚဵုတံကီုနွံတုဲ စံၚ်ပလီုထောံ စမြိုၚ်ဒၞာဲဗ္ဒိုပ်ရုၚ်ဌာန်ဂအုပ်တံဂှ်ရ။
စပ်ကဵုအကာဲအရာ ရုၚ်ဌာန်ဂအုပ်တမ်ဒပ် ၃ KNLA ဒးဒုၚ်သီတုဲ နူကဵုဌာန်ပရိုၚ် သြၚ်လောန်တိုၚ်မ် ကေတ်အဆက်သၟာန်လဝ် ညးအုပ်ကာ မဟာဒပ် (၁) ခရိုၚ်သဓီု ပဒိုသဝ်ဧနိုၚ်ကီုလေဝ် ညးဟွံကလေၚ်သှ်ကဵုဏီပုဟ်။
တုဲကၠုၚ် နိုဝမ်ပါ ၅ တေံလေဝ် ပွိုၚ်ဍုၚ်ကျာ်ထဝ် ဗ္ဒိုပ်ဒပ်ပၞာန်ညးဍုၚ်ကွာန် PDF ယာယဳ နွံမံၚ်ကရပ်ကွာန် ခမံက်ခွေမွဲဒၞာဲဂှ် ဒပ်ပၞာန်ဗမာတံ သီဂွံဏာလဝ်ကီုရ။
စနူကဵု ဂိတုနိုဝမ်ပါ ၃ ဂှ်တုဲ ပ္ဍဲပွိုၚ်ဍုၚ်ကျာ်ထဝ်ဂှ် ဇြဟတ်ဒပ်ပၞာန်ဗမာ ၁၂၀၀ ပြၚ်ၚ် ထပါ်မံၚ်ကရောၚ်ပၞာန် ပ္ဍဲအကြာကွာန် KNU တံ ထိၚ်ချုက်လဝ် မဒှ်ရ။
ပ္ဍဲပွိုၚ်ဍုၚ်ကျာ်ထဝ် ဒပ်ပၞာန်ဗမာ ထပက်မံၚ်ကရောၚ်ပၞာန်ဂှ် အကြာၜါလပါ် ဒှ်မံၚ်ပေါဲဗတိုက်အရိုဟ်ဟ်တ္ၚဲနွံတုဲ ချိုတ်၊ ဒးဝပ် နွံမံၚ်သီုၜါလပါ်ဂှ် ဂွံတီရ။
ကရောၚ်ပၞာန် ဒပ်ပၞာန်ဗမာတံ ထပက်မံၚ်ပ္ဍဲပွိုၚ်ဍုၚ်ကျာ်ထဝ်တုဲ ရဲကွာန်ဇြဳပျံၚ်တံ၊ ကွာန်ဝေၚ်ကာန်၊ ကျံက်ယျေတွေၚ်၊ ခရုဲ၊ ပျေန်ကတိုဝ်ကုၚ်၊ ပုၚ်နဲကုၚ် ကွာန် ၂၀ ပြၚ်ၚ်တံ ညးဍုၚ်ကွာန် ၁၅၀၀၀ ပြၚ် ဒးဂြိပ်ပါဲမံၚ်ဒၞာဲဗၠးဘဲအန္တရာဲတံရ။
ပရိုၚ်-သြၚ်လောန်တိုၚ်မ်
Photo – Social Media