ကျာ်ထဝ်၊ နိုဝမ်ပါ ၁၁
အပ္ဍဲကဵုတွဵုရးမန် ပွိုၚ်ဍုၚ်ကျာ်ထဝ် အကြာပယျဵု KNU မဟာဒပ်(၁) ကဵု မဟာဒပ် (၃) ဌာန်ပၞာန်ရးတၟေၚ် NUG မပါလုပ် သီုဖအိုတ် ၉ ဗ္ဒိုပ်ဂှ် နူကဵုဒပ်ပၞာန်ဗမာသီဂွံတုဲ ပ္ဍဲနိုဝမ်ပါ ၁၀ ဂှ် လလောၚ်တြး ပတိတ်လဝ်ပရိုၚ်ရ။
အတိုၚ်ဒပ်ပၞာန်ဗမာ လလောၚ်ပတိတ်လဝ်မ္ဂး စနူကဵုနိုဝမ်ပါ ၃ တေံ တုဲ အကြာပယျဵု တွဵုရးမန် ဒေသ တိၚ်ဇယာတ်-ကျာ်ထဝ်ကဵု ရးဒေသဇၞော်ဗဂေါဂှ် ထပက်ကရောၚ်ပၞာန် ပသောၚ်တိဍာ်ဂှ် ပ္ဍဲနဝ်ဝမ်ပါ ၅ ဂှ်တှ်ေ သီဂွံဗ္ဒိုပ်ယာယဳ ကရပ်ကွာန်ကဝ်ကာတ် မွဲမ၊ နိုဝမ်ပါ ၆ ဂှ် ကရပ်ကွာန်ကဝ်ထံထ ဍုၚ်တိၚ်ဇယာတ်ဂှ် သီဂွံဗ္ဒိုပ်မွဲမ၊ နိုဝမ်ပါ ၇ ဂှ် ကရပ်ကွာန်ကဝ်ထဳထ ထပ်သီဂွံလဝ် ဌာန်ဂအုပ် KNU၊ KNLA မဟာဒပ် (၁) တမ်ဒပ်(၃) သီုဗ္ဒိုပ် ၄ မဂှ် ချူထမံက်လဝ် ပ္ဍဲလိက်လလောၚ်တြးဂှ်ရ။
တုဲပၠန် နိုဝမ်ပါ ၈ ဂှ်လေဝ် အကြာပွိုၚ်ဍုၚ် ယှိုဲကျေန် ရးဗဂေါဂှ် ထပ်သီဂွံလဝ် ရုၚ်ဌာန်ပၞာန်ရးတၟေၚ် NUG မပါလုပ် သီုဖအိုတ် ၅ ဗ္ဒိုပ် ရဂှ် သ္ဂးရ။
အပ္ဍဲကဵု သီလဝ်ဗ္ဒိုပ်တံဏံ ဂွံဏာလွဟ်ဂကူစုၚ်ၚ် ၉၇ ဇကိုအ်၊ မကမ်စုၚ် ၁၂၂၈၅ မ၊ Drop Bomb ၃၆၂ မ၊ မါၚ်ဂကူစုၚ် ၁၃၉ မ၊ ကွဳစက် ၂ မ၊ ဒရုၚ်၊ မခတိုဟ်၊ မဗုမ်၊ ဒဳတိုနေတာ၊ စက်ဟီုအရေဝ်၊ စၞစသုၚ်၊ ကပေါတ်ကန်ပျူတာသုၚ်စောဲ ပရေၚ်ရုၚ် ပလောအ်ကၞၚ်ကၠ၊ ပလောအ်ဒၞာကမ်၊ ကထုပ်၊ ဂဥုဲဇဗကဵု ကပေါတ်သုၚ်စောဲတၞဟ်ဟ် သီဂွံလဝ်ဗွဲမဂၠိုၚ်ဂှ် ချူစုတ်လဝ် ပ္ဍဲလိက်လလောၚ်တြးဂှ်ရ။
အတိုၚ်ဌာန်ပရိုၚ်သြၚ်လောန်တိုၚ်မ် ဂၠိုက်ဂၠာဲဂွံလဝ် ပ္ဍဲဗလးတိမ္ဂး အခိၚ်ဒပ်ပၞာန်ဗမာ ထပက်ကရောၚ်ဂှ်သီဂွံဏာ ဗ္ဒိုပ် KNU၊ PDF ၅ ဒၞာဲနွံရောၚ် ဂွံတီရ။
စပ်ကဵုဒပ်ပၞာန်ဗမာ လလောၚ်တြးဂှ်တုဲ နူကဵုဌာန်ပရိုၚ် သြၚ်လောန်တိုၚ်မ် ကေတ်အဆက်သၟာန်လဝ် ညးတာလျိုၚ် ဌာန်ပၞာန်ရးတၟေၚ် NUG ကီု ညးတာလျိုၚ် မဟာဒပ် ၁ တံကီုလေဝ် ဟွံကလေၚ်ကဵုလဝ် သွဟ်ဏီပုဟ်။
ပရိုၚ်-သြၚ်လောန်တိုၚ်မ်
Photo – SAC